Read Zotung Chin SOLOMON HLAW 2 Bible Online

SOLOMON HLAW 2 - Zotung Chin bible

SOLOMON HLAW 2

¹Kae tuh Sharon ramkaw e ningsi haetapaw, accya kya-e lili haetapaw hawte nynh ka thua.

²Liaccaw hae lakuze ka sungsahnung tuh Hinpaw hae lakuze lili haetapaw hawte nynh thua,

³Ccangvae hae lakuze ka sungsahpaw tuh tuthing hae lakuze epal ku hawte nynh thua. A mynlyh kyakhe ka haung zah myaryamaw ka lungrythuakhaekuh, a thae kha ka taangtua zah a e.

⁴Poituanaw inn kalan kae kha yn cciakhae zah, ka tungvaw a eenaw tuh sungsakunaw nynh thua.

⁵Misu thae aroupaw khate ka thawzung yn umsah, epal thae khate ka thaw bua yn saesah; pawccecize sungsakunaw keiccuze ka thawzung phe ting.

⁶A voilang kuih te yn kui sah lah, a ranglang kuih nynh yn pom sah!

⁷Pou Jerusalem ccanung hae, ka sungsahnung tuh amaw tho lan a tho mawlaezung na tho khyh nawlan oh, sazuh hae khyhze sazaw hae min phyate bya kae taw oh!

⁸Ka sungsahpaw roi khaw! Dotua, aning tuh muapi hae te sangpyng hae vawlan thohkute yn cceih vae.

⁹Ka sungsahpaw tuh sazaw khyhze zuhnia taraw te nynh a loku. Dotua, thanlan-aw kyate a lungkhu lang riri dote, thanlan-aw a ua kyate dophite aening lungrua nulang khe a thadyn.

¹⁰Ka sungsahpaw nynh yn hopya: “Ka sungsahnung, puithyanung, thokuh lah, yn cciatua;

¹¹atu tuh khuaccih athang vae, ccupi thang vae zah khuaa akan vae.

¹²Ramkaw kya haetapaw yn paw vae; pavaw sia ccyh thua vae zah, aening ram kya vahu roi thae lan um vae.

¹³Thaeku ku nynh athae kha voisah zah, misu paw mynkhuh tuh apaw vae; ka sungsahnung, puithyanung, thokuh lah, yn cciatua.

¹⁴Muihthya um leinaw lungkarung kya, chiapi lung hae laku kya-e ka vahu, na mitmae beih yn muihsakuh, na roi beih yn thaesah; pawccecize na roi tuh ngae ry um zah, na mitmae tuh sungsah lan kou um.

¹⁵Misu khokhu a rohpaw suizaw hae te suizaw taw hae kha kyng oh, pawccecize aening misu khokhu e misu hae tuh apaw paw cciamang hae,” a ci.

¹⁶Ka sungsahpaw tuh ka kya-e thua zah, kae tuh a kya-e nynh ka thua; a tuuphu kha lili paw hae laku khe a paeesaku hae.

¹⁷Khuadae mawlaezung te mohnaw mynlyh a ccue mawlaezung, ka sungsahpaw Bether mua vawlan e sazaw hawte thuasah, sazuh taraw hawte thuasah yn kithui.