Read Zotung Chin SAM 90 Bible Online

SAM 90 - Zotung Chin bible

SAM 90

¹Moses Sawsangnaw Bawipaw, nang tuh she takyh kya kae khynnaw nynh na thua.

²Mua hae na rae mawze, laephi pynpi na rae mawze nang tuh athonaw kyate athangnaw kyacia Pachia nynh na thua.

³Ccungccaw hynh laenoi kalan nae kisah zah, “Ccungccaw hae nanning, ki oh,” na ci.

⁴Na malang tuh kum thong kheit hynh athang vae paw inkhawnin hawte thua zah, khuazi ccyh ccyhkheit hawte nynh athua.

⁵Ccungccaw hae kha phe thyaa lan na phi hae; minmin tuh maan hawte thua hae zah, awkhua ccyh kya atoih thawpaw lonua hawte nynh athua hae;

⁶tuh-e lonua tuh awkhua ccyh lya yn paw zah yn lethung; zete ccyh vae tuh baluh naan zah arou vae.

⁷Na thinrianaw keiccuze kaening kha marya ro kae thua vae; na thinrianaw keiccuze tae kae thua vae.

⁸Kae hoyleinaw kha na malang khe na nung zah, aruh lante kae raepaw seinaw kha marya na muih vae.

⁹Na thinrianaw nynh kae hiinshe oun dynsah; kae hiinshe tuh vaekheit hysawpaw te nynh aloku.

¹⁰Kae hiinshe tuh kum sung sari nynh asae; kae thawzung a um ze kum sung tarya mah asae kho; tuhzemah kae hiin lungkhu kya vawsawnaw te ngaethyanaw mawcci nynh kae tung; kae hiinnaw tuh aro maw thang zah phe kae zo.

¹¹Na thinrianaw huhan kha hummou a nyhthya? Na thin-unaw kha ri lan accan thyhte hummou a rih?

¹²Tukeiccuze kae ccyh riathyanaw kha oun ccangpya tua, tuhteze nynh kae thinlung a haw kho cih.

¹³Pou BAWIPAW , yn kitua! Hohseciamou aro ung cih? Na see hae tungvaw ngaethyaumsahnaw beih hoitua!

¹⁴Atynpaw na sungsahnaw te awkhua takyh kae lungrya oun chisah tua. tuhteze tuh kae hiin lungkhu balyn kae lungtua cih zah kae lungpaw cih.

¹⁵Vawsawnaw nae ingsah ccyh asae thathyhte, hoyleinaw kae tungpaw akum alung thathyhte lungtuanaw oun pyatua.

¹⁶Na ryalaw tuh na see hae kya langkuh sah lah, na phu-enaw huhan tuh mih ccaaw hae kya langkuh sah.

¹⁷BAWIPAW kae Pachia kya-e maehoynaw tuh kae tungvaw um sah lah, kae cyipaw ryalaw tuh kaemaw elang hoynaw um sah, Kae kuih nynh rya a lawpaw kya kae laan kae sui ua vae sah.