Read Zotung Chin SOLOMON HLAW 4 Bible Online

SOLOMON HLAW 4 - Zotung Chin bible

SOLOMON HLAW 4

¹Ka sungsahnung, paw na puithya baban, myaryamaw na puithya! Na mae na bongkupaw boei kaw a umpaw na mit tuh vahu mit te nynh aloku. Na sang tuh Gilead mua hary apannaw kya a cceihbung hae paw miaa phu te nynh aloku.

²Na haw tuh a ming ngo koute, tuisingkunaw kyate oun cceihthung hae paw tuuphu te nynh aloku, tuh-e tuu hae tuh abuabuate ataw than hae zah, sa kheit sanmah zo khyh hae.

³Na mung tuh sebabipaw laaw te lokuh zah, na khalang tuh sungsah lan a um. Mae bongkupaw boei kaw a umpaw na byaki tuh apaekuapaw ccalee thae te nynh aloku.

⁴Na nging tuh zunghe ccakhungnawpaw David a rhawviainn te nynh aloku; tuin kyakhe abalyn mawte rhawkaw hae kya-e zunghe thong kheit a um.

⁵Na matei ccangning tuh lili paw hae laku a ae cciamang hae paw sazuh taw a phei hae paw te nynh aloku.

⁶Mohnaw zo zah khua adae mawkhe mura mua te frankinsen sangpyng hae kalan khe ka rangsakuh cih.

⁷Ka sungsahnung, na pyn balyn mawte na puithya; na kya hosianaw um khyh.

⁸Ka liaccanung taraw, Lebanon kyate kamaw ryte cceihbua; Lebanon kyate kamaw ryte cceihbua. Amana mua dung kyate thuasah, Senir mua dung te Hermon mua dung kyate thuasah, chindeih karung kyate thuasah, kaesing umnaw mua hae kyate thuasah pou ccavae.

⁹Ka ccianung, ka liaccanung taraw, ka thinlung phe nae cciakhae vae, aphutepaw si oikute, na mit te vaekheit phalah nae dopaw khate ka thinlung phe nae cciakhae vae.

¹⁰Ka ccianung, ka liaccanung taraw, na sungsahnaw tuh pawcih baban mou a e! Na sungsahnaw tuh misutui laeze pawcih baban mou thuahua zah, na chitui mynkhuhpaw tuh ccangpaw mynkhuhpaw laeze pawcih baban mou amynkhuhhua!

¹¹Ka liaccanung taraw, na mung tuh haetapaw tui hawte accaw; na lae kaw kya khoilutui te mateitui a um; na boeining nynh amynkhuhpaw tuh Lebanon mynkhuhpaw te nynh aloku.

¹²Ka ccianung, ka liaccanung taraw tuh ccavyng khawpaw khokhu, ccavyng khawpaw tuidy, phang koihkhawpaw tuisung nynh thua.

¹³Thingthae khokhu kya um hae paw na thingku taraw hae tuh ahoypaw thae athaepaw ccalee ku, nard te pykuhpaw henna,

¹⁴nard te saffron, kalamus te sinamon, amynkhuhpaw thingku miakaw nynh thua hae, mura te aloes, mynkhuhhua hae paw miakaw a um hae.

¹⁵khokhu khe tuidy, aluapaw tui, Lebanon kyate yn luapaw vaw taraw a um.

¹⁶Pou thahlang khisan, thoku tua, Pou deilang khisan, yn zawtua! Ka khokhu luki yn zaw lah, amynkhuhpaw kha asawnaw lang na mung cih. Ka sungsahpaw tuh a khokhu kalan yn thua sah lah, khokhu kya-e thingthae ahoy huaccepaw kha ae sah.