Read Zotung Chin PHUNGTANGBYA 4 Bible Online

PHUNGTANGBYA 4 - Zotung Chin bible

PHUNGTANGBYA 4

¹Ccaaw hae, nae paaw thuiheinaw kha ngae oh lah, nythyanaw na hoi kho nawlan oh, hoyte ngae oh;

²pawccecize ahoypaw thuiheinaw kha kae pya oh, tukeiccuze kae ccangpyanaw oh kha vua nan oh.

³Ka paaw ccapaw ka la thua zah, ka nung mitmuihnaw kya nevyalyapaw te a sungsah huapaw ccapaw nynh ka la thua,

⁴ka paaw nynh yn ccangpah zah, “Ka bya hynh tynkaring lan kyngkuh; ka kawbya hae hynh zui lah hiintua.

⁵Hawnaw kha ccangku tua; nythyanaw kha ccangku tua; Ka khalang kya-e bya hynh ning nan lah, maetawkuh nan.

⁶Hawnaw kha vua nan lah, nang kha ae thungkhaw cih; hawnaw kha sungsah lah, nang kha ae rin cih.

⁷Masaty na ccangku lanpaw tuh hawnaw nynh thua; hawnaw kha ccangku tua, na ccangku lanpaw balyn kyaze nythyanaw kha ccangku tua.

⁸Hawnaw kha aphutesah lah, nang kha ae hangthung cih; tuh-e hawnaw tuh na pompaeku lanze sawtuanaw ae ccousah cih.

⁹Hawnaw nynh apuithyapaw haetapawsi kha na lu vawlan ae khungsah cih; apuithyapaw bawilukhung kha ae pya cih,” a cipya.

¹⁰Ka ccaaw, ka bya hynh ngae lah lawku tua, na hiinshe asae cih.

¹¹Hawnaw laanpi kha kae ccangpah vae zah, dingnaw laanpi lang kae cciakhae vae.

¹²Na ccia ze, pawpaw nynh mah ae khaw lan khyh zah, na ccue ze thykute na khuliakuh lan khyh.

¹³Thuiheinaw kha phang kyngkuh lah saw nan; hoyte rintua, pawccecize tuh-e tuh na hiinnaw nynh thua.

¹⁴Ccungccaw hoylei hae paw laanpi kya tee nan lah, hoyleinaw a rae hae paw laanpi kya cceihbua nan.

¹⁵Tuh-e tuh sibia lah, zui nan; tuin kyate maekuh lah, po cciatawtua.

¹⁶Pawccecize minmin tuh seinaw rae leite ih kho khyh hae; lukhakheit kha khuliasaku leite ih kho khyh hae.

¹⁷Pawccecize minmin tuh hoyleinaw looh kha ae hae zah, puathonaw misutui kha a nia hae.

¹⁸Thuasalama miding hae laanpi tuh ninthu cia houhouh a awpaw awkhua takaw e awnaw te nynh aloku.

¹⁹Ccungccaw hoylei hae paw laanpi tuh marae mohpaw te nynh aloku; a khuliaku hae ze pawkyamou kae thyku cipaw nyh khyh hae.

²⁰Ka ccaaw, ka bya hynh hoyte ngae lah, ka hopaw bya kalan hin na nakaring kha tuaku tua.

²¹Hynh-e hae hynh na mitmuihnaw kyate zosah nan; na thinlung kya ccykekuh hae.

²²Pawccecize tuh-e tuh a muih hae paw hanlan hiinnaw thua zah, mih pynsaw balyn dannaw nynh thua.

²³Na thinlung kha hoyte raeringtua, pawccecize tuin kyate nynh hiinnaw tuidy yn phyh.

²⁴Hynbya kha na khalang kyate sungkuh lah, thyaruhnaw bya kha na kyate ccaring vuatua.

²⁵Na mit nynh malang khe lawbabin lan dosah lah, na malang khe tahrarin lan phang dosah.

²⁶Na ccu nynh a kawnaw laanpi kha hoyte dokuh lah, na laanccia balyn tuh hoyte na cceih kho cih.

²⁷Voilang ranglang maekuh nan, na ccu kha hoyleinaw kyate maeleih tua.