Read Zotung Chin SOLOMON HLAW 1 Bible Online

SOLOMON HLAW 1 - Zotung Chin bible

SOLOMON HLAW 1

¹Hlaw hae kyaze ahoy huaccepaw Solomon hlaw.

²A mung te kae hynh yn myng sah! Pawccecize na sungsahnaw tuh misutui laeze athuahua,

³na thuhkupaw chitui tuh amynkhuh, na min tuh zimuin alaekuhpaw hawte amynkhuh; tukeiccuze liaccady hae nynh nang kha ae sungsah hae.

⁴Kae hynh yn cciakhae lah, rangsakuh sih. Siapharan nynh a khaan lungkhu lang yn teekhae vae. Na kya kae lungtua cih zah kae lungpaw cih; na sungsahnaw kha misutui laeze kae thehoysah cih; nang kha ae sungsah ccaccing hae.

⁵Pou Jerusalem ccanung hae, kae tuh Kedar bu hawte nynh ka thua, ka ngesaw tuh aman zemah Solomon inn kya-e zokhawpaw boei hawte ka puithya.

⁶Khuanin nynh phang yn e zah ka ngesaw aman keiccuze kae hynh yn dobung nan oh. Ka nung ccapaw hae nynh mih thin yn rianua hae, minmin nynh misu khokhu ngawtu lang yn nung hae, ka misu khokhu kha ka ngawkuh khyh!

⁷Ka hiinnaw nynh a sungsahpaw nang, na tuuphu na paeesakunaw te ninthu kya na ryasahnaw hae kha yn hopya tua; pawccemou kae tuh na ban hae tuuphu pe kya thuruh athuapaw hawte ka thua lanpaw tuh?

⁸Pou nopi hae laku kyaze sungsah lan um huaccepaw, na ny khyh ze, tuuphu hae ccunoh kha zui lah, tuurin hae bu pe khe na tuutaw hae kha paeesakuh hae.

⁹Ka sungsahnung, nang hynh Faro marangle a sue hae paw laku e rangpinung te kae touse.

¹⁰Na byaki tuh ccaankunawpaw te kou puithya zah, na nging tuh aphutepaw lung suisi te kou puithya.

¹¹Kaening nynh ngun te ccaankuhpaw suisi kha kae raepah ung cih.

¹²Siapharan tuh a haungnaw vawlan a um lyakhe, ka zimuin myn tuh akhuh.

¹³Ka sungsah tuh ka hanlan ka by vawlan umpaw mura mynkhuh hawte nynh thua.

¹⁴Ka sungsah tuh ka hanlan En-gedi misu khokhu kya a pawpaw henna nge hawte nynh thua.

¹⁵Pou ka sungsahnung, nang tuh na puithya; myarya na puithya; na mit tuh vahu te nynh aloku.

¹⁶Pou ka sungsahpaw, nang tuh na puithya; sungsah lan na um ccaccing. Aening iphae tuh ahinpaw zong nynh thua;

¹⁷aening inn kya-e atung accaw hae tuh sidar thing thua zah, aening inn kya dawkuhpaw tuh maeccaw ku nynh thua.