Read Zotung Chin SAM 96 Bible Online

SAM 96 - Zotung Chin bible

SAM 96

¹BAWIPAW kalan hlaw thawpaw kha sah oh; laephi ccungccaw hae balyn, BAWIPAW kalan hlawsah oh.

²BAWIPAW kalan hlawsah oh lah, a min kha thehoysah oh; a khumnaw thehoypaw kha nin takyhte ho oh.

³Minphuin hae kalan a phu-enaw kha ho oh lah, ccungccaw hae balyn kalan ngaeangthua lan umpaw a ryalaw kha ho oh.

⁴BAWIPAW tuh lesae zah, thawmawte thehoysah lanpaw nynh thua; ccangpaw pachia hae balyn laeze sawtuahua lanpaw nynh thua.

⁵Minphuin ccangpaw hae kya-e pachia hae tuh zohtuh hae nynh thua, thuasalama BAWIPAW nynh vaawlui kha a rae.

⁶Sawtuanaw te lesaenaw tuh amaw malang a um; thawzung te puithyanaw tuh a beikinnthyaa kya a um.

⁷Laephi ccungccaw hae balyn, BAWIPAW kha thehoysah oh, BAWIPAW phu-enaw te a thawzung kha thehoysah oh.

⁸A phu-epaw BAWIPAW min kha thehoysah oh; silawnawpaw kha ccyngkute a beikinn lungkhu lang oun tee oh.

⁹Alesaepaw te athyaapaw BAWIPAW kha beik oh; laephi ccungccaw hae balyn, amaw malang rawrite um oh.

¹⁰Minphuin hae kyakhe, “BAWIPAW tuh siapharan nynh thua! Laephipi tuh tynkaring lan thadynsah athua keiccuze kharouh nuekuh lan khyh. Ccungccaw hae kha dingnaw bya a pia cih hae,” cite hopah oh.

¹¹Vaawlui hae tuh mih lungpaw sah lah, laephi tuh a lungtua sah; rili te a lungkhu um hae paw tuh sia hae sah;

¹²loo te a lungkhu umpaw atyn-are balyn tuh mih lungtua sah. Te ramkaw e thingku balyn tuh BAWIPAW malang lungtuate hlaw a sah cih hae;

¹³pawccecize BAWIPAW tuh laephi kha byapia khylan yn thua. Aning nynh laephi kha dingnaw te bya a pia cih zah, ccungccaw hae kha byaccing te bya a pia cih hae.