Read Zotung Chin ISAIAH 27 Bible Online

ISAIAH 27 - Zotung Chin bible

ISAIAH 27

¹Tuin nin khe BAWIPAW nynh arysawthahpaw, alesaepaw te athungpaw a thaloi khate a ccuepaw Leviathan[4] hupi, a kuekuhpaw Leviathan hupi kha de a tah cih zah, rili lungkhu umpaw nakaa-hupi kha a theih cih.

²Tuin nin khe lungpaw lan a umnaw misu khokhu kong kha hynhte hlawsah oh!

³Kae, BAWIPAW tuh misu khokhu a ngawtu nynh ka thua; khokhu kha atu te atu tui ka bu. Humhung nynh mah a ro kho khyh nawlan khuazi khuadae phang ka rin.

⁴Ka thinria vae khyh. Khah-e khokhu kya hinpaw phin a um hae ze, ro lan ka ccianua cih zah, maee te ka u cih.

⁵Tuhkhyhze thungkhawnaw mue khylan ka kalan beekuh hae sah lah, kamaw te ccawkunaw rae hae sah, kamaw te ccawkunaw rae hae sah.

⁶Tuin nin vae tuh Jakob nynh a tharui a saw cih, Israel tuh apaw paw cih zah a thae cih, te laephi pynpi kha athae te phe a biasah cih.

⁷Israel kha BAWIPAW nynh a zia a buapaw tuh, Israel rhaw hae kha a zia a bua hae hawte athua zawtou? Israel a theihtupaw kha chia athua hawte, Israel kha chia athua zawtou?

⁸BAWIPAW nynh minmin kha ramccang lang deenaw khate de a tah hae; Nithua lang e khise khate minmin kha a mungsah hae.

⁹Lung rawpaw kha ditaraw lan koi athua hawte, silawhang kya-e lung balyn kha koi zah, athyaapaw tungpi hae te mynkhuh unawpaw silawhang kha he a khulia hae te, Jakob a cyiseinaw kha a ngaethya cih, e hynh a seinaw thyaasah athuanawpaw athae nynh thua:

¹⁰Khualungrua te koihlukuhpaw khuapi tuh daetedae zah, ramkaw hawte cciataw te vuasyapaw ahmin lang nynh a tang vae; tuin kyakhe vaetuataw hae tuh a paeekuh hae, tuin kya rya hae zah atoih thawpaw kha a bouku hae.

¹¹Akaran hae tuh he arou hae te a khya hae; nopi hae nynh thuanua hae zah maeething lang a mang hae. Pawccecize minmin tuh hawnaw a hoi leipaw minphuin nynh thua; tukeiccuze minmin a raetupaw nynh minmin kha ngaethyaumsah lan khyh hae zah, thawccih lan khyh hae.

¹²Pou Israel ccungccaw hae, tuin nin khe BAWIPAW nynh Zufrates vawpi kyate Izip ramri cia ccahyn te ccangphaw phia hawte ae phia cih oh zah, nanning tuh lu kheit koute lu kheit suelua na thua cih oh.

¹³Tuin nin vae tuh, mungkae pipi kha tuu athua cih, te Assiria ram kya a zo hae paw te Izip ram lang dee athua hae paw tuh oun thua cih hae zah, Jerusalem khua athyaapaw mua vawlan khe BAWIPAW kha a beik cih hae.