Read Zotung Chin ISAIAH 19 Bible Online

ISAIAH 19 - Zotung Chin bible

ISAIAH 19

¹Izip konglang Pachia nynh a hotypaw bya tuh: Dotua, BAWIPAW tuh arangpaw maeking ccikute Izip ram lang yn thua vae; Izip ram e zohtuh hae tuh amaw malang a thyngkuh cih hae zah, Izip hae tuh mih rawthah vae cih.

²Izip hae kha mimaw te mimaw rhawku lan ka tuhou cih hae zah, lu kheit te lu kheit a doukuh cih hae, innpaw te innpaw, khua kheit te khua kheit, ram kheit te ram kheit a doukuh cih hae;

³Izip hae thinlung kha ka zosah cih zah, mih khuakhannaw kha ka roh cih; minmin nynh zohtuh hae, michi hae muisaw, naawthya hae paw te muisaw hae kha tuanaw a ngiakuh cih hae;

⁴Izip hae kha a puathopaw bawi kuih kalan ka ap cih hae; a rysawthahpaw siapharan nynh a uk cih hae cite Alesaepaw, vaaw BAWIPAW nynh a ci.

⁵Nal vawkhu e tui tuh akan cih zah, arou cih;

⁶Vawpi kyate tuizypi a zy hae paw tuh athuh cih zah, Izip kya-e Nal vawpi kyate a phiakuh hae paw vaw hae tuh adih cih hae zah arou cih hae, phaeku hae te thabu hae tuh anaan cih hae.

⁷Nal vaw kin tuh aku a um leinaw hmin lang a tang cih; Nal vawkhu pe ccoupaw aku balyn tuh arou cih, khisan nynh a mung cih zah azo cih.

⁸Ngasaw kyngte vue a kuakuh hae paw tuh ngaethyate a rah a khui cih hae; Nal vaw kya ngasaw bawtu balyn tuh mih ngaethah cih zah, tui vawlan paih a rawtu hae tuh mih lungthawthang cih.

⁹Buri law te boeikuathya hae paw tuh mih lungthang cih zah, mih thanenaw azyabung vae cih.

¹⁰Boeikuathya hae paw tuh mih lungroh cih zah, vaeluapaw balyn tuh mih ngaethah cih.

¹¹Zoan khua e cciakhaetu hae tuh mingaee hae nynh thua; Faro siapharan kya-e tuanaw pyatu hae nynh ngaeepaw tuanaw kha a pya hae. “Kae tuh a hawpaw lu kheit, te langmawlya e siapharan ciihan nynh ka thua,” cite pawtemou Faro kha na hopya ngan oh?

¹²Na mihaw hae tuh atu teimou a um hae? Vaaw BAWIPAW nynh Izip kha rawsete pawtemou a paccyn cipaw kha minmin nynh ae hopah hae sah lah, ae nysah hae sah.

¹³Zoan khua e cciakhaetu hae tuh a ngaee vae hae, Memfis khua e cciakhaetu hae tuh mihyn hae nynh thua; Izip cciakhaetu hae nynh Izip kha a cciakhaesei vae hae.

¹⁴BAWIPAW nynh cciakhaetu hae kha mih thinlung a muasah vae hae; aruipaw nynh amaw a lua toulou kya a thei hawte, minmin nynh Izip kha a cyipaw miakaw kya a cyiseisah hae.

¹⁵Izip a lu nynh thuasah, a leihmae nynh thuasah, ungcci ku akaran nynh thuasah, phaeku nynh thuasah Izip hanlan pawpaw mah cyih kho lan khyh.

¹⁶Tuin nin khe Izip hae tuh nopi hawte athua cih hae zah, vaaw BAWIPAW nynh minmin tungvaw a hangnua hae paw a kuih malang khe rawrite a thyngkuh cih hae.

¹⁷Te vaaw BAWIPAW nynh Izip hae hanlan a paccynpaw keiccuze Judah ram tuh Izip hae hanlan ri lan umpaw lang a tang cih.

¹⁸Tuin nin khe Izip ram e khuapi khuapangaw nynh Kanaan bya a ho cih hae zah, vaaw BAWIPAW min te thyalawkute bya a kinkuh cih hae. Tuh-e khuapi kya-e khua kheit tuh Khuanin Khuapi cite a ko cih hae.

¹⁹Tuin nin khe Izip ram angaelung kya BAWIPAW hanlan silawhang ccangkheit a um cih; Izip ramri khe BAWIPAW hanlan lungbing a um cih.

²⁰Tuh-e tuh Izip ram kya vaaw BAWIPAW hanlan muihsahnaw te ccaekia athua cih; tuaasahtu hae keiccuze minmin nynh BAWIPAW kalan he a sia hae ze, aning nynh khumtu a sawpah cih hae, te tuh-e khumtu nynh a thungkhaw cih hae zah a khum cih hae.

²¹BAWIPAW nynh amaw kha Izip hae kya a nysakuh cih hae; tuin nin khe Izip hae nynh BAWIPAW kha a nyh cih hae zah, silawnawpaw te maee-ute silawnaw khate a beik cih hae; BAWIPAW kalan byakinnaw a rae cih hae zah, bya a kinku hae thyhte a cyih cih hae.

²²BAWIPAW nynh Izip kha de a tah cih, thuasalama bua a dansah cih; minmin nynh BAWIPAW kalan a maeleihkuh cih hae zah, a ngia hae paw kha a thaepah cih hae zah a dansah cih hae.

²³Tuin ccyh khe Izip ram te Assiria lang laanpi a um cih, te Assiria hae nynh Izip ram lang a cceih cih hae zah, Izip hae nynh Assiria ram lang a cceih cih hae, te Izip hae tuh Assiria hae ryte a beikkheih cih hae.

²⁴Tuin ccyh khe Izip te Assiria ryte Israel tuh ram thumnaw athua cih zah, laephi pynpi hanlan hythuanaw athua cih,

²⁵vaaw BAWIPAW nynh minmin kha hythuapya hae zah, “Ka ccungccaw Izip, ka raepaw Assiria te ka rho Israel tungvaw hythuanaw um sah,” a cipya hae.