Read Zotung Chin ISAIAH 34 Bible Online

ISAIAH 34 - Zotung Chin bible

ISAIAH 34

¹Pou minphuin hae, nawthae khylan oun naeku tua oh; Pou ccungccaw hae, hoyte ngaetua oh! Laephi te laephi kya a umpaw balyn nynh thuasah, laephipi te laephipi kya a umpaw balyn nynh thuasah thae hae sah.

²BAWIPAW tuh minphuin hae balyn tungvaw a thinria zah, mih rhawkaw hae balyn tungvaw kya mah myarya a thinria; minmin kha phe a maemih vae hae, chianaw kalan a ap vae hae.

³Mih rhua kha ccaring vua athua cih zah, mih rhua tuh athuh cih; mih chiise te mua hae tuh tui lang alua cih.

⁴Vaawlui kya a um hae paw balyn tuh pong akoi cih hae zah, vaawlui tuh ccaw akuekuhpaw hawte akuekuh cih. Vaawlui kya a umpaw balyn tuh misu ku kya baleih anaanpaw misu naw hawte anaan cih hae zah, thaeku ku kya karae aroupaw thaeku thae hawte arou cih hae.

⁵Ka thaloi tuh vaawlui kya he ka paccyn koute, Edom ram vawlan te byapia khylan ka nungdae vae paw ccungccaw hae tungvaw kya accah cih.

⁶BAWIPAW thaloi tuh chiise te phe byn vae, atho khate thuasah, tuutaw chii te miaa chii khate thuasah, tuutepaw akin kya-e atho khate thuasah phe a byn vae. Pawccecize BAWIPAW nynh Bozrah khua kya silawnaw kha rae zah, Edom ram kya myarya lepaw chianaw kha a rae vae.

⁷Ccungccaw hae tuh kuarang hae te tangnua taraw hae hawte a chih cih hae. Mih ram tuh chiise kya a ciakuh cih zah, mih laephi tuh atho te phe abeih cih.

⁸E ccyh tuh BAWIPAW nynh Zion kha luesah zah Zion a rhaw hae tungvaw phu a law ccyh athua cih.

⁹Edom ram e vawkhu hae tuh kahtaza lang a tang cih zah, a laephi tuh kemaee lang a tang cih; a ram tuh maee a u cciamangpaw kahtaza lang a tang cih.

¹⁰Khuazi khuadae maee chih lan khyh; a maeekhuh tuh zungzae akhuhthung cih. Ram tuh she kheit koute she kheit ccungkia vae lan khyh; ram lungkhu a cceih bungthungpaw hum sanmah po um vae lan khyh.

¹¹Tuh-e ram tuh mosi te sazi hae ram lang a tang cih; nawnia te va-aw tuh tuin ram kya a um cih hae. BAWIPAW nynh tuin ram kya keisukeilaenaw te accakaepaw thuanaw arui kha a raw cih.

¹²Ram a uktu siapharan um lan khyh zah, cciakhaetu hae balyn tuh um vae lan khyh hae.

¹³Siapharan inn hae kya te rhawlungrua hae kyakhe hinpaw aphuinphuin a po cih; suizaw te kalauh pavaw hae umnaw lang a tang cih.

¹⁴Tuin kyakhe samaaw hae te ram-ui hae tuh a tungkuh cih hae, sathaw hae tuh sa kheit te sa kheit a kokuh cih hae; Tuin kyakhe Lilih pavaw hae tuh a haeung cih hae zah haeungnaw hmin kha a muihkuh hae.

¹⁵Nawnia nynh bu a luakuh cih, a tui kha a tui cih zah, a ccong koute yn keipaw a taw hae kha a do-oih cih hae; lantaw hae nynh mah tuin kya a sueluakuh cih hae zah, api te atepaw ccarou a mungkuh cih hae.

¹⁶BAWIPAW ccauh lungkhu khe ccung oh lah, riatua oh: Tuh-e sarangpaw hae tuh sa kheit sanmah zo lan khyh hae; ruiban a hoi leipaw sa kheit sanmah um lan khyh. Pawccecize BAWIPAW nynh kawpya zah, a muisaw nynh khah-e hae kha a suelua vae hae.

¹⁷BAWIPAW nynh minmin hanlan ccungthydungnaw raepah hae zah, a kuih khate mih hanpaw kha arui rawkhawpyate a neethung hae; minmin nynh tuh-e ram tuh zungzae a pee cih hae zah, she kheit koute she kheit tuin ram kya a um cih hae.