Read Zotung Chin SOLOMON HLAW 8 Bible Online

SOLOMON HLAW 8 - Zotung Chin bible

SOLOMON HLAW 8

¹Nang hynh ka nung matei a zupaw, ka upaw hawte na thua ravo nyn! Atolang ah tungku vae ze kae myng cih zah hum nynh sanmah kae kha yn theihrya lan khyh.

²Nang kha kae cciakhae cih zah ka nung inn lungkhu lang, kae yn saahnung a khaan lungkhu lang kae teekhae cih. Amynkhuhpaw misutui, ka ccaleethaetui kha nia lan kae pya cih.

³A voilang kuih kha ka ngya sah lah, a ranglang kuih nynh yn pom sah!

⁴Pou Jerusalem ccanung hae, ka sungsahnung tuh a inaw kyate amaw tho lan a tho maw na tho khyh nawlan oh, nanning kha bya kae taw oh!

⁵A sungsahpaw kha ngeikute ramkaw kyate yn cceihthungpaw khuh hummou athua? Epal ku kaw khe nang kha kae tho. Tuin kyakhe na nung tuh nang keiccuze neitangia a teing; tuin kyakhe nang ae saahnung tuh neitangia a teing.

⁶Kae hynh na bung vawlan tazeih hawte yn khiaku tua, na kuihbaw kya tazeih hawte yn khiaku tua; pawccecize sungsakunaw tuh chinaw hawte a thawsae, eiungnaw tuh shawku hawte a rysawthah. Tuh-e tuh maeesoi te maeephu aruapaw nynh thua.

⁷Tui patae nynh sungsakunaw maee kha the kho khyh, tui alepaw nynh mah vu kho khyh. Lukhakheit nynh sungsakunaw hanlan a inn kya-e sisua balyn kha a pya lanze, saryanaw kha a ing cih.

⁸Kaening nynh ccianung taraw lu kheit kae hoi, aning tuh a matei adih ung. Kae neitawnung oun dy nin hae khe, aning hanlan pawmou kae cyipah cih?

⁹Aning tuh khualungrua a la thua ze, kaening nynh a tungvaw kya maethe kawnaw a ua kha ngun te kae rae cih; thuasalama aning tuh thuakaw a la thua ze, sidar thing te kae khaw cih.

¹⁰Kae tuh khualungrua ka thua zah, ka matei hae tuh rhawviainn te nynh aloku hae; oute kae tuh a muihnaw kya daenaw a thuakhaepaw hawte nynh ka thua.

¹¹Solomon tuh Baal-hamon kya misu khokhu a hoi; misu khokhu kha a ngawtu hae kalan a ap hae, a ngawtu lu kheit cci nynh thingthae mee lang ngunphua thong kheit cci a pya hae.

¹²Ka hoipaw misu khokhu tuh kamaw hanlan nynh thua; Pou Solomon, nang nynh ngunphua thong kheit lawkuh lah, thingthae a ngawtu hae nynh za ning lawkuh hae sah!

¹³Pou khokhu kya a umpaw nang, ka ban hae nynh na roi kha a ngae hae; kae mah yn thaesah bua.

¹⁴Ka sungsahpaw, yn rangsakuh, amynkhuhpaw mua vawlan umpaw sazuh khyhze anopaw sazaw hawte yn cciatua!