Read Zotung Chin ISAIAH 28 Bible Online

ISAIAH 28 - Zotung Chin bible

ISAIAH 28

¹Misutui a rui hae paw, looh patae te a thokhaekuh hae paw mih lu kya a umpaw, Efraim phin aruithya hae paw kya-e lysakunawpaw haetapawsi te minmin kya-e aphu-e zah apuithyapaw te anaanthyapaw haetapaw hanlan ngaethya lan kou um!

²Dotua, BAWIPAW nynh athawsaepaw te athungpaw ccungccaw kha a hoi; tuh-e ccungccapaw tuh hya a ccawbiapaw khise, uccaw arosah thyapaw khise hawte athua cih zah, athawsaepaw khise, paepae leikuh lan alepaw tui hawte athua cih; tuh-e paw nynh a kuih te minmin kha laekhu khe a deihnah cih hae.

³Efraim phin aruithya hae paw kya-e lysakunawpaw haetapawsi tuh ccu te syde athua cih.

⁴Looh patae te a thokhaekuh hae paw mih lu kya a umpaw aphu-e zah apuithyapaw te anaanthyapaw haetapaw tuh hawnin azaw maw athae typaw thaeku thae hawte athua cih; tuh-e athae a muihpaw miakaw nynh a kuih kya he athua te palou a ae.

⁵Tuin nin kya vaaw BAWIPAW tuh a laehypaw a ccungccaw hae hanlan aphu-epaw haetapawsi, apuithyapaw bawilukhung athua cih;

⁶byapianaw kya a haung hae paw kha dingnaw thinlung a pya cih hae zah, khua koikua kyakhe rhaw hae a kisahtu hae paw kha thawzung a pya cih hae.

⁷E hae zemah misutui keiccuze vyavya khuliakuh hae zah, ruithyapaw keiccuze tangkitangkae lante a cceih hae; ranpibawi hae te profeh hae tuh ruithyapaw niapaw keiccuze vyavya a khuliakuh hae, misutui keiccuze mih lungzo, ruithyapaw niapaw keiccuze tangkitangkae lante a cceih hae; minmin nynh a muih hae paw vizin tuh phe sei zah, mimaw nynh bya a piapya hae paw kyakhe a thy a pawkuh hae.

⁸Mih ccaboi balyn tuh anungsikuhpaw lua te phe beih zah accikankunaw hmin um khyh.

⁹“Aning nynh hum kha mou hawnaw a ccangpah cih zah, hum kha mou phungbya kha a hopah cih? Mateitui kyate phiapaw, nung matei kyate phiapaw tuh hummou athua?

¹⁰Phunglang ccangkheit vawlan ccangkheit, aring ring kheit vawlan ring kheit, ccangku lanpaw kha ccangkheit koute ccangkheit te nynh athua,” cite minmin nynh a ci hae.

¹¹Thanccingte, a kawccae leipaw mung te ramccangpaw munglae khate e ccungccaw hae hynh aning nynh a hopah cih hae.

¹²Aning nynh minmin kha, “E hynh haeungnaw, mih riathae hae paw hanlan ngaengannaw nynh thua, e hynh thawdangnaw nynh thua,” cite a hopya hae zemah, minmin nynh thaepah khyh hae.

¹³Tukeiccuze minmin nynh a ccia hae ze, nulang khuliakute, khyate, kaangkae te, kyng athua nawlan hae, BAWIPAW bya tuh minmin hanlan, “Phunglang ccangkheit vawlan ccangkheit, aring ring kheit vawlan ring kheit, ccangku lanpaw kha ccangkheit koute ccangkheit,” cite a um.

¹⁴Tukeiccuze Jerusalem kya umpaw e ccungccaw hae a uktu nanning a puatho hae paw, BAWIPAW bya hynh ngaetua oh.

¹⁵Pawccecize nanning nynh, “Chinaw te byakinnaw kha phe ah rae vae oh, Michi khua te nawccawnaw phe ah hoi vae oh; vawsawnaw he yn thua ze, aening kalan thua vae lan khyh; pawccecize lingnaw kha khynnaw lang phe ah thuruhkuh vae oh, hynbya kyakhe phe ah thuruh vae oh,” na ci oh,

¹⁶tukeiccuze Bawipaw PACHIA nynh hynhte a ho, Zion kyakhe athonaw aleihpaw lung, syntawtuapaw lung, aphutepaw apaki lang e abyapi huapaw lung, atynpaw athonaw aleihpaw ccangkheit kha ka bing cih, tuh-e lung kyakhe, “A zynpaw tuh siikuh lan khyh,” cite a um.

¹⁷Byading kha aphae lang tounawpaw arui lang ka rae cih zah, dingnaw kha akaw lang tounawpaw arui lang ka rae cih; hya nynh khynnawpaw hynbya kha phe zo lan a ccawphu cih zah, tui alepaw nynh rekunawpaw kha avu cih.

¹⁸Tetuh chinaw te na raekheih oh paw byakinnaw tuh aroh cih zah, Michi khua te na raekheih oh paw nawccawnaw tuh azo cih; vawsawnaw he yn thua te, nanning kha ae khulia cih oh.

¹⁹Tuh-e vawsawnaw nynh atu te atu ae thuanua cih oh zah, ae lah cih oh; pawccecize tuh-e vawsawnaw nynh awkhua takyhte, khuazi khuadae ae thuanua cih oh; tuh-e konglang thae kyalya mawte rinaw a um cih.

²⁰Ikhung tuh a dyngku nawlan myaryamaw dyn zah, boei tuh a thyku lan myaryamaw abypaw ccungccapaw hawte na thua cih oh.

²¹BAWIPAW tuh a la cyimaepaw te alokuh leipaw kha cyi khylan te, a la lawmaepaw a ryalaw te alokuh leipaw a ryalaw kha law khylan, Perazim Mua vawlan a thoku hawte yn thokuh cih zah, Gibeon accya kya a thinria hawte aria cih.

²²Tukeiccuze atu puasakuh nan vae oh, tuhkhyhze tuh houh accih lante ae heede cih oh; pawccecize ram pynpi mawte ronaw a um cih cipaw kha vaaw BAWIPAW kyate ka thae vae.

²³Ngae oh lah, ka roi hynh thaetua oh; ka hopaw bya hynh hoyte thaetua oh.

²⁴Leithuepaw nynh ccacii lin nawlan thue kyalya po thue zah, a laephi kha thyhleih kyalya po a thyhleih zawtou?

²⁵Lei kya-e laephi kha he a nginsah koute, pucinan te khanmuin kha lin khyh hae tou? Chanvuih kha atantante, barli kha angaekunaw hmin khe ccou zah, loori kyakhe ccangpaw ccacii hae kha ccou khyh tou?

²⁶Pawccecize a Pachia nynh ryalawthyanaw kha hoyte a ccangpya.

²⁷Pucinan amung kha khua nawlan thingphe kha mang khyh hae, khanmuin amung khua nawlan vaetuale ccu kha mang khyh hae, thuasalama pucinan amung kha ccungngue taraw te khua hae zah, khanmuin kha mah ccungngue te nynh a khua hae.

²⁸Chanvuih vui kha a tin hae; thuasalama khah-e kha zungzae po tin khyh hae, leccu te marang khate miasah hae zah, aphaw kha palae tui lan mia khyh hae.

²⁹E hawnaw hynh mah vaaw BAWIPAW kyate nynh yn thua; a tuanaw pyapaw tuh ngaeangthua lan um zah, a hawnaw tuh myarya ahang.