Read Zotung Chin SAM 89 Bible Online

SAM 89 - Zotung Chin bible

SAM 89

¹[33] Pou BAWIPAW , atynpaw na sungsahnaw kha hlaw te zungzae ka sah cih; na lungzinaw kha ka mung te she takyh ka siakhae cih.

²atynpaw na sungsahnaw tuh zungzae atyn cite ka ho; na lungzinaw tuh vaawlui hawte atyn.

³Namaw nynh, “Ka popaw ccungccaw kyakhe byakinnaw kha ka rae vae, ka seepaw David kha bya ka kinpakuh zah:

⁴‘Na ciihan tuh zungzae ka tynsah cih zah, na bawitungkhung tuh she takyh kya ka tynsah cih,’ ka cipya,” cite na ho.

⁵Pou BAWIPAW , vaawlui hae nynh na raepaw ngaeangnaw hae kha thuasah, athyaapaw ccungccaw hae pumkunaw kyaze na lungzinaw kha thuasah ae thehoysah hae sah.

⁶Pawccecize vaawlui kya nang te touse lanpaw hummou a um? Vaawlui kya a um hae paw lakuze BAWIPAW te alokuhpaw hummou a um?

⁷Pachia tuh athyaapaw zapi hae laku kya ri lan umpaw nynh thua, a pepan um hae paw balyn laeze alesaepaw te ri lan umpaw nynh thua.

⁸Pou vaaw BAWIPAW Pachia, nang hawte athawsaepaw hummou a um, pou BAWIPAW? Na lungzinaw nynh namaw kha phang ae koihlu.

⁹Rili tuihu kha na uk zah, rili tuileih he atho ze, na daesah.

¹⁰Rahab kha sachihpaw hawte na ro; na rhaw hae kha athawsaepaw na kuih te phiariphiarae na nung hae.

¹¹Vaawlui hae tuh na uccaw thua zah, laephi mah namaw uccaw nynh thua; laephipi te a lungkhu umpaw balyn kha na rae.

¹²Palung lang te alia lang kha na rae; Tabor mua te Hermon mua nynh na min kha lungtuate the ae hoysah hae.

¹³Nang tuh athungpaw kuih na hoi; na kuih tuh a thawsae zah, na ranglang kuih tuh ahang.

¹⁴Dingnaw te byading tuh na bawitungkhung aleihpaw nynh thua; atynpaw sungsahnaw te lungzinaw tuh na malang a cceih hae.

¹⁵Lungtuanaw roi a nyhpaw ccungccaw hae tuh lungtuapaw nynh thua hae: Pou BAWIPAW , na mitmae awnaw lungkhu a cceih hae paw tuh lungtuapaw nynh thua hae;

¹⁶minmin tuh na min kyakhe anin ninlang mih lungtua zah, na dingnaw liate hangthung athua hae.

¹⁷Pawccecize nang tuh mih thawzung phu-enaw nynh na thua; na thawccinaw liate kae thungnaw ki tuh hangthung athua.

¹⁸Pawccecize kae khawriaphua tuh BAWIPAW kya-e thua zah, Israel kya-e Athyaapaw Pachia tuh kae siapharan tuh nynh thua.

¹⁹Te langmaw lyaze a lungzipaw na ccungccapaw kyakhe vizin te na hopah zah, “A thawsaepaw lukheitpaw kha bawilukhung ka khungsah vae, ccungccaw hae laku kyate po athuapaw lukheitpaw kha ka hangthung vae.

²⁰Ka seepaw David kha ka muih vae; ka chitui athyaapaw te amaw kha ka thuh vae;

²¹ka kuih tuh amaw kya a um zungzae cih; ka kuih nynh mah amaw kha thawzung a pya cih.

²²Rhaw nynh amaw kha tae lan khyh zah, ccungccaw hoyleipaw nynh amaw kha tae lan khyh.

²³A rhaw hae kha amaw malang khe ka roh cih hae zah, amaw a huatu hae paw kha ka theih cih hae.

²⁴Ka lungzinaw te atynpaw ka sungsahnaw tuh a tungvaw a um cih zah, ka min liate a thungnaw ki tuh hangthung athua cih.

²⁵A kuih tuh rili vawlan ka khang cih zah, a ranglang kuih tuh vawpi hae vawlan ka khang cih.

²⁶Aning nynh kamaw kalan khe, ‘Nang tuh ka Paaw, ka Pachia te yn khumtu Lungpi nynh na thua!’ cite a sia cih.

²⁷Aning kha ccatawccaw, laephi siapharan hae kyaze ahang huaccepaw lan ka rae cih.

²⁸Atynpaw ka sungsahnaw kha a tungvaw ka tynsah zungzae cih zah, ka byakinnaw tuh amaw kya tynkaring lan a um cih.

²⁹A ciihan kha zungzae ka tynsah cih zah, a bawitungkhung kha vaawlui atyn lungkhu balyn po atyn cih.

³⁰A ccaaw hae nynh ka phung kha vua hae zah, ka phungzae thyhte a zui khyh hae ze thuasah,

³¹ka phunglang kha pawlangria khyh hae zah, ka kawbya kha a zui khyh hae ze thuasah,

³²mih cyiseinaw keiccuze tungbang te thuasah, mih hoyleinaw keiccuze ccinaw alepaw te thuasah de ka tah cih hae;

³³thuasalama atynpaw ka sungsahnaw kha amaw kyate ka nue lan khyh, ka lungzinaw kha mah ka roh lan khyh.

³⁴Ka byakinnaw kha ka roh lan khyh, ka mung kyate a poupaw bya kha ka paleih lan khyh.

³⁵David kha ka hynpah lan khyh cite athyaapaw ka thuanaw liate vaekheit te zungzae hanlan bya ka kinku.

³⁶A ciihan tuh zungzae po atyn cih, a bawitungkhung tuh khuanin hawte ka malang atyn cih.

³⁷Tuh-e tuh sawpaw hawte thuasah, vaawlui kyaze a lungzipaw ccaekia hawte thuasah zungzae atyn cih,” na ci.

³⁸Thuasalama atu tuh amaw kha na vua zah na cciataw vae; chitui na thuhpaw tungvaw myarya na thinria vae.

³⁹Na seepaw kya na raepaw byakinnaw kha phe na ro vae; a bawilukhung kha vuiping kya na thusah vae.

⁴⁰A khualungrua balyn kha marya na tingsahpya vae; a rhawlungrua kha na ropya vae.

⁴¹A cceih bungthung hae paw balyn nynh amaw kha a luade hae; aning tuh a innpaw hae nynh a sarya hae paw lang a tang.

⁴²A rhaw hae mih ranglang kuih kha na hangthung vae hae; a rhaw hae balyn kha mih lung na tuasah vae hae.

⁴³Tuhpiaze, a thaloi haw kha na paleihpah zah, rhawtuknaw kya amaw kha na pankhae vae khyh.

⁴⁴A kuih kyate ccoi kha na lawpah zah, a bawitungkhung kha laekhu lang na vuapya vae.

⁴⁵A ngawphue ccyh kha na dynsahpah zah, maethya na bong vae.

⁴⁶Pou BAWIPAW , hohseciamou, zungzae tetou na rekuh cih? Hohseciamou na thin-unaw tuh maee hawte arua cih?

⁴⁷Ka ccyh tuh hohcihmou adyn cipaw ning nan lah, ccungccaw hae balyn hynh a chihthya lante na raepaw nynh thua cipaw liathuitua!

⁴⁸Chi leite a hiin khopaw hummou a um? Michi khua huhan kyate hummou a lue kho?

⁴⁹Pou BAWIPAW , na lungzinaw te David kya bya na kinpyakupaw langmawlya e atynpaw na sungsahnaw kha teimou a um vae?

⁵⁰Pou BAWIPAW , na seepaw nynh hohcihmou saryanaw ka teing cipaw liathuitua; ccungccaw hae nynh saryakunaw kha ka by kya hohcihmou ka poi cipaw kha mah liathuitua.

⁵¹Pou BAWIPAW , na rhaw hae nynh chitui na thuhpaw kha a sarya hae, a ccianaw miakaw kya a sarya hae.

⁵²BAWIPAW tuh zungzae te thehoysah thua sah. Amen, Amen.