Read Zotung Chin PHUNGTANGBYA 7 Bible Online

PHUNGTANGBYA 7 - Zotung Chin bible

PHUNGTANGBYA 7

¹Ka ccaaw, ka bya hynh ccykekuh lah, ka kawbya hae hynh na kya ccykuh hae;

²ka kawbya hae hynh zui lah hiintua, ka ccangpyanaw hynh na mitlungdy hawte phang rintua;

³na kuihdung kyakhe heedekuh lah, na thinlung lungphe vawlan khe zeiku tua.

⁴Hawnaw kha, “Ka ccianung,” ci lah, nythyanaw kha ruiban hoypaw cite kotua.

⁵tuh-e hae nynh nopi hoyleipaw kyate thuasah, nawpali lan byahothyapaw a ccouseikuhpaw zu kyate thuasah ae thungkhaw cih.

⁶Ka inn thanlan-aw kyate ka do zah,

⁷tuanaw a zya hae paw mino hae laku khe, tuanaw a hoi leipaw ccangvaepaw lu kheit kha ka muih,

⁸aning tuh tuh-e ohhuanung a umnaw laanpi atungkunaw pe langkhe po a cceih,

⁹tuh lya tuh zetepakaw riryngmoh ccyh, khuazi amoh ccyh nynh thua.

¹⁰Tetuh ohhuanung hawte ccaankuh zah thinlung ahynthyapaw nopinung nynh amaw kha a cciadue.

¹¹Tuh-e nopinung tuh a roi ccae zah, kawngae khyh; innvaw um leite a khiavuikuh;

¹²sosoh hin laanpi kya um zah, sosoh hin kungkunaw kya a um, te laanpi tungkunaw miakaw kyakhe ngawdo zah a um.

¹³Tuh-e ccangvaepaw kha kyng zah a myng, te maethya leite tuh-e ccangvaepaw kha,

¹⁴“Silawkunaw rae lanpaw ka hoi zah, atunin ka byakinkunaw kha ka ccingsah vae;

¹⁵tukeiccuze nang kha tungku khylan atu kae pou vae, nang kha lungthote kae ccung zah kae muih vae!

¹⁶Ka ikhung kha Izip ram e nebaleihpaw laaw te kuakuhpaw iphae apuithyapaw khate ka ccaan vae;

¹⁷amynkhuhpaw mura, aloes te sinnamon khate ka ikhung kha ka thuh vae.

¹⁸Yn cceih, awkhualan awkhua cia sungsakunaw te phe byn lan hoysah sih; sungsakunaw khate hoysah sih.

¹⁹Pawccecize ka vawpaw tuh innvaw um khyh; laansaw lang khua a ccong.

²⁰Phua kha zaw zung kheit te phukuh zah sawpaw sahpynglyn cia innvaw yn thua lan khyh,” a cipya.

²¹Soihnawpaw bya patae khate soih zah, nawpalipaw a byaho khate a nangse.

²²Tangnuapaw nynh saw theihtupaw kalan a ccia hawte thuasah, the nynh aring-akua a thuing mawlaezung

²³sazuh nynh kaang kalan a ccia hawte thuasah tuh-e ccangvaepaw nynh tuh-e nopinung kha a zui. Tuh-e ccangvaepaw tuh a hiinnaw a zosah cih paw kaang kha ny leite kaang lungkhu lang arangte a teepaw pavaw te nynh aloku.

²⁴Te atu, ka ccaaw hae, ka bya hynh ngae oh lah, ka mung kya-e bya hynh hoyte ngae oh.

²⁵Tuh-e nopinung umnaw laanpi langkhe nae thinlung kha maesakuh nan oh; a laanpi langkhe zuisei nan oh.

²⁶Pawccecize tuh-e nopinung nynh ccungccaw patae kha a khulia vae hae, te a chia hae paw tuh myarya alung vae.

²⁷A inn tuh chinaw khaan lang rungbung zah, michi khua lang a cceihpaw laanpi nynh thua.