Read Zotung Chin ISAIAH 11 Bible Online

ISAIAH 11 - Zotung Chin bible

ISAIAH 11

¹Jessi ccungmuing kyate thingno thawpaw yn toih cih zah, a tharui kyate akaran tuh yn lethung cih.

²BAWIPAW muisaw tuh a tungvaw a um cih, hawnaw te nythyanaw muisaw, tuanaw pyakunaw te thungnaw muisaw, nynaw muisaw te BAWIPAW rawrinaw kha a tungvaw a um cih.

³BAWIPAW rawrinaw kha a lungrythuakhaekuh cih. A mit nynh a muih thyhte byapia lan khyh, a naw nynh a thae thyhte mah byapae lan khyh;

⁴ryachi hae kha dingnaw te bya a piapah cih hae zah, laephi vaw e a nyaa hae paw kha ahmete bya a paepah cih hae, a mung kya-e a bya ccungngue khate laephi kha a bua cih zah, a khalang kya-e hy khate ccungccaw hoylei hae paw kha a theih cih hae.

⁵Dingnaw tuh a tae kya-e taeccia athua cih zah, lungzinaw tuh a tae kya voikupaw taeccia athua cih.

⁶Suizaw tuh tuu te a umkheih cih hae, kaesing tuh miaa ataw te a ryakheih cih hae, vaetuataw, chindeih taw te athopaw sahiin taw hae tuh a aekheih cih hae zah, imua taraw nynh a cciakhae cih hae.

⁷Vaetua te vong tuh a aekheih cih hae zah, mih taw hae tuh a ryakheih cih hae; chindeih nynh tangnuapaw hawte ccatanphue kha a ae cih.

⁸Matei zu ungpaw imua nynh huparepaw pe khe a zue cih, matei phiakuh vae paw imua nynh huparepaw khu kha a kuih te a pu cih.

⁹Minmin nynh athyaapaw ka mua vawlan khe vawsaw pyakunaw te ronaw kha rae lan khyh hae; pawccecize rili tuh tui te phe abia hawte, laephi tuh BAWIPAW nynaw khate phe abeih cih.

¹⁰Tuin nin khe Jessi tharui tuh ccungccaw hae hanlan syntawnaw lante yn thadyn cih; minphuin hae nynh amaw kha akaw-aleih a khia cih hae zah, a umnaw tuh a phu-e cih.

¹¹Tuin nin khe BAWIPAW nynh a kuih a dyng cih zah, Assiria ram, Izip ram, Pathros ram, Ethiopia ram, Elam ram, Shinar ram, Hamath ram te rili kin e ram hae kyate a laehypaw a ccungccaw hae kha vaeningnaw a kikhae cih hae.

¹²Minphuin hae hanlan syntawnawpaw kha a hangthung cih zah, a zawpui hae paw Israel hae te phiariphiarae um hae paw Judah hae kha laephi ki kipali kyate a suelua cih hae.

¹³Efraim tuh eiungnaw thinlung hoi vae lan khyh zah, Judah tuh rhawku rynaw thinlung hoi vae lan khyh; Efraim nynh Judah tungvaw eiungnaw hoi vae lan khyh zah, Judah nynh mah Efraim tungvaw rhaw rynaw thinlung hoi vae lan khyh.

¹⁴Minmin nynh niccaw lang e Filistin hae kha a tuk cih hae zah, nithua ccungccaw hae kya-e uccaw kha mah a luade cih hae. Edom hae te Moab hae tungvaw mih kuih a hangnua cih hae, Ammon hae nynh mih kaw a ngae cih hae.

¹⁵BAWIPAW nynh Izip rili akouleihnaw kha a kangsah cih, Vawpi vawlan khe a thawsaepaw khisan ryte a kuih a he cih zah, Vawpi kha vaw vawsari lang a phia cih, ccu te zua nawlan laanpi kha a rae cih;

¹⁶Izip ram kyate he a pou hae tuh, Israel hae hanlan laanpi a um hawte, a laehypaw a ccungccaw hae hanlan Assiria ram kyate ccianaw laanluepi a um cih.