Read Zotung Chin SAM 74 Bible Online

SAM 74 - Zotung Chin bible

SAM 74

¹[28] Pou Pachia, pawccemou kaening hynh zungzae nae vua? Pawccemou namaw kya rampaee hae paw tuu hae kha na thin a rianua hae?

²Langmawlya te na poku hae paw te na rho minphuin thua khylan na shawkhawku hae paw na ccungccaw a pumkuh hae paw kha liathui hae. Na la umnaw Zion Mua kha liathuitua.

³Zungzae arohpaw kalan hin yn cciatua; rhaw hae nynh beikinnthyaa kya umpaw atyn-are kha a ro vae hae.

⁴Na rhaw hae tuh na hmin thyaapaw lungkhu khe a sia hae; minmin syntawnawpaw kha tuin kya a nung hae.

⁵Minmin nynh palung thuakaw kya thingphe te raekuhpaw kha hae te a tya hae.

⁶Oute thing kya asoikuhpaw balyn kha hae te khynlyng khate marya a ro hae.

⁷Na beikinnthyaa kha maee te a soi hae; na min a umnaw hminthyaa kha laekhu lang sawbung te a nungsisaku hae.

⁸“Minmin hynh khaleih ro lan hae,” cite mimaw te mimaw a hoku hae; ram kya umpaw Pachia kya-e tungkunaw hmin balyn kha maee te a soi hae.

⁹Kaening syntawnawpaw hae kha kae muih vae khyh; profeh lu kheit san um vae khyh; hohsecia ccyh aro lanpaw kha a nyhpaw kaening laku kya lu kheit san um khyh.

¹⁰Pou Pachia, rhaw hae nynh hohseciamou yn sarya cih hae? rhaw hae nynh na min kha zungzae a ruin a san cih hae tou?

¹¹Pawccemou na kuih na khin? Pawccemou na kuih kha na by kya na nung?

¹²Tuhzemah Pachia athuapaw ka Siapharan tuh langmawlya mawte laephi vawlan khumnaw rya a lahpaw nynh thua.

¹³Na thungnaw te rili kha na phia zah, tui lungkhu khe nakaa-hupi hae lu kha na koi hae.

¹⁴Levithan hupi lu kha na tude zah, laesia ram e ccungccaw hae kha aepaw lang na pya hae.

¹⁵Tuidy te vaw taraw hae kha na luasah hae zah, palei aluapaw vaw hae kha karae na rousah hae.

¹⁶Khuadae te khuazi tuh namaw kya-e nynh athua hae; khuanin te sawpaw kha na rae hae.

¹⁷Laephi adianaw ramri kha na ia; hawnin te khuaccih kha na rae hae.

¹⁸Pou BAWIPAW , rhaw hae nynh ae sarya hae zah, beiknaw pawlangria lei hae paw nynh na min a ruin a san hae paw hynh liathuitua.

¹⁹Na vahu a hiinnaw kha sarepaw hae kalan pya nan; na ccungccaw ryachi hae kha zungzae ning nan hae.

²⁰Na byakinnaw kha ning nan, pawccecize ram lungkhu amohnaw hmin hae tuh puathonaw te nynh phe abia.

²¹Vawsaw pyakunaw a ing hae paw kha maethyanaw muesah nan hae; ryachi hae te minyaa hae nynh na min kha ae thehoysah hae sah.

²²Pou Pachia, thokuh lah, na rya kha lawtua, beiknaw pawlangria lei hae paw nynh anin ninlang nang ae sarya hae paw kha liathuitua.

²³Na rhaw hae nynh a siarua hae paw kha ning nan, nang ae rawse hae paw nynh siarisiarae palei a um hae paw roi kha ning nan.