Read Zotung Chin ISAIAH 22 Bible Online

ISAIAH 22 - Zotung Chin bible

ISAIAH 22

¹Vizin accya konglang hotypaw bya: Nae balynte innccukaly lang na kae oh paw tuh paw rynaw mou athua?

²Khuapi tuh siaruanaw te phe abeih, nawpankeilae umpaw khuapi, a lungtuapaw khuapi nynh thua. Achihpaw na ccungccaw hae hynh thaloi keiccu chih khyh hae, rhawtuknaw kya mah chih khyh hae.

³Na kya-e uktu hae balyn tuh pynkheihlan a ccue vae hae; mih li kaw mang leite phe kyng hae. Asawnaw lang a ccue vae hae zemah muih athuapaw balyn kha kyng athua hae.

⁴Tukeiccuze ka hopaw tuh: Ka kyate ccanglang hawitua, ka sungsahpaw ka ccungccaw hae tuh a ro keiccu hae ze thawmawte ka rah cih, kae hynh soihbia lan zuakuh nan.

⁵Bawipaw vaaw PACHIA nynh vizin accya kyakhe siaruanaw, sydenaw te lungmuanaw ccyh kha a thuasah, khualungrua hae kha tingsah zah, bawmnaw mue khylan siaruanaw roi tuh mua hae kya accae.

⁶Elam hae tuh the te li bawng ccyngkuh hae zah marangle hae te marang rhawkaw hae ryte oun cceih hae, Kir hae nynh khawriaphua kha a thuaaku hae.

⁷Na kya-e ahoy huaccepaw accya hae tuh marangle te phe beih zah, marang rhawkaw hae tuh koikua malang a thadyn hae.

⁸Judah rhawlungrua tuh pong ating. Tuin nin khe zunghe na ccakhungnaw Ramkaw e Inn kha na do zah,

⁹David khuapi kya aronahpaw patae kha na muih, te akawlan e tuikua kyate apoupaw tui kha na suelua.

¹⁰Jerusalem e inn hae kha na ria zah, khualungrua koih nawlan inn hae kha na phou hae.

¹¹Tui tungnawpaw tuikua arynpaw kyate apoupaw tui kha tung nawlan tuikuapi kha khualungrua ccangning laku khe na rae. Thuasalama e uccaw a raetu kha na tuabia khyh, langmawlya te hynh-e uccaw a la paccyntupaw kha pawlang na ria khyh.

¹²Tuin nin vae tuh Bawipaw vaaw PACHIA nynh rawkhuite hawkhaeku lan, lu-oku lan te buriboei zingku lan ae ko oh;

¹³thuasalama lungtua lungpawnaw poi tuakute, vaetua te tuu chiate saw na ae oh zah misutui na nia oh. “Ae oh sih lah, neih oh sih, pawccecize awkhualan ah chih cih oh,” na ciku oh.

¹⁴Vaaw BAWIPAW nynh ka nakaring kya yn hopyapaw tuh: Thanccingte e nae hoyleinaw hynh na chi makhia oh ngaethya thua lan khyh, cite Bawipaw PACHIA nynh a ci.

¹⁵Bawipaw vaaw PACHIA nynh hynhte a ho: Synriatu athuapaw, siapharan inn uktu Shebna kalan cceih lah:

¹⁶E kya pawmou na se? Ahangnaw hmin kya shawku raekute, lungpi kya umnaw na karynkuh zah, shawku raeku lan ciate hein kya na puizia a um tou?

¹⁷BAWIPAW nynh nang kha asawnaw lang ae vua vae cih, ka ban. Nang kha phang ae kyng cih zah,

¹⁸miabung miathung ae mia cih, te ram akonaw langkhe bawlung hawte ae vua cih; tuin kyakhe na chih cih, myarya lypaw na marangle hae tuh tuin kya a um cih hae, na bawipaw inn kha the na thyasah!

¹⁹Na ryalaw kae phoh cih zah, na ryalawnaw hmin kyate kae ccawsah bung cih.

²⁰Tuin nin vae tuh Hilkiah ccapaw ka ryalahtu Eliakim kha ka ko cih,

²¹te na angkiccua kha ka kisakuh cih zah, na taeccia kha ka cciasakuh cih. Na kya-e kawhoinaw kha ka pya cih zah, aning tuh Jerusalem um hae paw te Judah phin hae hanlan paaw athua cih.

²²David ciihan kya-e toh kha a raw vawlan ka khang cih; aning nynh a hung cih zah, hum nynh sanmah khaw lan khyh; aning nynh a khaw cih zah, hum nynh sanmah hung lan khyh.

²³Aning kha akhynnaw hmin khe pang reihnawpaw ccong hawte ka tynsah cih zah, a minpaaw hae ciihan kyaze sawtua lan umpaw bawitungkhung lang a tang cih.

²⁴Te a minpaaw inn kya-e phu-enaw aphuinphuin, ciihan te ccaawno, adihpaw angphe miakaw, banang hae te ccekoh hae balyn kyacia a tungvaw khe a baw cih hae.

²⁵Tuin nin khe vaaw BAWIPAW nynh a hopaw tuh: Akhynnaw kya tynkaring lan a umpaw uccaw bawnawpaw ccong tuh a nuekuh cih; bae athua cih zah a ccah cih, a tungvaw bawkuhpaw uccaw miakaw tuh aroh cih, pawccecize BAWIPAW nynh a ho vae.