Read Zotung Chin SAM 95 Bible Online

SAM 95 - Zotung Chin bible

SAM 95

¹Rang oh, BAWIPAW kalan hlawsah oh sih; oun khumtu lungpi kalan lungtuate sia oh sih!

²Lungtuanaw te amaw malang tee oh sih lah, thehoysahnaw hlaw kha lungtuate sah oh sih!

³Pawccecize BAWIPAW tuh alesaepaw Pachia thua zah, pachia hae balyn laeze alesaepaw Siapharan nynh thua.

⁴Laephi akhunaw balyn tuh a kuih kya um zah, mua ahangnaw hae mah amaw kya-e nynh thua.

⁵Rili tuh a raepaw thua zah, amaw kya-e nynh thua, laelung kha mah a kuih te a rae.

⁶Rang oh, bakhung oh sih lah, beik oh sih, oun Raetu BAWIPAW malang ccukharutung oh sih!

⁷Pawccecize aning tuh ah Pachia nynh thua, aening tuh a ramnonaw kya a paeepaw ccungccaw hae ah thua oh zah, a kuihkaw e tuuphu nynh ah thua oh. Atunin a bya kha ngaetua oh!

⁸Meribah kya hawte thuasah, laesia ram umpaw Massah kya hawte thuasah nae lungkhung nan sah,

⁹nae minpaaw hae nynh yn syntawtua hae zah, ka ryalaw mang a muih vae hae pite, yn syntawtua hae.

¹⁰Kum sung pali lungkhu khah-e minphuin kha ka hua zah, “Minmin tuh mih thinlung a cceihseipaw thua hae zah, ka laanpi kha pawlangria khyh hae,” ka ci.

¹¹Tukeiccuze ka thinria zah, “Minmin tuh ka haeungnaw lungkhu lang tee lan khyh hae,” cite bya ka kinku.