Read Zotung Chin SAM 86 Bible Online

SAM 86 - Zotung Chin bible

SAM 86

¹David Sawsangnaw Pou BAWIPAW , na nakaring tuakute yn ngaepah lah, yn leihtua, kae tuh ka ryachi zah ka ho ka bou.

²Kae tuh namaw kya ka lungzi keiccuze ka hiinnaw hynh yn thungkhawtua; nang ae doliakuhpaw na seepaw hynh yn khumtua. Nang tuh ka Pachia nynh na thua;

³Pou BAWIPAW , na kalan anin ninlang ka sia keiccuze thaw beih yn ccitua.

⁴Pou BAWIPAW , na kalan saw ka sang keiccuze na seepaw hynh ka lung yn tuasah tua.

⁵Pou BAWIPAW , nang tuh na hoy, seingaethyanaw na hoi zah, na kalan saw a sang hae paw tungvaw atynpaw sungsahnaw te phe na beih.

⁶Pou BAWIPAW , ka sawsangnaw hynh yn ngaepya tua; siaruate kae ngianaw hynh yn ngaepya tua.

⁷Nae leih cih keiccuze ka vawsaw ccyh lya nang kha kae ko.

⁸Pou BAWIPAW , pachia hae laku kya nang ae lopaw um khyh, na cyipaw rya te alokuhpaw ccangpaw rya ccangkheit san um khyh.

⁹Pou BAWIPAW , na raepaw minphuin balyn nynh oun cceih cih hae zah, na malang bakhungte na min kha ae thehoysah cih hae.

¹⁰Pawccecize nang tuh na lesae zah, ngaeangthua lan umpaw uccaw hae kha na rae; nang rou nynh Pachia na thua.

¹¹Pou BAWIPAW , na byaccing kya ka ccia ccaw, na laanpi kha yn ccangpya tua; na min kha sawtua khylan aphei leipaw thinlung yn pyatua.

¹²Pou BAWIPAW ka Pachia, ka thinlung balyn te nang kha kae thehoysah zah, na min kha zungzae phu kae esah cih.

¹³Pawccecize ka hanlan atynpaw na sungsahnaw tuh myarya ale; akhunaw michi khua kyate ka muisaw kha nae luesah vae.

¹⁴Pou BAWIPAW , a lysakuh hae paw nynh rawsete yn thonuaku hae; mih rysawthah hae paw phu nynh nang kha pawlangria leite kae kha chia lan a zuaku hae.

¹⁵Pou BAWIPAW , nang tuh thawccih thyapaw te ngaethyaumsah thyapaw, a lungsaepaw, atynpaw sungsahnaw te phe abeihpaw te a lungzipaw Pachia nynh na thua.

¹⁶Ka kalan yn maeleihkuh lah, thaw yn ccitua; na seepaw hynh na thawzung yn pyabua; na seenung ccaaw hynh yn khumtua.

¹⁷Na kya-e ahoypaw muihsahnaw kha yn langsapyaku tua, tuhteze nynh kae yn hua hae paw nynh tuh-e tuh a muih cih hae zah, mih maethah cih, pawccecize BAWIPAW nynh yn bawm vae zah, ka ngae yn ngansah vae. ae thehoysah cih hae.