Read Zotung Chin PHUNGTANGBYA 12 Bible Online

PHUNGTANGBYA 12 - Zotung Chin bible

PHUNGTANGBYA 12

¹Thuiheikunaw a rypaw tuh hawnaw kha a ry, thuasalama thuiheikunaw kha a huapaw tuh mingaee nynh thua.

²Ccungccaw hoypaw tuh BAWIPAW kyate maehoynaw kha a mue, thuasalama hoyleinaw khua a khanpaw kha tuh de a tah.

³Ccungccaw hynh hoyleinaw liate khynkuh khyh, thuasalama miding tharui tuh nue kho thua khyh.

⁴Ahoypaw zu tuh a vawpaw bawilukhung nynh thua, thuasalama maethyanaw a thuakhaepaw zu tuh a vawpaw ru kya-e athuhpaw hawte nynh athua.

⁵Miding hae paccynnaw tuh akyh; ccungccaw hoylei hae paw nynh tuanaw pyakupaw tuh hynhupaw nynh thua.

⁶Ccungccaw hoylei hae paw bya nynh ccungccaw chia khylan a buhkhaw, thuasalama miding hae bya nynh tuh minmin kha a khum hae.

⁷Ccungccaw hoylei hae paw tuh khuliakuh hae zah, phe a zo hae, thuasalama miding hae inn tuh tynkaring lan a thadyn cih.

⁸Ccungccaw tuh hawnaw thyhte thehoynaw ccou athua, thuasalama a thinlung hoyleipaw tuh a theihrya hae.

⁹Aerua a hoi lei pite amaw te amaw a hangsakuhpaw laeze a dothatheih hae paw, amaw te amaw rya a lawkuhpaw tuh ahoyhua.

¹⁰Miding nynh tuh a sahiin-awvaw nynh ahobounaw kha a nypya, thuasalama ccungccaw hoylei hae paw kya-e thawccinaw tuh rysawthyanaw nynh thua.

¹¹A laephi kya rya a lawkuhpaw tuh looh patae a hoi, thuasalama ccungkia leipaw ryalaw kya ccyh a thangsah hanpaw tuh mingaee nynh thua.

¹²Ccungccaw hoylei hae paw nynh a duaa hae paw tuh hoyleinaw raepaw kha nynh thua, thuasalama miding tharui nynh tuh thae kha a thae.

¹³Ccungccaw hoyleipaw tuh a munglae seinaw keiccuze kaang a kae, thuasalama miding tuh vawsawnaw kyate a lue.

¹⁴Ccungccaw tuh khalang kya-e thae liate ahoypaw uccaw hae khate vueso lan a um, ccungccaw tuh thawzung te rya a law mee kha a mue cih.

¹⁵Mingaee nynh tuh a cyipaw kha akyh cite a tua, thuasalama mihawpaw nynh tuh tuanaw pyapaw kha a lawku.

¹⁶Mingaee nynh tuh a thinrianaw kha palou a langsaku, thuasalama mihawpaw nynh tuh maethyanaw kha a khawsung.

¹⁷Byaccing a hopaw nynh tuh ahmepaw ccaekia kha a khan, thuasalama ahme leipaw ccaekia nynh tuh hynbya kha a ho.

¹⁸Tuase leite hopaw bya tuh ccezung te thuingpaw te nynh aloku, thuasalama mihawpaw bya nynh tuh dannaw kha a thuakhae.

¹⁹Zyn lan umpaw munglae tuh zungzae atyn, thuasalama ahynpaw munglae tuh sosoh rou nynh atyn.

²⁰Hynbya tuh hoyleinaw khua a khan hae paw thinlung kya nynh a um, thuasalama daenaw elang tuanaw a pya hae paw tuh lungtuanaw a hoi hae.

²¹Miding hae tungvaw kya vawsawnaw thua khyh, thuasalama ccungccaw hoylei hae paw tuh vawsawnaw te abeih cih hae.

²²Ahynpaw munglae tuh BAWIPAW hanlan anungsikuh, thuasalama lungzinaw a hoi hae paw tungvaw kya a lungrythua.

²³Mihawpaw tuh a hawnaw kha a thuruh, thuasalama mingaeepaw thinlung nynh tuh ngaeenaw kha a langsahku.

²⁴Ryalaw a zuakuhpaw ccungccaw nynh a uk cih, a thawnawpaw tuh nangsekute ryalawnaw kya nung athua cih.

²⁵Lungriathaenaw nynh ccungccaw lung kha tuasah khyh, thuasalama bya hoypaw nynh tuh ccungccaw lung a tuasah.

²⁶Miding nynh tuh a ban hae kha tuanaw hoypaw a pya hae, thuasalama ccungccaw hoyleipaw laanpi nynh tuh a cciakhaesei hae.

²⁷A thawnawpaw tuh saw dee zah a kaw zemah rangkuh boi khyh, thuasalama a zuakuhpaw tuh aphutepaw sisua kha a mue.

²⁸Dingnaw laanpi kya hiinnaw a um, tuh-e laanpi zuinaw kya chinaw um khyh.