Read Zotung Chin SAM 83 Bible Online

SAM 83 - Zotung Chin bible

SAM 83

¹Asaf Hlaw Pou Pachia, yccae leite beih um nan; Pou Pachia, daebabi lan beih um nan!

²Na rhaw hae tuh atu heize siarisiarae a um hae; nang ae hua hae paw nynh mih lu kha a hangthung vae hae.

³Na ccungccaw hae kha rawsete aruh lante khua a khannuaku hae; na thungkhawpaw ccungccaw hae kha rawsete pynkheihlan a paccynnuaku hae.

⁴Minmin nynh, “Rang oh, mih minphuin khuh maemih oh sih; Israel min kha liathui thua lae nan vae sah,” a ciku hae.

⁵Minmin nynh lunglokute khua a khanku hae; nang kha rawsete byakinkunaw a rae hae;

⁶tuh-e hae tuh: Edom ccungccaw hae, Ishmael ccungccaw hae; Moab ccungccaw hae, Hagri ccungccaw hae,

⁷Gebal ccungccaw hae, Ammon ccungccaw hae, Amalek ccungccaw hae, Filistin ccungccaw hae te Tair ccungccaw hae nynh thua hae;

⁸Assiria ccungccaw hae mah minmin kalan a panbua hae; Minmin tuh Lot ccaaw hae kya-e athungpaw thawzung nynh thua hae.

⁹Midian ccungccaw hae tungvaw thuasah, Kishon Vawkhu kya-e Sisera te Jabin tungvaw thuasah na cyi hae hawte hynh-e hae hynh cyih hae,

¹⁰Sisera te Jabin tuh Endor kya na roh hae zah, mih rhua tuh laephi kya vaetua ia hawte phe thua hae.

¹¹Oreb te Zeeb tungvaw na cyi hawkhate mih bawi hae balyn kha cyih hae, mih siapharan hae kha mah Zebah te Zalmunna hawkhate cyih hae.

¹²Zebah te Zalmunna tuh, “Pachia ram kha ahmaw ram lang tangsah oh sih,” cite a ho hae paw nynh thua hae.

¹³Pou ka Pachia, minmin kha khiccung nynh a mungpaw vuiping lang tangsah hae lah, khisan nynh a mungpaw vaekang lang tangsah hae.

¹⁴Maee nynh loram a u hawte thuasah, maeesoi nynh mua a u hawte thuasah,

¹⁵minmin kha khise te dee hae lah, na khisepi te sii hae.

¹⁶Pou BAWIPAW , minmin nynh namaw min a ccung ccaw hae, mih maethyasah hae.

¹⁷Maethyanaw mue hae sah lah, zungzae mih lungroh sah; thethyate chih hae sah.

¹⁸Na min BAWIPAW na cikuhpaw nang rou hynh nynh laephi pynpi kya Ahang Huaccepaw na thua cipaw nyh hae sah.