Read Zotung Chin SOLOMON HLAW 6 Bible Online

SOLOMON HLAW 6 - Zotung Chin bible

SOLOMON HLAW 6

¹Nopi hae lakuze a puithya huacce nung, na sungsahpaw tuh teilangmou phe a ccia vae? Amaw kha aening nynh ah ccung oh ccaw, na sungsahpaw tuh tei laanpi lang mou phe a ccia vae?

²Ka sungsahpaw tuh khokhu kya a sahiin phu kha paeesaku khylan te lili paw hae kha suelua khylan amynkhuhpaw khokhu lang nynh phe a cciabung vae.

³Kae tuh ka sungsahpaw kya-e ka thua zah, ka sungsahpaw tuh ka kya-e nynh thua; a sahiin hae kha lili paw hae laku khe a rin hae.

⁴Ka sungsahnung, nang tuh Tirzah khuapi hawte na puithya, Jerusalem hawte na puithya, rhawtukkunaw kya hawte ri lan na um.

⁵Ka kyate ccanglang hawitua, pawccecize na mit nynh phang yn kyng! Na sang tuh Gilead mua hary apannaw kya a cceihbung hae paw miaa phu te nynh aloku.

⁶Na haw tuh tuisingkunaw kyate oun cceihthung hae paw tuuphu te nynh aloku; tuh-e tuu hae tuh abuabuate ataw than hae zah, sa kheit sanmah zo khyh hae.

⁷Na byaki tuh mae kya bongkupaw boei kaw a umpaw ccalee thae apaekuapaw te nynh aloku hae.

⁸Siapharan zupi sung taruh, lovae sung tarya te riatae leipaw liaccaw hae a um.

⁹Ka vahu, phe a ccingnung ka kya-e tuh amaw rou nynh thua, a nung nynh myarya a sungsahnung, amaw tuh a saahtunung hanlan phe a ccingnung nynh thua. Liaccaw hae nynh amaw kha muih hae zah, lungtuanung cite a ko hae; siapharan zu hae te lovae hae nynh mah a thehoysah hae.

¹⁰“Khuadaetakaw hawte yn langkuh, sawpaw hawte a puithya, khuanin hawte aw zah rhawtukkunaw kya hawte ri lan umpaw hynh-e nopinung hynh hummou?”

¹¹Accya e thingku hae do khylan, misu ku atoih tou toih khyh tou cipaw do khylan te ccalee ku apaw paw tou paw khyh tou cipaw ny khylan khokhu lang ka cceihbung.

¹²Bua ka nyku mawkhe, lungkaw ka tuakunaw nynh ka siapharannung pe umpaw marangle lungkhu khe yn nung.

¹³Pou Shulam nung, yn ki lou, yn ki lou! Nang kha kae muih kho ccaw yn ki lou, yn ki lou. Rhawkaw phu ning malang a law hae paw kha do hawte, Shulam nung kha pawccemou na do cih?