Read Zotung Chin PHUNGTANGBYA 24 Bible Online

PHUNGTANGBYA 24 - Zotung Chin bible

PHUNGTANGBYA 24

¹Ccungccaw hoylei hae paw kha eiung nan hae, minmin ryte mungkuh ry nan,

²pawccecize mih thinlung nynh puathonaw kha tua zah, mih mung nynh ming hae vawsaw pyanaw bya kha a ho.

³Hawnaw liate inn tuh sak thua zah, nythyanaw liate inn tuh atyn;

⁴nynaw liate innkhaan hae tuh aphutepaw te apuithyapaw sisua hae khate phe a beih.

⁵Mihawpaw tuh a thawsaepaw laeze a thunghua, nynaw a hoipaw tuh thawzung a hoipaw laeze a thunghua;

⁶pawccecize a haw hae paw khuakhannaw liate rhaw kha na tuk kho zah tuanaw pyatu patae a umnaw kya taenaw a um.

⁷Mingaee hae hanlan hawnaw tuh myaryamaw ahang; khua koikua kya byaho ngan khyh hae.

⁸Hoyleinaw rae lan a paccynkuhpaw tuh vawsawnaw a raetu cite ko athua cih.

⁹Ngaeepaw khuakhannaw tuh seinaw nynh thua, sarya a mangpaw tuh ccungccaw balyn hanlan anungsikuhpaw nynh thua.

¹⁰Vawsaw tung lya na rhawthya zetuh, na thawzung azya.

¹¹Chia lan a cciakhae hae paw kha la luesah hae, chia lan a cciakhae hae paw kha la khum hae,

¹²tuhte cyi leite nang nynh, “E paw hynh ka nyh khyh,” na ci lanze, tuh-e tuh thinlung a nyhtupaw nynh thaethya lan khyh tou? tuh-e tuh nang kha phang ae rintupaw nynh nyh lan khyh tou? Aning tuh ccungccaw balyn kha mih cyisahnaw thyhte a sangru cih hae paw thua khyh tou?

¹³Ka ccaaw, khoitui kha niatua, athuapaw nynh thua, adaw kyate accawpaw khoitui tuh na khalang kya a-epaw nynh thua.

¹⁴Hawnaw tuh na hiinnaw hanlan tuh-e hawte nynh thua cipaw nyh; hawnaw na hoi zetuh, na hanlan malang ccyh ngaehoinaw a um cih zah, na ngaehoinaw tuh roh lan khyh.

¹⁵Ccungccaw hoyleipaw nynh midingpaw inn kha a dokhaw hawte la dokhaw nan; midingpaw nynh a umnawpaw hmin kha la ropah nan;

¹⁶pawccecize midingpaw tuh vae sari a khuliaku zemah bua a thokuh cih; thuasalama ccungccaw hoyleipaw tuh vawsawnaw keiccuze a khuliakuh cih.

¹⁷Na rhaw hae nynh a khuliaku hae ze, na lungtua nan sah, a thy a pawku hae zemah, na lungpaw nan sah,

¹⁸tuhkhyhze tuh BAWIPAW nynh tuh-e tuh a muih cih zah a lunghoy lan khyh, te a thinrianaw kha minmin kyate a maeleihsei cih.

¹⁹Hoyleinaw a rae hae paw keiccuze na thinphang nan sah, ccungccaw hoylei hae paw kha eiung nan hae;

²⁰pawccecize ccungccaw hoyleipaw tuh ngaehoi lanpaw malang ccyh hoi khyh, ccungccaw hoyleipaw maeekhua tuh a chih cih.

²¹Ka ccaaw, BAWIPAW te siapharan raw kha ritua, minmin kaw kha la ngaetua;

²²pawccecize minmin kyate ronaw tuh vaekheitmawte yn thua cih, minmin nynh a thuakhae kho hae paw ronaw tuh hummou a nyh?

²³E hae hynh mah ahaw hae paw bya nynh thua: Byapianaw kyaze maedo tuh hoy khyh.

²⁴Ccungccaw hoyleipaw kha, “Nang tuh miding nynh na thua,” cite a hopaw tuh ccungccaw hae nynh thyalaw cih hae zah, minphuin nynh a hua cih;

²⁵thuasalama ccungccaw hoyleipaw kha pe zah a thuiheipaw tuh a lungtua cih zah ahoypaw hythuanaw kha a ccou cih.

²⁶Ahmepaw bya te khung tuh ruiban hoy ccaccing thuanaw kha a langsakuhpaw nynh thua.

²⁷Atolang khe na ryalaw kha paccynku tua, loo kyakhe namaw hanlan atyn-are kha paccyn tytua; tukoute na inn kha sakku tua.

²⁸Akonglang um lei pite na innpaw kha rawsete ccaekia lang tang nan, na mung te hynbya ho nan.

²⁹“Milae nynh ka tungvaw a cyi hawte milae tungvaw ka cyihru cih; milae nynh a cyi thyhte ka liaru cih,” cite ho nan.

³⁰A thawnawpaw ccungccaw loo pe te a ngaeepaw kya-e misu khokhu pe khe po ka cceih zah,

³¹hinpaw nynh pong a po thin hae paw, hinpaw ku nynh laephi pong a bongpaw te a lungrua atingpaw kha ka muih.

³²Te khah-e ka muihpaw kong kha ka tua; ka do zah thuiheinaw kha ka mue.

³³Sosoh na ih, sosoh na ngawphukuh zah kuih lepiakute sosoh na haeung lyakhe,

³⁴ryachinaw tuh miruh hawte thuasah, hobounaw tuh zunghe ccyngkuhpaw rhawkawpaw hawte thuasah na tungvaw yn thua cih.