Read Zotung Chin PHUNGTANGBYA 2 Bible Online

PHUNGTANGBYA 2 - Zotung Chin bible

PHUNGTANGBYA 2

¹Ka ccaaw, ka bya kha lawkute ka kawbya hae kha na lungkhu kya na ccykekuh zah,

²hawnaw kalan na nakaring tuakute nythyanaw kalan na thinlung kha na pya ze thuasah,

³akhupaw bya kha na ko ccaccing zah, nythyanaw hanlan na roi na saw ze thuasah,

⁴hawnaw kha ngun hawte na ccung zah, thuruhpaw sisua hawte na ccung ze thuasah

⁵BAWIPAW rawrinaw kha na nyh cih zah Pachia nynaw kha na muih cih.

⁶Pawccecize BAWIPAW nynh tuh hawnaw kha a pya hae, nynaw te thaethyanaw tuh a khalang kyate nynh yn thua.

⁷Miding hae hanlan hawnaw hoypaw kha a ccakhungpya hae; ccaenaw um lei lante a cceih hae paw hanlan aning tuh khawriaphua nynh thua.

⁸Byading laanpi kha phang rin zah alungzipaw a ccungccaw hae laanpi kha a khynsahpya hae.

⁹Tetuh dingnaw, byading, laesahku leinaw te laanpi hoypaw miakaw kha na nyh cih;

¹⁰pawccecize hawnaw tuh na thinlung kalan a tee cih zah, nynaw tuh na thinlung hanlan lungtuanaw athua cih.

¹¹Hawnaw nynh ae rin cih zah nythyanaw nynh ae thungkhaw cih.

¹²Hoyleinaw laanpi, bya hoyleipaw a ho hae paw,

¹³mohnaw laanpi zui khylan laan dingpaw a vua hae paw,

¹⁴hoyleinaw raenaw kya mih lungpaw zah ahoy leipaw ccouseikunaw kya mih lungrythuapaw,

¹⁵mih laanpi tuh kou zah mih cyisahnaw kya a thyaruh hae paw balyn kyate nang kha ae khum cih.

¹⁶Nopi hoyleinung, nawpali lan byahothyapaw ohhuanung,

¹⁷a zawthaw lya-e a mungkuh hae paw kha vua zah a Pachia byakinnaw a ningpaw nopi kyate ae khum cih;

¹⁸pawccecize a laanpi[1] tuh chinaw kalan khe cceih zah, a zuipaw laanpi tuh michi khua langkhe nynh a ccia;

¹⁹tuh-e nopinung kalan a cceih hae paw tuh papin ki vae khyh hae, hiinnaw laanpi kya mah thua vae khyh hae.

²⁰Tukeiccuze ccungccaw hoypaw hae laanpi kya cceih lah, miding hae laanpi kha zuitua.

²¹Pawccecize miding hae tuh hynh-e ram kya khua a sah cih hae zah, seinaw hoi leipaw ccungccaw hae tuh e ram kya a um cih hae;

²²thuasalama ccungccaw hoylei hae paw tuh ram kyate maemih athua cih hae zah, mih lungzi lei hae paw tuh ram kyate ccaring vua athua cih hae.