Read Zotung Chin ISAIAH 23 Bible Online

ISAIAH 23 - Zotung Chin bible

ISAIAH 23

¹Tair konglang Pachia nynh a hotypaw bya tuh: Tarsih ccingbaw hae, rawkhuite um oh, pawccecize khua tuh innloo a um lei lan ciate aroh vae. Nae ccingbaw hae nynh Saipras langte he oun tee hae te, tuh-e kong tuh a thae hae.

²Pou rili kin kya um hae paw, Sidon khua e kungku hae, hawkhaeku tua oh; rili vawlan kungku hae paw nynh Sidon khua kha a hoirumsah hae,

³tuh-e khua nynh a muepaw ngunto tuh Nal vawpi kya-e rue athuapaw Sihor ccathae kha thua zah, tuh-e khua tuh ram takyh kyate kungkunaw hae hmin nynh thua.

⁴Pou Sidon, na maethah sah, pawccecize rili athuapaw rili khuapi nynh a ho hae paw tuh: “Ccaaw ka poi boi khyh, ccaaw mah ka saah boi khyh, liaccaw te ccangvae mah ka kua boi khyh hae,” a ci.

⁵Izip hae nynh Tair khua kong kha he a thae hae tuh, mih thinphang.

⁶Tarsih khua langkhe cceih oh, Pou rili kin um hae paw, rawkhuite um oh!

⁷Langmawlya te a la um vae paw, nae lungtuanaw khua tuh e hynh tou athua? Asawnaw lang khuasah khylan a ccu nynh a cciakhaenaw khua tuh e hynh tou athua?

⁸Tair khua tuh bawilukhung a pyatupaw khua nynh thua, khua kya-e kungku hae tuh bawi hae thua hae zah, uccaw a zua bungthungpaw a khuaccaaw hae tuh laephi nynh saw a tua hae paw nynh thua hae, tuh-e Tair khua kha rawse lan ciate, hum nynh mou a paccyn?

⁹Vaaw BAWIPAW nynh khah-e kha a paccyn— a lysakunawpaw a phu-enaw balyn kha thethyasah khylan te laephi nynh saw a tua hae paw a ccungccaw hae kha maethyalaw khylan a paccyn.

¹⁰Pou Tarsih khua e ccingbaw hae, nae umnaw um vae khyh, nae ram langkhe cceih oh;

¹¹BAWIPAW nynh a kuih kha rili vawlan dyng zah, peenaw hae kha a thyngsaku hae; BAWIPAW nynh Kanaan te asekuh lante Kanaan khualungrua kha ro lan kaw a pya vae.

¹²BAWIPAW nynh a hopaw tuh: Pou tuaasahkunaw a teingpaw Sidon ccanung liaccady, na lungtua vae lan khyh; thoku tua, Saipras langkhe cciatua, tuin kya mah na lungdae lan khyh.

¹³Babilon ram hynh dotua oh! E hae tuh Assiria hae thua leite Babilon hae nynh thua hae. Tair khua kha loramsaw hae hanlan a tangsah, rhawvianawpaw innhangpaw hae kha sak zah, Tair khua e siapharan inn hae kha a ro hae, khua kha khua rohpaw lang a tangsah.

¹⁴Pou Tarsih ccingbaw hae, rawkhuite um oh, pawccecize nae khua tuh phe roh vae.

¹⁵Tuin nin kyate Tair khua kha siapharan she shekheit athuapaw kum sung sari lungkhu ning athua cih. Kum sung sari aro te, ohhuanung kong hlaw kya a um hawte, Tair khua kya acyihkuh cih:

¹⁶A ning vae hae paw ohhuanung, nang, Tintang kha ccyngkuh lah, khuapi lungkhu khiavuikuh! Nang kha ae liathui ccaw hae, roi hoypaw saw lah, hlaw patae sahtua.

¹⁷Kum sung sari he aro te, BAWIPAW nynh Tair khua kha a paebua cih, te Tair nynh a ryalaw rynpaw kalan a kithui cih zah, laephi vaw ram takyh kya ohhuakunaw kha a rae cih.

¹⁸Kungkunaw kyate a muepaw phua kha BAWIPAW kalan pya athua cih; a phua kha ccakhung lan khyh zah tungkuh lan khyh, thuasalama kung a kunaw kya-e a phua tuh BAWIPAW malang a um hae paw hanlan looh patae te boeining hoypaw repya nawlan a mang cih.