Read Zotung Chin SAM 77 Bible Online

SAM 77 - Zotung Chin bible

SAM 77

¹Asaf Hlaw Pachia kalan thawte ka sia, Pachia kalan thawte ka siapaw roi kha yn thaepah cih.

²Ka vawsaw lyakhe BAWIPAW kha ka ccung; khuazi kya mah ka kuih kha thawbang leite ka dyng; thuasalama ka muisaw tuh ngaengannaw mue khyh.

³Pachia kha ka tua zah, ka hawkhaekuh; Hoyte ka tua zah, ka lungthawzya,

⁴Mit masite nae isah kho khyh; ka lungvaw eih saw zah, bya ka ho kho khyh.

⁵Athang vae paw nin hae kha ka tua zah, langmawlya e kum hae kha ka liathui.

⁶Khuazi khe ka hlaw kha ka thinlung te ka tua; hoyte ka tua zah, ka muisaw kha ka ccung.

⁷“BAWIPAW nynh zungzae yn vua cih tou? maehoynaw bua yn pya vae lan khyh tou?

⁸Atynpaw a sungsahnaw kha zungzae a thangsah vae cih tou? A byakinpyakunaw hae tuh zungzae a thangsah vae cih tou?

⁹Pachia nynh thawcci lanpaw kha phe a ning vae tou? Ngaethyaumsahnaw a hoipaw kha a thinria keiccuze phe a zosah vae tou?” ka ciku.

¹⁰Te kae nynh, “Ka ngae athyapaw tuh: Ahang Huaccepaw a ranglang kuih nynh phe a rulae vae, cipaw hynh nynh thua,” ka ci.

¹¹BAWIPAW ryalawnaw kha ka tuathui cih; langmawlya na la cyipaw ngaeangthua lan um hae paw kha ka liathui cih.

¹²Na ryalaw balyn kha ka tuathui cih zah, athungpaw na cyisahnaw hae kha hoyte ka tua cih.

¹³Pou Pachia, na laanpi tuh athyaa. Pawcihawpaw pachia mou kaening Pachia hawte alesae?

¹⁴Nang tuh ngaeangthua lan umpaw rya a lahpaw Pachia nynh na thua; minphuin hae kyakhe na thungnaw kha na langsaku vae.

¹⁵A thawsaepaw na kuih te na ccungccaw athua hae paw Jakob te Josef ciihan hae kha na shawkhaw hae.

¹⁶Pou Pachia, tui hae nynh nang kha he ae muih hae te, minmin tuh a rih hae; tui akhunaw tuh a thyngkuh.

¹⁷Maeking hae nynh khuaa a rawsah; vaawlui mah kholungthyh zah, na the hae tuh teitei lang balyn phe a thua.

¹⁸Na kholungthyhpaw roi tuh khiccung kya um zah; na khozawlaekuhpaw nynh laephipi kha a awsah; laephi tuh thyngkuh zah ahy.

¹⁹Nang tuh rili kyakhate na cceih, na laanpi tuh akopaw tui kya po a cceih; tuhzemah na ccunoh tuh muih kho thua khyh.

²⁰Moses te Aaron kuih khate na ccungccaw hae kha tuuphu hawte na cciakhae hae.