Read Zotung Chin PHUNGTANGBYA 23 Bible Online

PHUNGTANGBYA 23 - Zotung Chin bible

PHUNGTANGBYA 23

¹Uktu bawi ryte aekheih lan he na haung ze, na malang umpaw kha hummou athua cipaw hoyte la do,

²eih a ae khopaw ccungccaw na thua ze, namaw te namaw kha na lohtharue kyakhe tangpaw kha nungde.

³Uktu bawi kya-e looh athuapaw kha duaa nan, pawccecize tuh-e looh tuh lingnawpaw looh nynh thua.

⁴Hoirum khylan eih reihkuh kaesy nan; umtaw thya nawlan hawsakuh.

⁵Na mit nynh hoirumnaw kha he a do tuh, phe azo vae; pawccecize vaawlui lang a zoupaw mosi hawte a sake kha daw kangmaw zah a zouthya.

⁶A sithahpaw kya-e looh kha ae nan, a looh athuapaw kha duaa nan;

⁷pawccecize na lohtharue kya sangrua hawte athua cih. “Ae lah niatua hei,” ae cipah cih; thuasalama tuhcite ae hopya rypaw thua khyh.

⁸Na ae vae paw looh beihtaraw kha bua na loh cih zah, na lungtuanaw bya kha alakaw lan a tang cih.

⁹Mingaee nynh a thaenaw khe byaho nan, na hopaw hawnaw bya kha pawlangria lan khyh.

¹⁰Langmawlya e syntawnaw lungbing kha la nue nan, ngawraw hae loo kha la lua nan hae,

¹¹pawccecize minmin a shawkhawtupaw tuh a thawsaepaw thua zah, nang kha rawsete mih bya kha a pankhae cih hae.

¹²Na thinlung kha ccangpyanaw kalan khe pyatua lah, na nakaring kha hawnaw bya kalan khe tuaku tua.

¹³Imua kha ccangpya leite um nan, ccungngue te na bua ze, chih lan khyh.

¹⁴Imua kha ccungngue te na bua ze, a hiinnaw kha michi khua kyate na khumpaw nynh thua.

¹⁵Ka ccaaw, na lunghaw zetuh, kae mah ka lungtua cih.

¹⁶Na mung nynh akyhpaw kha a ho zetuh, ka lungtua cih.

¹⁷Misei hae tungvaw na eiung nan sah, BAWIPAW rawrite zungzae la um.

¹⁸Malang ccyh tuh a um ccaccing keiccuze, na ngaehoinaw kha la zosah nan.

¹⁹Ka ccaaw, ngae lah hawsaku tua, na thinlung kha akyhpaw laanpi kya zuisah tua.

²⁰Misutui myarya neih hae paw ryte thuasah, saw myarya ae kho hae paw ryte thuasah mungkuh nan oh;

²¹pawccecize eih a neihpaw te aepaw eih a ccopaw tuh a ryachi accih cih, myarya a ih khopaw tuh boeining apuepaw kha a lawkuh cih.

²²Nang ae saahpaw na paaw bya kha ngae lah, na nung kha he a taw vae ze la theihrya nan.

²³Byaccing kha rekuh lah, zua nan vae; hawnaw, thuiheikunaw te nythyanaw kha rekuh hae.

²⁴Midingpaw a paaw tuh myaryamaw a lungtua cih; ahawpaw ccapaw a saahkuhpaw tuh a ccapaw tungvaw kya a lungtua cih.

²⁵Na nung te na paaw kha mih lungtuasah hae; nang ae saahkuhnung na nung kha a lungpawsah tua.

²⁶Ka ccaaw, na thinlung kha yn pya lah, na mit nynh ka laanpi hynh hoyte dokuhsah.

²⁷Pawccecize ohhuanung tuh akhupaw hunghua nynh thua; a ccouseikuhpaw zu tuh abypaw tuisung nynh thua.

²⁸Damiah hawte ccungccaw kha buhthya zah, a ccouseikuhpaw pise kha a lungsah thung.

²⁹Hummou lungvawsaw te a um? Hummou a ngaethah? Hummou a pekuh hae paw um? Hummou byalungnaw a hoi? Hummou akonglang um leite vaemaw a mue? Hummou a mit sedadae lang a um?

³⁰Tuh-e hae tuh misutui khaw cia neih hae paw, amynkhuhpaw te pykuhpaw misutui a ccungpaw ccungccaw hae kha nynh thua hae.

³¹Banang lungkhu kya asepaw, awrarih lan aw zah, nawpali lan a luabungpaw misutui kha la do nan.

³²Nyathyakou tuh hupaw hawte khyhthya zah, huparepaw hawte sy a hoi.

³³Na mit nynh paleihpanawpaw uccaw kha a muih cih zah, na thinlung nynh tualitua-aepaw bya kha a ho cih.

³⁴Nang tuh rili ngaelung a ihpaw, sanphalung kya boei zonawpaw tung adungparyh kya a ihpaw hawte na thua vae cih.

³⁵“Minmin nynh yn bua hae, thuasalama ka ccisah khyh; kae kha yn thung hae zemah ka nyhkuh khyh. Hohtuhmou ka thaekuh cih? Ccangpaw niapaw kha bua ka ccungkuh cih,” cite na ho cih.