Read Zotung Chin PHUNGTANGBYA 25 Bible Online

PHUNGTANGBYA 25 - Zotung Chin bible

PHUNGTANGBYA 25

¹E hae hynh Judah siapharan Hezekiah a ccungccaw hae nynh a zei pathy hae paw Solomon phungtangbya nynh thua.

²Pachia phu-enaw tuh uccaw hae thuruhpaw hynh nynh thua, thuasalama siapharan phu-enaw tuh uccaw hae a langsakunaw hynh nynh thua.

³Vaawlui tuh hang zah, laephi tuh akhu hawte, siapharan thinlung tuh akaw-aleih ny kho um khyh.

⁴Ngun kya-e a ia kha vua oh lah, sivawsuhpaw nynh banang rae nawlan uccaw a mue cih;

⁵siapharan malang kyate ccungccaw hoyleipaw kha cciakhae oh lah, a bawi haungnaw tuh dingnaw te atyn cih.

⁶Siapharan malang khe sawtuanaw la ccungkuh nan, alesaepaw ccungccaw hae nynh a umnaw hae kyakhe la thadyn nan;

⁷pawccecize, “Hynhlang hin yn haung,” cikupaw tuh, “Nang laeze a piccan huapaw kha phiapakuh,” cipaw laeze ahoyhua.

⁸Na mit nynh a muihpaw kha byapiazung lang arangte thuakhae nan, pawccecize na innpaw nynh maethya ae law lanze athangnaw kya pawtemou na cyih cih?

⁹Na innpaw te byathan na hoi oh paw kha naemaw te naemaw ccawkunaw rae oh; milae byaru kha la phy nan;

¹⁰tuhkhyhze tuh aning nynh he a thae te, maethya ae lah cih zah, na thethyanaw tuh thang vae lan khyh.

¹¹Ho lan accannaw kya hopaw bya tuh ngun abawng lungkhu umpaw sui athae te nynh aloku.

¹²Ahawpaw thuiheitu bya tuh a ngae rypaw hanlan sui kuihpu khyhze sui uccaw te nynh aloku.

¹³Alungzipaw zeccuetu tuh a sawtu hae hanlan loohrue ccyh e vuiraw akyaapaw te nynh aloku.

¹⁴Lasung kae pya cih cite pookuh zah a pya leipaw tuh khuaaratui a umbia leipaw maeking te khivae hawte nynh thua.

¹⁵Lungsaenaw nynh uktu bawi kha a soihbia kho, byanepaw nynh ru kha a khya kho.

¹⁶Khoitui na muih ze, na byn khin te kyalya neih, eih lung na nia ze, na luaphukuh cih.

¹⁷Na innpaw inn lang atu te atu paebua nan, tuhkhyhze tuh na innpaw nynh phe ae khin cih zah ae hua cih.

¹⁸A innpaw kha rawsete ahme leipaw ccaekia a khanpaw tuh tungbang, thaloi te ahepaw the te nynh aloku.

¹⁹Vawsaw tung lyaze alungzi leipaw ccungccaw kha doliaku tuh ahoy leipaw haw te akhoupaw ccu hawte nynh thua.

²⁰A ngaethahpaw kha hlaw a sahpahpaw tuh khuacci lya uccaw a khahpaw te, vaemaw kya loi a thuhpaw te nynh aloku.

²¹Na rhawpaw kha a vuelaw ze, ae lanpaw looh la pya; a tuihaw ze, nia lanpaw tui la pya;

²²tuhte na cyi zetuh, a lu vawlan maee-e na pumpaw athua cih zah, BAWIPAW nynh lasung ae pya cih.

²³Thahlang e khisan nynh khuaaratui kha yn thuakhae hawte, thethya a hopaw lae nynh thinrianaw kha a thuakhae.

²⁴Accohkuh thyapaw zu ryte inn lungkhu umlae tuh innccukaly apaki lang umpaw tuh ahoyhua.

²⁵Asawnaw ram kyate yn thuapaw thehoypaw tuh tui a hawpaw hanlan tui kyaapaw hawte nynh thua.

²⁶Ccungccaw hoyleipaw malang a seipaw miding tuh anuihpaw tuisung, athupaw tuidy hawte nynh thua.

²⁷Khoitui patae niapaw tuh hoy khyh, tuhawte sawtuakunaw eih ry kaesypaw tuh hoy khyh.

²⁸A thinlung a sungkuh kho leipaw tuh koihlupaw lungrua ting zah uahalaepaw khua te nynh aloku.