Read Zotung Chin SAM 81 Bible Online

SAM 81 - Zotung Chin bible

SAM 81

¹Asaf Hlaw Ah thawzung athuapaw Pachia kalan lungtuate hlawsah oh; Jakob Pachia kalan lungtuate sia oh.

²Hlawsah oh lah, tyng kha thuasah, aroi hoypaw daw te tintang kha thuasah khuakuh oh.

³Sawpaw sahhangthung, sahpynglyn, aening poi nin kyakhe mungkae kha tu oh.

⁴Pawccecize tuh-e tuh Israel hae hanlan phungbya thua zah, Jakob Pachia phungzae nynh thua.

⁵Izip ram kya po he a cceih te, Josef phin kya tuh-e phunglang tuh a rae. Ka thae boi leipaw roi ccangkheit ka thae zah, tuh-e roi nynh,

⁶“Na raw vawlan e phupaw kha kae lawpya vae; na kuih kha rya na lawnawpaw sua lungkhu te poh kae thuaapya vae.

⁷Vawsaw na tungnaw kyate nae ko zah, kae luesah vae; muih kho leinaw kholungthyhnaw hmin kyate nang kha kae leih vae; Meribah tui kyakhe nang kha kae syntawtua.

⁸Pou ka ccungccaw hae, raeringnaw kae pya lya oh hin ngae oh; Pou Israel, ka bya hynh ngaetua!

⁹Nanning laku kya ramccang pachia um lan khyh; ramccang pachia kha na beik lan khyh oh.

¹⁰Kae tuh Izip ram kyate ae poukhae oh paw BAWIPAW nae Pachia nynh ka thua. Nae khalang kha haehae aw oh lah, kae baw cih oh.

¹¹“Thuasalama ka ccungccaw hae nynh ka bya ngae khyh hae; Israel hae nynh ka kaw yn ngae khyh hae.

¹²Tukeiccuze mih ry thyhte um hae sah cite, mih lungkhung thyhte ka cciasah hae.

¹³Ka ccungccaw hae nynh ka bya kha ngae hae sah, Israel nynh ka laanpi kha a zui lanze,

¹⁴mih rhaw hae kha arangte ka taepah cih hae zah, minmin a rawse hae paw kha de ka tah cih hae.

¹⁵BAWIPAW a hua hae paw tuh amaw malang rawrite a thyngkuh cih hae, minmin tungvaw detahnaw tuh zungzae atyn cih.

¹⁶Ahoy huapaw chanvuih te nanning kha kae dang cih oh zah, lungpi kya-e khoitui te phe byn lan kae dang cih oh,” a ci.