Read Zotung Chin SAM 9 Bible Online

SAM 9 - Zotung Chin bible

SAM 9

¹David Hlaw BAWIPAW kha ka thinlung balyn te ka thehoysah cih; ngaeang lan umpaw na raepaw balyn kha ka ho cih.

²Na tungvaw myarya ka lungtua cih; Pou Ahang Huaccepaw, na min kha thehoysahte hlaw ka sah cih.

³Ka rhaw hae tuh nulang he a ki hae te, na malang khe khuliakuh hae zah a chih hae.

⁴Pawccecize kae kha pankhawte bya na pia vae; bawitungkhung kya na haung zah, adingpaw byapianaw kha na rae vae.

⁵Pachia beik leipaw minphuin hae kha na thuihei vae hae, ccungccaw hoylei hae paw kha na ro vae hae; mih min kha zungzae te zungzae cia na the vae.

⁶Rhaw hae tuh zungzae ronaw kya a zo vae hae; mih khuapi hae kha phe na ro mamia vae hae; minmin syntawnawpaw miakaw tuh azo vae.

⁷Thuasalama BAWIPAW bawitungkhung tuh zungzae atyn; byapianaw hanlan a bawitungkhung kha a tynsah vae.

⁸Laephi kha dingnaw te bya a pia; ccungccaw hae kha laesah leite bya a pia hae.

⁹BAWIPAW tuh tuaasahkunaw a teing hae paw hanlan rekunaw thua zah, vawsaw tung lya rekunaw nynh thua.

¹⁰Te na min a nyh hae paw nynh nang kha ae doliaku hae, pawccecize, pou BAWIPAW , nang ae ccung hae paw kha na vua boi khyh hae.

¹¹Zion kya umpaw BAWIPAW kha hlaw te thehoysah oh. a ryalaw kha minphuin hae kalan hopah oh.

¹²Pawccecize chiise a luasahtu hae kha tyty nyh hae zah, vawsaw a tung hae paw siaruanaw kha ningpah khyh hae.

¹³Pou BAWIPAW , thaw beih yn ccitua. Yn hua hae paw nynh yn teingsah hae paw hynh yn muihpya tua; nang tuh chinaw kyate yn luesahtu nynh na thua,

¹⁴tetuh na thehoynaw balyn kha Zion ccanung koikua hae kyakhe ka ho cih, nae khumnaw keiccuze ka lungtua cih.

¹⁵Pachia nyh leipaw minphuin hae tuh mimaw nynh a thae hae paw hunghua lungkhu lang a ccah vae hae; a sya hae paw kaang kyakhe mimaw ccu tuh a kae vae.

¹⁶BAWIPAW nynh a byapianaw khate amaw toulou kha a langsaku vae; ccungccaw hoylei hae paw tuh mimaw kuih te a law hae paw ryalaw kyakhe kaang a kae hae.

¹⁷Ccungccaw hoylei hae paw te Pachia a ning hae paw minphuin hae balyn tuh michi khua lang a cceih cih hae.

¹⁸Ahoboupaw ccungccaw hae kha palei ning thua lan khyh zah, ryachi hae tuh ngaehoinaw hoi leite um zungzae lan khyh hae.

¹⁹Pou BAWIPAW , thoku tua, ccungccaw nynh nang kha ae tae nan sah; minphuin hae tuh na malang khe byapianaw ing hae sah.

²⁰Pou BAWIPAW , minmin kha mih thinphangsah tua hae; ccungccaw nynh hung kae thua cipaw nyhkuh hae sah.