Read Zotung Chin SAM 85 Bible Online

SAM 85 - Zotung Chin bible

SAM 85

¹[30] BAWIPAW , na ram tungvaw na lungrythua zah, Jakob ciihan hae kha bua na kikhae hae.

²Na ccungccaw hae hoyleinaw kha na ngaethya hae; mih seinaw balyn kha na ngaethya hae.

³Na thinrianaw balyn kha na zosah zah, myarya lepaw na thinrianaw kha na daesah vae.

⁴Kaening oun khumtu, pou Pachia, langmawlya hawte oun thuasah thui lah, kae tungvaw na thinrianaw kha daesah ccavae.

⁵Kae tungvaw zungzae na thinria cih tou? Na thinrianaw tuh she takyh kya accyh po na saesah cih tou?

⁶Na ccungccaw hae nynh namaw kya mih lungtua nawlan, kaening hynh thawzung nae pyathui lan khyh tou?

⁷Pou BAWIPAW , atynpaw na sungsahnaw kha oun langsapakuh lah, na khumnaw kha oun pyatua.

⁸BAWIPAW Pachia nynh a ho cih paw bya kha yn thaesah tua, a ccungccaw hae, amaw kya mih lungzi hae paw, mih thinlung te amaw kalan a maeleihkuh hae paw kalan khe aning nynh daenaw bya kha a hopah cih hae.

⁹A phu-enaw tuh aening ram kya a um nawlan, a khumnaw tuh amaw a rih hae paw kuih kya nynh a um ccaccing.

¹⁰Atynpaw sungsahnaw te lungzinaw tuh a tungkuh cih hae; dingnaw te daenaw tuh a myngkuh cih hae.

¹¹Lungzinaw tuh laephi kyate a pouthung cih zah, dingnaw nynh vaawlui te a dobung cih.

¹²BAWIPAW nynh hoynaw kha oun pya cih zah, ah ram nynh patae a voisah cih.

¹³Dingnaw tuh BAWIPAW malang khe a cceih cih zah, a laanpi kha a raepah cih.