Read Zotung Chin SAM 75 Bible Online

SAM 75 - Zotung Chin bible

SAM 75

¹Asaf Hlaw Pou Pachia, kaening nynh nang kha the kae hoysah; na min tuh kae naeku keiccuze na the kae hoysah. Ccungccaw hae nynh ngaeangthua lan umpaw na cyipaw kong kha a ho hae.

²Ka khyapaw accyh azaw te, dingnaw te bya ka pia cih.

³Laephi te laephi kya umpaw ahysuepaw balyn hynh he a hy hae te, laephi atung hae a tynsahpaw tuh kamaw nynh ka thua.

⁴A pookuh hae paw kyakhe, “Pookuh nan oh,” cite ka hopah hae zah, ccungccaw hoylei hae paw kyakhe, “Na lysakunaw oh paw ki kha hangthung nan oh;

⁵nae ki kha ahangnaw lang hangthung nan oh, lysakute byaho nan oh,” cite ka hopya hae.

⁶Byapianaw hynh nithua, niccaw langte thuasah, palung, alia langte thuasah yn thua khyh;

⁷byapiatu tuh Pachia thua zah, lu kheit kha sahbung zah, ccangpaw lu kheit kha a hangthung.

⁸BAWIPAW kuih kyakhe banang ccangkheit a um, tuh-e banang kyatuin amynkhuhpaw te pykuhpaw ruithyapaw misutui a um, aning nynh tuh-e tuh moh a lae cih zah, laephi vaw e ccungccaw hoylei hae paw nynh a dangdy balyn kha phe thang lan a neih cih hae.

⁹Thuasalama kae tuh zungzae ka lungtua cih; Jakob Pachia kha thehoysahnaw hlaw ka sah cih.

¹⁰Ccungccaw hoylei hae paw mih ki balyn kha ka khya cih, thuasalama miding hae ki tuh hangthung athua cih.