Read Zotung Chin ISAIAH 32 Bible Online

ISAIAH 32 - Zotung Chin bible

ISAIAH 32

¹Dotua, dingnaw te a ukpaw siapharan lu kheit yn um cih zah, a kuihkaw e bawi hae nynh mah byading te a uk cih hae.

²Minmin tuh khisan kyate rekunaw hmin hawte thuasah, khise kyate khynnaw hmin hawte thuasah, ramrou kya a luapaw vawkhu hawte thuasah, asonaw ram kya umpaw myarya lepaw lungpi mynlyh hawte thuasah athua cih hae.

³Ngawmuih hae paw mit nynh ccaerarih lan a muih cih zah, nawthae hae paw nakaring nynh naw a ngae cih.

⁴Tueruamaerua a cyihthya hae paw thinlung nynh tuasethyanaw a hoi cih zah, mih lae-ah hae paw munglae nynh arangte ccaepapeih lan bya a hothya cih.

⁵Mingaee kha asung-epaw ccungccaw cite ko vae lan khyh hae zah, ccungccaw hoyleipaw kha sawtua lan umpaw cite ko vae lan khyh hae.

⁶Pawccecize mingaee nynh ngaeenaw bya kha ho zah, a thinlung te ahoy leipaw kha a paccyn: A cyisahnaw kya Pachia rawrinaw um khyh, BAWIPAW konglang akyh leipaw bya kha a ho, looh kanmawpaw kha looh dang boi khyh zah, tui kanmawpaw kha tui pya lan a kang.

⁷Ccungccaw hoyleipaw nynh ahoy leipaw kha a cyi; ahobou hae paw nynh mih hanpaw kha hmerarih lante a ngiaku hae heize, ryachi hae kha hynbya te ro khylan ahoy leipaw kha a paccyn hae.

⁸Thuasalama asung-epaw ccungccaw nynh tuh asung-epaw uccaw hae kha paccyn zah, asung-epaw uccaw hae liate tynkaring lan a thadyn.

⁹Thawdangte a um hae paw nopi hae, thokuh oh lah, ka roi hynh ngaetua oh; a sawphahkuhpaw nopi taraw hae, ka hopaw hynh ngaetua oh.

¹⁰Lungdaete a um hae paw nanning, kum kheit lae ccapyh aro te, thinphangte na um cih oh; pawccecize misu thae loo lanpaw na hoi lan khyh oh, ccathae rue ccyh um lan khyh.

¹¹Thawdangte a um hae paw nopi hae, thyngku tua oh, a sawphahkuh hae paw nanning, thinphangte umtua oh, nae boeining khahkute nae sasete um oh lah, nae tae kya buriboei kha voiku tua oh.

¹²Lungrythua lan umpaw loo hanlan te patae athaepaw misu ku hanlan ngaethyate nae by kha tukuh oh,

¹³pawccecize ka ccungccaw hae laephi kha thuasah, a lungpawpaw khuapi kya umpaw a lungtuapaw innbyn hae balyn kha thuasah hinpaw te thabu hae nynh pong a zithin hae.

¹⁴Siapharan inn kha vuasya athua cih zah milu alungpaw khuapi kya ccungccaw phe adae cih; inn hae te rhawviainn hae tuh sarangpaw umnaw akarung lang zungzae a tang cih zah, ramkaw e lann hae mih lungpawnaw hmin, tuu hae a paeenaw hae hmin lang a tang cih;

¹⁵te Pachia nynh a muisaw kha kaening tungvaw oun sawpah zah, ramkaw tuh athae alungpaw loo lang tang zah, athae alungpaw loo tuh ramkaw lante tua athua mawlaezung tuhcite acyihkuh cih.

¹⁶Tetuh byading tuh ramkaw kya a um cih zah, dingnaw tuh athae alungpaw loo kya a um cih.

¹⁷Dingnaw athae tuh daenaw nynh thua, dingnaw athanenawpaw tuh zungzae daenaw te khynnaw nynh thua.

¹⁸Ka ccungccaw hae tuh adaenaw, akhynnaw te adaepaw haeungnaw hmin kya a um cih hae.

¹⁹Hya accaw keiccuze ramkaw tuh marya azo cih zah, khuapi tuh laephi te phe nging lan khaleih ating cih.

²⁰Tui a umnaw miakaw kya ccacii ccou hae zah, vaetua te lann hae kha rythyte a saw hae paw nanning tuh lungtua hae paw nynh na thua oh.