Read Zotung Chin PHUNGTANGBYA 17 Bible Online

PHUNGTANGBYA 17 - Zotung Chin bible

PHUNGTANGBYA 17

¹Inn phe beihpaw poi tuanawpaw kha pekute ae laeze daebabi lante buhdangpaw lung kheit ae tuh ahoyhua.

²Ahawpaw see nynh maethyanaw a thuakhaepaw ccaaw kha a uk cih zah, uno lu kheit hawte rho a ccoubua cih.

³Sui te ngun tuh maee te syntawtua athua, thuasalama thinlung tuh BAWIPAW nynh a syntawtua.

⁴Hoyleinaw a raepaw nynh hoyleinaw bya kha a ngae; a hynpaw nynh hynbya kha a ngae.

⁵A ryachipaw kha a theihryapaw tuh a Raetupaw kha a saryapaw nynh thua, milae nynh vawsawnaw a tung ze, a lungtuapaw tuh detahnaw ing leite um lan khyh.

⁶Mintaw hae tuh ataw hae paw kya-e bawilukhung nynh athua hae, ccaaw hae phu-enaw tuh mih nung mih paaw hae kha nynh thua.

⁷Bya hoypaw tuh mingaee te ngaekuh khyh, hynpaw bya tuh uktu te ngaekuh ccaccing khyh.

⁸Pyaruh tuh a pyatupaw mitmuihnaw kya mitleih lung te nynh aloku, mih mae a hawinaw lang hae miakaw kya mih laan mih sui a ua.

⁹Milae cyiseinaw kha a khawsungpaw tuh sungsakunaw kha a tynsah, thuasalama milae thethya a hopaw tuh ruiban te phiakunaw kha a rae.

¹⁰Mingaeepaw kha vae za kheit buapaw laeze, mihawpaw kha vae kheit thuiheipaw tuh a thanehua.

¹¹Ccungccaw hoyleipaw nynh rhawthonaw kyalya kha a ccung, a rysawthahpaw zeccuetu kha minmin kalan sawnua athua cih.

¹²Mingaeepaw a ngaee lyate tungku laeze, a taw zopaw vong te tungkupaw tuh ahoyhua.

¹³Ahoypaw kha athahpaw te a liarupaw ccungccaw tuh a inn kyate hoyleinaw phiakuh boi lan khyh.

¹⁴Pekunaw athotakawnaw tuh tui tungnawpaw avihpaw te nynh aloku; tukeiccuze pekunaw a um mawkhe zya umtaw.

¹⁵Ccungccaw hoyleipaw kha daangsahpaw te midingpaw kha seisahpaw tuh parouh mawte BAWIPAW hanlan anungsikuhpaw nynh thua.

¹⁶Mingaee tuh hawnaw kha ccangku a ry leipaw thua zah, hawnaw renaw lanpaw amee kha a kuih kya pawccemou a mue cih?

¹⁷Ruiban nynh tuh sungsakunaw kha zungzae a langsaku, u te neitaw tuh vawsawnaw kha neethungku lan nynh apuiku.

¹⁸A innpaw hanlan aamahkhanpyakute bya a kinpakuhpaw tuh mingaee nynh thua.

¹⁹Cyiseinaw kha a sungsahpaw tuh pekunaw a sungsahpaw nynh thua, a thuakaw kha a hangsah thungpaw tuh ronaw a ccungpaw nynh thua.

²⁰Thinlung akoupaw tuh hoynaw mue khyh, Ahynpaw ccungccaw tuh vawsawnaw lungkhu lang a ccah.

²¹Ccaaw angaeepaw a saahkuhpaw tuh vawsawnaw a tung; mingaeepaw a nung a paaw hae tuh lungpawnaw hoi khyh hae.

²²Alungtuapaw thinlung tuh isei hoypaw nynh thua, thuasalama lungronaw nynh ru kha a rousah.

²³Ccungccaw hoyleipaw nynh byading laanpi kha ro khylan pyaruh kha a lawku.

²⁴Mihawpaw nynh tuh hawnaw kalan khe nynh a do, thuasalama mingaeepaw mit tuh laephi athangnaw langkhe nynh a do.

²⁵Angaeepaw ccaaw hae tuh mih paaw hanlan ngaethyanaw thua zah, a saahtu hae paw mih nung elang lungriathaenaw nynh thua.

²⁶Seinaw a hoi leipaw kha detah tuh hoy khyh; ccungccaw hoypaw kha a dingnaw tungvaw kya ziapaw tuh hoy khyh.

²⁷Nythyanaw a hoipaw tuh byaho a synkuh, daebabi lan a umpaw tuh nythyanaw a hoipaw nynh thua.

²⁸Mingaeepaw nynh heize yccae leite a um zetuh, mihawpaw lang a ria hae; a mung a myhpaw kha mah mihawpaw langte a tua hae.