Read Zotung Chin PHUNGTANGBYA 3 Bible Online

PHUNGTANGBYA 3 - Zotung Chin bible

PHUNGTANGBYA 3

¹Ka ccaaw, kae ccangpyanaw kha ning nan, na thinlung nynh ka kawbya hae hynh ccykekuh sah;

²pawccecize tuh-e hae nynh hiinshe saenaw te hiin hoynaw kha ae pya cih.

³Lungzinaw te zyn lan umnaw kha na kyate phiasakuh nan hae; tuh-e hae tuh na nging kyakhe oikuh hae lah, na thinlung lungphe kyakhe zeikuh hae.

⁴Tuhteze tuh Pachia te ccungccaw mitmuihnaw kya maehoynaw te minhoynaw na mue cih.

⁵BAWIPAW kha na thinlung balyn te doliakuh lah, na hawnaw khate la rinkuh nan.

⁶Na ccianaw laanpi takyh kya amaw kha nyh lah, na laanpi kha ae lawsahpah cih.

⁷Amaw mitmuihnaw kya ahawsakuhpaw la thua nan; BAWIPAW kha rih lah, hoyleinaw kha maetawkuh.

⁸Tuh-e tuh na ngesaw hanlan dannaw athua cih zah, na pyn hanlan isei athua cih.

⁹BAWIPAW kha na sisua te na voisahpaw athae balyn kya-e thaety khate sawtuanaw pyatua;

¹⁰tuhteze tuh na ccung-inn hae tuh phe abeih cih hae zah, na misu mianawpaw akhu hae tuh misutui te aleikuh cih hae.

¹¹Ka ccaaw, BAWIPAW thuiheinaw kha pawlangria leite um nan, ae thuihei ze na lungroh nan sah,

¹²pawccecize paaw nynh a lunglahpaw a ccapaw kha a thuihei hawte BAWIPAW nynh a sungsahpaw kha a thuihei.

¹³Hawnaw kha ccung zah a muihpaw tuh lungtuapaw nynh thua, nythyanaw a hoipaw mah a lungtuabua,

¹⁴pawccecize hawnaw kyate muepaw tuh ngun laeze hoyhua zah, hawnaw kya-e amia tuh sui laeze ahoyhua.

¹⁵Hawnaw tuh aphutepaw lung-awpaw laeze aphutehua zah, na rypaw balyn khate touse kho thua khyh.

¹⁶A ranglang kuih kyakhe hiinshe saenaw um zah, a voilang kuih kyakhe hoirumnaw te sawtuanaw a um.

¹⁷A laanpi tuh lungpawnaw laanpi thua zah, a laanpi balyn tuh daenaw nynh thua.

¹⁸Hawnaw a kyngkuh hae paw hanlan hawnaw tuh hiinnaw thingku nynh thua; hawnaw kha tynkaring lan a kyngkuh hae paw tuh lungtua hae paw nynh thua hae.

¹⁹BAWIPAW nynh hawnaw khate laephi kha rae zah, nythyanaw khate vaawlui kha a tynsah;

²⁰a hawnaw khate tui akhupaw kha phiasakuh zah, maeking nynh dangtui kha a ccawsah.

²¹Ka ccaaw, hawnaw hoypaw te nythyanaw kha na muihnaw kyate zuasah nan,

²²tuh-e hae tuh na muisaw elang hiinnaw athua cih hae zah, na nging hanlan ccaankunawpaw athua cih.

²³Tetuh na laanpi kya khyndadyh lan na cceih cih zah, na ccu tuh thykuh lan khyh.

²⁴Na haung ze rinaw na hoi lan khyh zah, na i ze na ithuathya cih.

²⁵Vaekheitmawte yn thuapaw siikunaw te ccungccaw hoylei hae paw kya athopaw khise kha rih nan;

²⁶pawccecize BAWIPAW tuh na zynkunaw athua cih zah, na ccu kha kaangkaenaw kyate ae khynsah cih.

²⁷Na kuih kya cyipya khonaw huhan a um ze, hoynaw cyipya lan accan hae paw kha cyipya leite la um nan hae.

²⁸Pya lanpaw mang na hoi pite na innpaw kha, “La cceih ccavae, bua nae thua cih, awkhualan kae pya cih,” cite la cipah nan.

²⁹Namaw doliakute na pe umpaw na innpaw tungvaw vawsawnaw pya lan la tuakuh nan.

³⁰Na tungvaw hoyleinaw a rae khyh lanze, akonglang um leite humhung te mah la pekuh nan oh.

³¹A puathopaw ccungccaw tungvaw na eiung nan, a laanpi pawpaw kha mah la pokuh nan;

³²pawccecize a ccouseikuhpaw tuh BAWIPAW hanlan anungsikuhpaw nynh thua, thuasalama miding hae tuh BAWIPAW nynh a zyn hae paw nynh thua.

³³BAWIPAW thyalawnaw tuh ccungccaw hoylei hae paw inn kya a um cih, thuasalama miding hae nynh a umnaw hae kha tuh hythua a pya.

³⁴Ccungccaw dothatheih hae paw kha BAWIPAW nynh dothatheih hae zah, zakawsangsakuh hae paw kha thaw a cci hae.

³⁵Mihawpaw tuh sawtuanaw a ccou cih, thuasalama a lungkhungpaw mingaeepaw tuh maethyanaw kha a mue cih.