Read Zotung Chin SOLOMON HLAW 5 Bible Online

SOLOMON HLAW 5 - Zotung Chin bible

SOLOMON HLAW 5

¹Ka ccianung, ka hawkunung, ka khokhu lang ka cceih; ka mura kha mynkhuhpaw te ka sueluaku, ka khoibaw te khoitui kha ka aede, ka misutui te mateitui kha ka niade. Ka ban hae, ae oh, neih oh lah, sungsakunaw khate phe byn oh.

²Ka ih salamah ka thinlung tuh ngaw kho khyh. Ngaetua! Ka sungsahpaw nynh thuakaw khua zah, “Ka ccianung, ka sungsahnung, ka vahu, ka kya-e phe a ccingnung, thuakaw yn hungpah; pawccecize ka lu tuh dangtui te acia, ka sangtung tuh khuazi accahpaw dangtui keiccuze acia,” a ci.

³Ka boeining kha ka khahku; pawccemou boeining kha bua ka lawkuh kho ung cih? Ka ccu phe ka singku vae; pawccemou bua ka thusakuh ry ung cih?

⁴Ka sungsahpaw nynh a kuih kha thuakaw lungkhu lang a pu keiccuze ka lungkhu te ka ry.

⁵Ka sungsahpaw kha thuakaw hungpya lan he ka thokuh tuh, ka kuih kyate mura chitui accaw, ka kuih kyate muratui tuh thuakaccong vawlan khe accaw.

⁶Ka sungsahpaw kha thuakaw ka hungpya, thuasalama ka sungsahpaw tuh maekuh zah phe la cceih vae. Aning nynh bya he a ho tuh ka thawzung phe yn tingsah. Amaw kha ka ccung zahmah ka muih vae khyh; ka ko zahmah yn oi vae khyh.

⁷Khuapi lungkhu a khiakuh hae paw rhawviatu hae nynh yn muih hae; yn zia hae zah vaemaw yn muesah hae, khualungrua kya rhawviatu hae nynh ka mae bongkupaw kha ccaring yn lawpya hae.

⁸Pou Jerusalem ccanung hae, ka sungsahpaw kha na muih oh ze, Ka sungsah keiccuze ka thawzya, a ci cite na la hopya nawlan oh bya kae taw oh.

⁹Pou nopi balyn laeze a puithya huanung, na sungsahpaw tuh sungsahpaw mingccangpaw laeze pawmou alaehua? Tuhcite kaening byatawsya lan ciate na sungsahpaw tuh sungsahpaw mingccangpaw laeze pawmou alaehua?

¹⁰Ka sungsahpaw tuh a pynrua hoy zah a ngesaw raw, ccungccaw thong haw laku kya a langkuh hua.

¹¹A lu tuh sui ccipaw te nynh aloku; a sangtung tuh khekuh zah, va-aw hawte aman.

¹²A mit tuh tuidy pe to zah mateitui te a singkuhpaw vahu te nynh aloku.

¹³A byaki tuh amynkhuh zah mynkhuhpaw a pousahpaw khokhu te nynh aloku. A mung tuh muratui abyasahpaw lili paw te nynh aloku.

¹⁴A kuih tuh sui te raekuhpaw, aphutepaw lung te ccaankuhpaw te nynh aloku; A pyn tuh nilar lung te ccaankuhpaw saepanua hawte nynh thua.

¹⁵A ccu tuh sui ccusy vawlan bingkuhpaw aphutepaw lung te nynh aloku. A muinsan tuh Lebanon mua te lokuh zah sidar thing hoypaw te nynh aloku.

¹⁶A byaho tuh myaryamaw e zah aning tuh abalyn mawte ry lan umpaw nynh thua. Jerusalem ccanung hae, e paw tuh ka sungsahpaw te ka banpaw nynh thua.