Read Zotung Chin PHUNGTANGBYA 26 Bible Online

PHUNGTANGBYA 26 - Zotung Chin bible

PHUNGTANGBYA 26

¹Hawnin ccyh e vuiraw hawte thuasah, loohrue ccyh e khuaaratui hawte thuasah, sawtuanaw tuh mingaee hanlan ngaekuh khyh.

²Rihthya tuh khiavuikuh zah, ccipae tuh a zou bungthung hawte, akonglang um leipaw thyalawnaw tuh pawlang tang khyh.

³Marang hanlan ccungngue, lann hanlan rangtei thua zah, mingaee ke hanlan tuh ccungngue nynh thua.

⁴Mingaee kha a ngaeenaw thyhte byakhung nan, tuhkhyhze tuh nang mah a ngaeepaw lang na tangsei cih.

⁵Mingaee kha a ngaeenaw thyhte bya la khung, tuhkhyhze tuh ka haw cite a tuakuh sei cih.

⁶Mingaee kha bya a tawpaw tuh amaw ccu kha thoh pae lan a baekuhpaw thua zah, vawsawnaw a tung cih.

⁷Mingaee khalang kya-e phungtangbya tuh asaekuh huatawpaw ccukhoupaw ccu te nynh aloku.

⁸Mingaee kha sawtuanaw pyapaw tuh zae kyakhe lungpyng kha kyngdepaw te nynh aloku.

⁹Mingaee khalang kya-e phungtangbya tuh aruipaw ccungccapaw kuih athuingpaw hinpaw te nynh thua.

¹⁰A pe po cceihpaw mingaee khyhze a ruipaw kha ryalaw lan a hohkuhpaw ccungccaw tuh ccungccaw miakaw vawsaw a tungsahpaw thekawthyapaw te nynh aloku.

¹¹A ngaeenaw kha buabua a langsakuhpaw mingaee tuh, a lua a kinuapaw ui te nynh aloku.

¹²Amaw mitmuihnaw kya ka haw a cikuhpaw laeze mingaeepaw hanlan ngaehoinaw a umhua.

¹³Thawnawpaw nynh, “Inn atolang chindeih a um! laanpi kya chindeih a um!” a ci.

¹⁴Thuakaw nynh thuakawtung kya palei a miaku hawte thawnawpaw tuh a ikhung vawlan palei a paleihkuh bungthung.

¹⁵Thawnawpaw tuh a kuih kha pake lungkhu lang pu zah, a khalang lungkhu lang bawku lan sanmah hua khyh.

¹⁶Hawnawte bya a khung kho hae paw lu sari laeze, thawnawpaw tuh amaw tuanaw kya a hawhua.

¹⁷Milae pekunaw kya a thungkuh buapaw tuh amaw ccia lan cceihpaw ui nakua kha a kyngpaw te nynh aloku.

¹⁸A innpaw kha ling zah, “Kae ccyasahpaw khaw tou!” cite a hopaw tuh maee-e, the te chinawpaw zunghe khate a kawpaw a angaeepaw hawte nynh thua,

²⁰Maeething a um khyh ze, maee a chi hawte, thanthya hokunaw a um khyh ze pekunaw adae.

²¹Maeehue nynh maee-e esah zah, maeething nynh maee a ruasah hawte, peku a mangpaw nynh pekunaw kha a thuakhae.

²²Thanthya a hotupaw bya tuh looh athuapaw te nynh aloku; tuh-e bya tuh pyn lungkhu lang po a tee.

²³Nawpali lan byahothya zah a thinlung hoyleipaw tuh asi thuhkuhpaw laephi ang te nynh aloku.

²⁴Ccungccaw huanaw a hoipaw nynh tuh a bya kha kou a hosakuh thya, thuasalama a lungkhu kya ccungccaw lingnaw kha nynh phang a poi;

²⁵aning nynh thawcci o-ang lante bya a ho ze la zyn nan, pawccecize a thinlung kya anungsikuhpaw uccaw ccangsari a um;

²⁶A thinlung kya umpaw huakunaw kha hynnaw te phang a thuruh zemah, a hoyleinaw tuh ccungccaw zapi kya alangkuh mamin cih.

²⁷Hunghua a karouhpaw tuh tuh-e hunghua lungkhu lang a ccah cih, lung a toupaw tuh tuh-e lung nynh amaw kha a tou thin cih.

²⁸A hynthyapaw lae nynh tuh amaw nynh vawsaw a pya hae paw kha a hua hae, pookunaw bya a hothyapaw khalang nynh ronaw kha a thuakhae.