Read Zotung Chin SAM 79 Bible Online

SAM 79 - Zotung Chin bible

SAM 79

¹Asaf Hlaw Pou Pachia, minphuin hae nynh na rho lungkhu lang yn thua vae hae; athyaapaw na beikinnpi kha a thusah vae hae; Jerusalem kha a ro vae hae.

²Na ryalahtu hae rhua kha vaawlang e pavaw hae kalan pya hae zah, alungzipaw na ccungccaw hae saw kha loramsaw hae kalan a pya vae hae.

³Na ccungccaw hae chiise kha Jerusalem pepan balyn tui hawte luasah hae zah, mih rhua a uh lanpaw lu kheit san um khyh.

⁴Kaening tuh kae innpaw hae nynh saryapaw lang kae tang vae zah, kae pepan um hae paw nynh nuinsepaw te dothatheihpaw lang kae tang vae.

⁵Pou BAWIPAW , hohseciamou na thinria cih? Zungzae na thinria cih tou? Na thinrianaw tuh maee hawte po rua cih tou?

⁶Nang ae nyh lei hae paw minphuin hae te na min ae ko lei hae paw peenaw hae kha thinrianua hae.

⁷Pawccecize minmin nynh Jakob ciihan kha theih hae zah, a umnaw kha mah a ro hae.

⁸Kae minpaaw hae seinaw keiccuze kaening hynh de oun tah nan; myarya kae nyaa keiccuze arangte thaw oun ccitua.

⁹Pou oun khumtu Pachia, Na min phu-enaw hanlan oun bawmtua, na min keiccuze oun luesah lah, kae seinaw oun ngaethya.

¹⁰Pawccemou minphuin hae nynh, “Mih Pachia tuh teimou um?” cite a ho hae? Na ryalahtu hae chiise kha a luasah keiccu hae ze, minphuin ccangpaw hae tungvaw na liarunaw hae paw kha kae mit nynh muih sah.

¹¹Thongccah hae nynh a hawkhaeku hae paw roi kha thaepya tua hae; chia lan accan vae hae paw kha alesaepaw na huhan khate luesah tua hae.

¹²Pou Bawipaw, kae innpaw hae nynh nang ae sarya hae keiccuze, leit sari te liaru hae.

¹³Tetuh kaening na ccungccaw hae, na ramnonaw e tuuphu hae nynh na tungvaw zungzae kae lungtua cih; namaw thehoysahnaw bya kha she kheit koute she kheit kae ho cih.