Read Zotung Chin ISAIAH 26 Bible Online

ISAIAH 26 - Zotung Chin bible

ISAIAH 26

¹Tuin nin khe Judah ram kya e hlaw hynh a sah cih hae: Atynpaw khuapi kae hoi; rhawlungrua te koihkhawpaw hawkhate Pachia nynh oun taepya.

²A lungzi zah adingpaw minphuin nynh a tee ccaw koikua hae kha hungtua.

³Atynpaw thinlung a hoi hae paw nynh nang kha ae doliaku hae keiccuze daenaw na pya hae.

⁴BAWIPAW kha zungzae doliakuh, pawccecize BAWIPAW PACHIA tuh zungzae tynpaw na lungpi nynh thua!

⁵Ahangnaw kya a um hae paw kha a nyaasah bung hae; alypaw khuapi kha a nyaasah bung, laekhu kyacia nesah bung zah vuiping kyakhe a vua.

⁶Khah-e khuapi kha ccu te a syde hae, ryachi hae te ahobou hae paw nynh a syde hae.

⁷Miding laanpi tuh ngingrarih lan acih; Pou adingpaw Pachia, miding hae laanpi kha naebabing lan na raepya hae.

⁸Pou BAWIPAW , na laanpi kha kae zui zah, nang kha kae ngaehoiku; na min te na minthaannaw kha ka thinlung nynh a ry.

⁹Khuazi ccyh kya ka thinlung nynh nang kha ae ngae, ka lungkhu e ka thinlung nynh nang kha thawmawte ae ccung. Laephi kha bya na pia vae ze, laephipi kya a um hae paw nynh dingnaw kha a ccangku hae.

¹⁰Ccungccaw hoyleipaw nynh tuh maehoynaw na pya zemah, dingnaw kha ccangkuh khyh; dingnaw ram khe hoyleinaw kha rae zah, BAWIPAW lesaenaw kha pawlangria khyh.

¹¹Pou BAWIPAW , na kuih na hangthung zemah, minmin nynh muih khyh hae. Na ccungccaw hae hanlan na lungthawsaenaw kha muih hae sah lah, mih maethah sah. Maee nynh na rhaw hae kha u hae sah.

¹²Pou BAWIPAW , kaening hanlan daenaw nae pya cih, pawccecize accaccingte, kae la cyi kho vae paw balyn hynh kaening hanlan nae cyipyapaw nynh thua.

¹³Pou BAWIPAW kae Pachia, namaw holeite ccangpaw bawipaw hae nynh oun la uk vae hae, thuasalama nang na min rou kha nynh kae ny.

¹⁴Tuh-e bawipaw hae tuh chih vae hae zah hiinthui vae lan khyh hae; mih muisaw tuh thoothui lan khyh, pawccecize minmin kha de na tah hae zah na ro vae hae, te minmin liathuinaw lanpaw balyn kha na ro vae.

¹⁵Pou BAWIPAW , kae minphuin kha nae pungzaesah vae, kae minphuin kha nae pungzaesah vae keiccuze phu-esah na thua vae; kae ram kha po lekuh lan na kosah vae.

¹⁶Pou BAWIPAW , minmin nynh vawsaw a tung vae hae ze, nang kha ae ccung hae, na thuihei vae hae ze, na kalan saw a sang hae.

¹⁷Ccaaw a poipaw nopi nynh a sawkyh zah a pui dyn vae ze, neitangia teing zah a sia hawte, pou BAWIPAW , nang na keiccuze tuhawte nynh kae teing,

¹⁸kaening tuh neitangia kae teing zemah accakaepaw rou kha nynh ccaaw lang kae saah. Laephi vawlan kae taepaw um khyh, laephipi kya khuasah khylan ccaaw lu kheit sanmah kae saah khyh.

¹⁹Na michi hae tuh a hiinthui cih hae, mih rhua tuh a thoothui cih. Pou laenoi kya um hae paw, nae inaw kyate thaekuh oh lah, lungtuate hlawsah oh! Na dangtui nynh laephi kha hinlalyh lan a hinsah thui hawte, laephi nynh a chih vae paw kha a hiinsah thui cih.

²⁰Ka ccungccaw hae, rang oh, nae innkhaan lungkhu lang tee oh lah, thuakaw khawsungkuh oh; thinrianaw ccyh athang mawlaezung sosoh rekuh oh.

²¹Pawccecize laephi ccungccaw hae kha mih hoyleinaw keiccuze detah khylan BAWIPAW tuh a umnaw kyate yn toikuh vae; tetuh laephi nynh a vawlan aluapaw chiise kha a langsakuh cih zah, laephi vawlan a chia hae paw kha thuruh vae lan khyh.