Read Zotung Chin ISAIAH 21 Bible Online

ISAIAH 21 - Zotung Chin bible

ISAIAH 21

¹Rili nynh avupaw ramkaw konglang Pachia nynh a hotypaw bya tuh: Negeb kya akhiapaw khiccung hawte, ri lan umpaw ram, ramkaw kyate shethya yn thua.

²Ri lan umpaw vizin kha ka muih; a lungzi leipaw nynh a lungzi khyh, te a rohtupaw nynh a ro. Pou Elam hae, cciathung tua oh, Pou Media hae, khuapi kha koihlu oh; Babilon nynh a thuakhaepaw teingnaw balyn kha ka thangsah.

³Tukeiccuze ka tae myarya ccih; neitangia a ccihpaw nopi hawte teingnaw nynh yn thuanua vae; nawthae lei lan ciate ka teing, ngawmuih lei lan ciate ka lungmuakhaekuh.

⁴Ka thinlung azo, ri lan umpaw nynh yn siisaku; ka ngaepaw zete ccyh tuh ka hanlan thyngkunaw lang nynh a tang vae.

⁵Minmin nynh loohdangkunaw poi kha a paccyn hae, haung nawlan boei kha a phae hae, a neih hae, a ae hae. Pou rhawbawi hae, thokuh oh lah, khawriaphua kha chitui thuhtua oh!

⁶Pawccecize Bawipaw nynh kae kha yn hopah zah, “La cceih lah, rhawviatu lu kheit la nung, aning nynh a muihpaw kha ho sah.

⁷Abuabuate oun thua hae paw marang ccikuh hae paw, lann ccikuh hae paw te kalauh ccikuh hae paw kha he a muih ze, aning nynh hoyte, pekite nawngae sah,” yn cipya.

⁸Te rhawviatu nynh, “Pou Bawipaw, rhawviainn kya khuadae ccyh kya po ka thadyn, zidae rhaw po ka via.

⁹Marang ccikuh hae paw tuh abuabuate khuing kya oun thua hae!” cite a sia. Te tuh-e paw nynh, “Babilon a khuliakuh vae, a khuliakuh vae; a pachia hae, a zohtuh hae balyn tuh laephi kya kaheikalah a koi vae hae,” a ci.

¹⁰Ccatan tin hawte tin athua hae paw, pou ka ccungccaw hae, vaaw BAWIPAW , Israel Pachia kyate ka thaepaw kha nae kalan kae thaesah oh.

¹¹Dumah konglang Pachia nynh hotypaw bya tuh: Lukheitpaw nynh Seir mua kyate yn ko zah, “Pou rhawviatu, khuazi ccyh hynh pawtemou athua cih? Pou rhawviatu, khuazi ccyh hynh pawtemou athua cih?” yn cipya.

¹²Rhawviatu nynh, “Awkhua ccyh yn thua zah, zete ccyh mah yn thua. Nae khia ry ze, yn cceih lah bua yn khia,” a ci.

¹³Arabia konglang Pachia nynh a hotypaw bya tuh: Pou khuaccong hae paw Dedan hae, Arabia ramkaw khe khuazi na rya cih oh.

¹⁴Pou Tema ram kya um hae paw, tuihaw hae paw hanlan tui ccyngpah oh lah, a ccue hae paw kha sanlou te cciadue oh.

¹⁵Pawccecize minmin tuh thaloi rhaw kyate thuasah, poh thuaakuhpaw thaloi kyate thuasah, akoikuhpaw li kyate thuasah, rhawtuk keiccu lungriathaenaw kyate thuasah a ccue hae.

¹⁶Te Bawipaw nynh yn hopyapaw tuh: vaeluatu riapyanawpaw kum thyhte, kum kheit lungkhu khe Kedar minphuin a phu-enaw balyn tuh azo cih;

¹⁷a laehypaw Kedar rhawkaw thekawthya hae paw tuh azya vae cih hae; pawccecize BAWIPAW , Israel Pachia nynh a ho vae.