Read Zotung Chin ISAIAH 18 Bible Online

ISAIAH 18 - Zotung Chin bible

ISAIAH 18

¹Ethiopia ram e vaw hae khuraw lang a umpaw ram kyakhe sake abiakuhpaw roi accae.

²Tuh-e ram kyate locceihtu hae kha phaeku te araekuhpaw kohlung khate Nal vawpi kyate a saw hae. Pou athyrangpaw locceihtu hae, a pyn hang zah a ngesaw ahoypaw minphuin, laephi pynpi nynh a ripyapaw, a thawsaepaw te a taepaw minphuin, vaw hae nynh a phia hae paw ram kya a umpaw minphuin kalan khe cceih oh.

³Laephi vawlan a um hae paw balyn, mua vawlan syntawnaw alan he a sae vae hae ze, do oh! Mungkae he a tu vae hae ze, ngae oh!

⁴Pawccecize BAWIPAW nynh yn hopyapaw tuh: khuaninpaw kya ccaerarih lan a aw hawte thuasah, loohrue lya aso ccyh kya dantui te phe beihpaw maeking hawte thuasah ka umnaw kyate zya ka do cih.

⁵Misu thae lo azaw maw, apaw tuh khuakuh zah, athae he avoi cciamang lyakhe, atoih thawpaw kha rungkou te a awpah cih zah phiariphiarae umpaw akaran hae kha a baepah cih.

⁶Minmin tuh mua vawlan umpaw saw a aepaw pavaw hae te laephi vaw e sarangpaw hae hanlan cciataw athua cih hae. Te saw a aepaw pavaw hae nynh hawnin ccyh vae ze minmin tungvaw a um cih hae zah, laephi vaw e sarangpaw balyn nynh khuaccih ccyh vae ze minmin tungvaw a um cih hae.

⁷Tuin ccyh vae tuh, a pyn hang zah a ngesaw ahoypaw, laephi pynpi nynh a ripyapaw, a thawsaepaw te a taepaw, vaw hae nynh a phia hae paw ram kya a umpaw minphuin nynh vaaw BAWIPAW min a umnaw Zion Mua langkhe vaaw BAWIPAW kalan lasung hae kha oun ccyng cih hae.