Read Zotung Chin ISAIAH 25 Bible Online

ISAIAH 25 - Zotung Chin bible

ISAIAH 25

¹Pou BAWIPAW , nang tuh ka Pachia nynh na thua; nang kha kae hangthung cih, na min kha kae thehoysah cih; pawccecize ngaeang lan umpaw uccaw hae kha na rae vae, langmawlya te na la paccynpaw kha lungzite na ccingsah vae.

²Khuapi kha aronahpaw athupaw apumkuhpaw lang na tangsah zah, khualungrua akoihkuhpaw khuapi kha arohpaw lang na tangsah; ramccang hae kya-e siapharan inn a umnaw khuapi tuh phe zo vae, raethui ci um vae lan khyh.

³Tukeiccuze athawsaepaw minphuin nynh nang kha ae thehoysah cih; a rysawthahpaw minphuin hae kya-e khuapi hae nynh nang kha ae rih cih hae.

⁴Pawccecize nang tuh ryachi hae hanlan khynnaw na thua zah, anyaa hae paw nynh mih vawsaw lya khynnaw, khise kyate luenawpaw rekunaw te khuaninso kyate luenawpaw mynlyh nynh na thua. Rysawthah hae paw thinrianaw tuh khuaccihsaw lya-e khise hawte atho vae ze thuasah,

⁵ramccang hae siaruanaw tuh ram rounaw kya khuaninso hawte athua vae ze thuasah, maeking mynlyh khate khuaninso kha na tae; rysawthah hae paw nynh hlawsah hae paw roi kha na daesah.

⁶Vaaw BAWIPAW nynh e mua vawlan hin ccungccaw balyn hanlan loohdangkunaw poi te misutui poi kha a rae cih, tuh-e poi tuh looh athua huapaw te misutui athua huapaw khate a rae cih.

⁷Ccungccaw balyn tungvaw bong athuapaw boei kha thuasah, minphuin balyn tungvaw adawkhawkuhpaw kha thuasah aning nynh e mua vawlan hin a roh cih; aning nynh chinaw kha zungzae po a laang cih.

⁸Te Bawipaw PACHIA nynh ccungccaw balyn mae kyate mitphi kha a hupah cih hae, a ccungccaw hae thethyanaw kha laephi pynpi kyate a lah cih, pawccecize BAWIPAW nynh a ho vae.

⁹Tuin nin khe hynhte a ho cih hae, Aning tuh kae Pachia nynh thua; kaening oun khum ccaw cite amaw kha kae ngaehoi. Aning tuh kae ngaehoipaw BAWIPAW nynh thua; a khumnaw kyakhe lungtua lungpawte um oh sih.

¹⁰Pawccecize BAWIPAW kuih tuh e mua vawlan hin a um cih. Ccatanphue kha vaetua ia te tuiccua kya syde athua hawte, Moab hae kha mih umnaw kya syde athua cih hae.

¹¹Tui a zeihkuhpaw nynh a kuih kha dyng zah a zeihku hawte, Moab hae nynh mih ram kya mih kuih a dyng hae zemah, mih lysakunaw te mih zuakunaw kha nyaasah bung athua cih.

¹²Moab a rhawlungrua myarya hangpaw kha a tingsah bung cih, laekhu kyacia a nesah cih zah, vuiping kya a khuliakuh cih.