Read Zotung Chin PHUNGTANGBYA 16 Bible Online

PHUNGTANGBYA 16 - Zotung Chin bible

PHUNGTANGBYA 16

¹Ccungccaw nynh a thinlung kya khuakhankunaw kha a hoi, thuasalama lae nynh a hopaw tuh BAWIPAW kyate nynh thua.

²Ccungccaw nynh tuh a cyipaw balyn kha ahoy cite a muih, thuasalama BAWIPAW nynh tuh thinlung kha a do.

³Na ryalaw kha BAWIPAW kalan ap lah, na paccynkunaw hae tuh atyn cih hae.

⁴BAWIPAW nynh atyn-are kha mimaw eenaw raveih hanlan a rae, ccungccaw hoylei hae paw heize vawsawnaw nin hanlan a rae hae.

⁵Alysakuhpaw balyn tuh BAWIPAW hanlan anungsikuh hae paw nynh thua; minmin tuh detahnaw mue leite um lan khyh hae.

⁶Lungzinaw te zyn lan umnaw liate seinaw kha ngaethya athua, BAWIPAW rawrinaw liate ccungccaw nynh hoyleinaw kha a sibia.

⁷Ccungccaw cyisahnaw nynh BAWIPAW kha a lungry he thuasah te, a rhaw hae khate heize a ccawsaku hae.

⁸Dingnaw te muepaw uccaw beihtaraw tuh dingleinaw te muepaw uccaw patae laeze ahoyhua.

⁹Ccungccaw nynh tuh a ccianaw lanpaw laanpi kha a thinlung kya khua a khanku, thuasalama laandy a hoeitu tuh BAWIPAW nynh thua.

¹⁰Pachia hopaw byapaenaw tuh siapharan munglae kya a um, bya a pianaw kya a khalang tuh sei khyh.

¹¹Ahmepaw khinlung te zawccu tuh BAWIPAW kya-e nynh thua, zaw lungkhu umpaw khinlung balyn tuh amaw nynh a raepaw nynh thua.

¹²Hoyleinaw rae hynh siapharan hae elang anungsikuhpaw nynh thua, pawccecize bawi haungnaw tuh dingnaw liate tynsah athua.

¹³Adingpaw mung tuh siapharan nynh a rypaw thua zah, hmerarih lan a ho hae paw kha a sungsah hae.

¹⁴Siapharan thinrianaw tuh chinaw a zeccuetu nynh thua, te mihaw hae miakaw nynh tuh siapharan lung kha a hoysah hae.

¹⁵Siapharan maesue hoynaw kya hiinnaw a um, a thawccinaw tuh hawkhuaa a rawsahpaw maeking te nynh aloku.

¹⁶Hawnaw muepaw tuh sui muepaw laeze ahoyhua, nythyanaw muepaw tuh ngunphua muepaw laeze poku lanpaw nynh thua.

¹⁷Miding nynh a zuipaw laanpi tuh hoyleinaw kha a sibia; a laanpi kha hoyte a dokuhpaw tuh a hiinnaw kha a khynsaku.

¹⁸Lysakunaw tuh ronaw laeze laan a mawty, hangsahkunaw tuh ccawbungnaw laeze laan a mawty.

¹⁹Ryachi hae laku kya zakawsangsakute umpaw tuh a lysakuh hae paw ryte mungkute luadepaw uccaw neekupaw laeze ahoyhua.

²⁰Ccangpyanaw kha hoyte a ngaepaw tuh hoynaw a mue cih, BAWIPAW a doliakuh hae paw tuh lungtua hae paw nynh thua.

²¹Ahawpaw thinlung tuh uccaw a laesah thyapaw nynh thua, a-epaw bya nynh ccungccaw a soih kho.

²²Hawnaw a hoipaw hanlan hawnaw tuh hiinnaw tuidy nynh thua, thuasalama mingaee hae kha mih ngaeenaw nynh de a tah hae.

²³Mihawpaw thinlung nynh tuh a munglae kha thuihei zah a hopaw bya tuh soih khonaw houh a hoi.

²⁴A-epaw bya tuh khoilutui te nynh aloku, muisaw hanlan e zah pyn hanlan dannaw nynh thua.

²⁵Ccungccaw nynh ahmepaw laanpi cite tuapaw kha, athangnaw tuh chinaw lang a cceihpaw laanpi nynh thua.

²⁶A vuelawpaw ryalahtu nynh amaw hanlan rya a lawku; a vuelawnaw nynh amaw hanlan ryalaw lan a tuhou.

²⁷Ccungkia leipaw nynh tuh hoyleinaw kha aruh lante paccynkuh zah, a hopaw bya tuh aruapaw maee te nynh aloku.

²⁸Thethya a hopaw nynh pekunaw kha pazaesakuh zah, lawtypaw bya a hopaw nynh ruiban hoy hae paw kha a phia hae.

²⁹Apuathopaw ccungccaw nynh a innpaw hae kha soih hae zah, laanpi ahoy leipaw kalan a cciakhae hae.

³⁰Mit a masipahpaw ccungccaw tuh hoyleinaw a paccynpaw nynh thua, a mung a supahpaw ccungccaw mah hoyleinaw a thuakhaepaw nynh thua.

³¹Sang apawpaw tuh phu-enaw bawilukhung nynh thua; adingpaw hiinnaw nynh tuh-e tuh a mue.

³²A lungsaepaw tuh a thawsaepaw laeze ahoyhua, thindynnaw a synkuh khopaw tuh khuapi a taetupaw laeze ahoyhua.

³³Ccungthydungnaw kha mih angkizaw lungkhu khe a rae hae, thuasalama byapaenaw tuh BAWIPAW kya-e nynh thua.