Read Zotung Chin PHUNGTANGBYA 9 Bible Online

PHUNGTANGBYA 9 - Zotung Chin bible

PHUNGTANGBYA 9

¹Hawnaw nynh a kya-e tung tungsari kha suee zah, a inn kha a sakku vae.

²A sarangpaw hae kha theih zah, a misutui te a pyde vae, a ccaboi kha mah a phae vae.

³A ryalahtu nopi hae kha a saw vae hae, khua lungkhu ahang huanaw hmin kyate sia zah,

⁴“Tuanaw a zya hae paw nanning, hynhlang rang oh!” a ci. Tuanaw a hoi lei hae paw kalan khe,

⁵“Rang oh, ka sanlou hynh ae oh lah, ka pyde vae paw misutui hynh neih oh.

⁶Ngaeenaw kha cciataw oh lah, hiin ccavae oh, hawnaw laanpi kha zui oh,” a ci.

⁷Ccungccaw a saryathyapaw kha a thuiheipaw tuh maethya a bongkuh cih; ccungccaw hoyleipaw kha a thuiheipaw tuh vaemaw a mue cih.

⁸Ccungccaw a saryathyapaw kha na thuihei zetuh, hung ae huahan cih; ccungccaw hawpaw kha thuihei lah, ae sungsah cih.

⁹Mihawpaw kha thuihei lah, houh a haw cih; midingpaw kha ccangpah lah, thyanaw houh a mue cih.

¹⁰BAWIPAW rawrinaw tuh hawnaw athotakawnaw nynh thua, Athyaapaw Pachia kha nynaw tuh akhupaw nynaw nynh thua.

¹¹Pawccecize kamaw liate na hiinshe asae cih zah, na hiin kum kha biachih pya na thua cih.

¹²Na haw ze, namaw thanenaw hanlan athua cih; Ccungccaw na sarya ze, tuh-e tuh na makhaete na teing cih.

¹³Angaeepaw nopi tuh a roi accae; a tuanaw zya zah, pawpaw mah nyh khyh.

¹⁴A inn thuakaw kya a haung, khua lungkhu ahangnaw hmin kya umpaw haungnaw kyakhe a haung,

¹⁵mih laanpi lawbabin lan a cceih hae paw kha ko hae zah,

¹⁶“Tuanaw a zya hae paw, hynhlang rang oh!” a cipya hae. Tuanaw a hoi lei hae paw kyakhe,

¹⁷“Rupaw tui tuh e zah, aruh lante aepaw sanlou tuh athua,” a cipya hae.

¹⁸Thuasalama tuin kyakhe michi hae um hae zah, a mikhia hae tuh akhupaw michi khua kya nynh a um hae cipaw kha minmin nynh nyh khyh hae.