Read Zotung Chin ISAIAH 29 Bible Online

ISAIAH 29 - Zotung Chin bible

ISAIAH 29

¹Ariel khua, David a umnaw Ariel khuapi hanlan ngaethya lan a um baban! Kum kheit koute kum kheit poi hae kha tua hae sah.

²Tuhzemah Ariel khua kha a ria ka thaesah cih zah, rawkhuinaw te ngaethyanaw a um cih, te Jerusalem tuh kae ka hanlan Ariel khua hawte athua cih.

³Te David hawte nang kha rhawkaw phu kae nungnua cih; rhawviainn hae khate nang kha kae koihlu cih zah, laekarung thaenuakute kae rawse cih.

⁴Tetuh laephi akaw langte bya na ho cih, laenoi lungkhu te zyazyate accaepaw na roi tuh yn ccae cih; na roi tuh laephi lungkhu te khozi roi hawte accae cih zah, bya na hopaw tuh laenoi lungkhu te zyazyate accae cih.

⁵Thuasalama na rhaw hae patae tuh ditarawpaw vuiping hawte athua cih hae zah, rysawthah hae paw patae tuh azoupaw vaekang hawte athua cih hae. Te arangte, vaekheitmawte,

⁶vaaw BAWIPAW nynh kholung te innry te myarya ccaepaw roi te thuasah, khiccung te khise te arua cciamangpaw maeesoi te thuasah na kalan yn thua cih.

⁷Ariel khua a dou hae paw minphuin patae balyn, Ariel khua te Ariel khua e lungrua te akoihkhawkuhpaw kha a dou hae paw balyn, te Ariel khua kha riathaenaw a pya hae paw balyn tuh maan hawte athuapaw khuazi kya-e vizin hawte athua cih hae.

⁸Zion Mua a dou hae paw minphuin hae patae tuh, a vuelawpaw nynh a maan kya a ae zemah he yn thaekuh tuh a vuelaw mamin hawte thuasah, a tuihawpaw nynh a maan kya tui a nia zemah he yn thaekuh tuh a tuihaw mamin hawte thuasah athua cih hae.

⁹Naemaw toulou kha ngaeesakuh oh lah, ngaee ccaleih oh, naemaw toulou kha nae mit mohsakuh oh lah, nae mit tuh moh ccaleih sah! Misutui nia leite rui ccaleih oh; ruithyapaw atui nia leite vyavya khuliaku tua oh!

¹⁰Pawccecize BAWIPAW nynh nae i ae thuasah oh zah, nae mit ae masisah vae oh, profeh hae, nae piccan hae, beidin sazae hae kha mih mit phang a hu vae hae.

¹¹E vizin hae balyn hynh nanning hanlan tazeih khiapaw ccaw te nynh aloku. A riathyapaw kha pya lan zah, “E hynh riatua,” ci lanze, aning nynh, “Tazeih a khiaku keiccuze ka ria kho khyh,” a ci.

¹²Te a riathya leipaw kha pya lan zah, “E hynh riatua,” ci lanze, aning nynh, “Ka ria kho khyh,” a ci.

¹³BAWIPAW nynh, “E ccungccaw hae nynh mih khalang te ka kalan naekuh hae zah, mih munglae te saw oun tua hae, mih thinlung tuh ka kyate asawkuh, minmin nynh kae yn beiknaw hae paw tuh ciakute a ccangku hae paw ccungccaw kawbya kha nynh thua;

¹⁴tukeiccuze e ccungccaw hae kya siiku lan umpaw te ngaeangthua lan umpaw uccaw hae kha bua ka rae cih. Minmin kya-e a haw hae paw hawnaw tuh aroh cih zah, a nyhthya hae paw kya-e nythyanaw tuh thuruh athua cih,” a ci.

¹⁵Akhupaw mih paccynkunaw kha BAWIPAW nynh nyh nan sah cite thuruh hae zah mohnaw kya ryalah hae paw, “Hum nynh mou aening hynh oun muih cih? Hum nynh mou oun nyh cih?” cite a ho hae paw nanning hanlan ngaethya lan kou um!

¹⁶Nanning nynh uccaw hae kha phe na buleih oh! Ang a raetupaw kha anglae lang ria lan accan zawtou? Raepaw uccaw nynh amaw a raetupaw kha, “Aning nynh kae yn rae khyh,” cite a ho cih tou? Tuhkhyhze, “Aning tuh hawnaw hoi khyh,” cite a ho cih tou?

¹⁷Ccyh sosoh kya, Lebanon tuh looh avoipaw loo lang tang lan khyh tou? Looh avoipaw loo tuh ramkaw lang tang lan khyh tou?

¹⁸Tuin nin kya tuh mih nawpanpaw nynh akuekuhpaw ccaw kya-e bya hae kha a thae cih hae zah, ngaethyanaw te mohnaw lungkhu a um hae paw mitmoh hae nynh ngaw a muih cih hae.

¹⁹Zakawsangsakuh hae paw tuh BAWIPAW kya lungtuanaw thawpaw a mue cih hae zah, ahobou huacce hae paw tuh Israel Pachia Athyaapaw kya mih lungpaw cih.

²⁰Pawccecize rysawthah hae paw um vae lan khyh hae zah, ccungccaw a sarya hae paw tuh azo vae cih hae; hoyleinaw rae lan mih lungzuapaw balyn tuh maemih athua cih hae,

²¹kaethekunaw kya phe shungsah cite ccungccaw tungvaw rya a lahpaw, byapianaw koikua kya hopiatu kha kaang a syakhawtupaw, adingpaw ccungccaw kha byading te bya a piapah lei hae paw tuh maemih athua cih hae.

²²Tukeiccuze Abraham a shawkhawtupaw BAWIPAW nynh Jakob ciihan te asekuh lante a hopaw tuh: Jakob phin tuh a maethah vae lan khyh, a maesue roh vae lan khyh.

²³Minmin nynh mih ccaaw hae te ka ryalawnaw kha he a muih hae tuh, ka min kha saw a tua cih hae; Jakob Pachia Athyaapaw kha saw a tua cih hae zah, Israel Pachia kha a rih cih hae.

²⁴Mingaee hae nynh nythyanaw a hoi cih hae zah, bo a mang hae paw nynh thuiheinaw kha a ngae ry cih hae.