Read Zotung Chin ISAIAH 36 Bible Online

ISAIAH 36 - Zotung Chin bible

ISAIAH 36

¹Hezekiah Siapharan nynh Judah ram a uknaw kum haw lae palinaw kum khe, Assiria siapharan Sennakherib nynh Judah ram e rhawlungrua te akoihlukuhpaw khuapi hae balyn kha ccianua thung zah a law hae.

²Assiria siapharan nynh Rabshakeh kha rhawkaw patae ryte Lakhish khua kyate Jerusalem umpaw Hezekiah Siapharan kalan a saw. Rabshakeh tuh Boeikuatu hae Loo lang cceihpaw laanluepi pe umpaw palung tuili kya-e tuizypi pe khe a thadyn.

³Te Hilkiah ccapaw, siapharan inn do-oihtu Eliakim, ryaccinkhan Shebnah te Asaf ccapaw ccawzeitu Joah tuh amaw kalan oun cceih hae.

⁴Rabshakeh nynh minmin kyakhe, “Hezekiah kha hynhte la hopah oh: Alesaepaw siapharan, Assiria siapharan nynh hynhte a ho: E na zynkunaw hynh paw tungvaw kya mou na tynsah?

⁵Bya maesae hynh rhawtuknaw hanlan thyanaw te thungnaw nynh thua cite vosi na tua? Kae kha dou lan ciate hummou na doliaku?

⁶Akhyapaw phaeku hoitang te alokuhpaw Izip ram kha na doliaku, khah-e phaeku a doliakuhpaw miakaw tuh khah-e phaeku nynh a kuih kha po zua lan a thuing cih. Izip siapharan Faro tungvaw a doliakuhpaw balyn kyakhe Faro nynh tuhcite a cyi.

⁷Thuasalama nanning nynh, ‘BAWIPAW kae Pachia kha kae doliaku,’ na ci oh ze, aning tuh Hezekiah nynh Judah hae te Jerusalem khuaccaaw hae kha, ‘E silawhang malang hin na beik cih oh,’ cite hopah hae zah, a hmin hangpaw hae te a silawhang hae a ropyapaw pachia kha thua khyh tou?

⁸Te atu ka bawipaw Assiria siapharan kyakhe byakinkuh oh: Nanning nynh marang a ccikuh khopaw na mue oh ze, marang thong ning kae pya cih oh.

⁹Nanning nynh marangle te marang rhawkaw hae kha mue khylan Izip ram kha doliakute, ka bawipaw kya-e ryalahtu adihhua hae paw laku e rhawbawi lu kheit sankaw kha pawtemou na dou kho cih oh?

¹⁰Tuhpiaze, e ram ro khylan kae ccianua thungpaw hynh BAWIPAW bawmnaw leite athua zawtou? BAWIPAW nynh, E ram hynh ccianua thung lah, rotua, yn cipya,” cite a hopya hae.

¹¹Tetuh Eliakim, Shebna te Joah nynh Rabshakeh kyakhe, “Thawccinawte na ryalahtu hae hynh Aramaik bya te beih oun hopah, pawccecize mang kae thae; khualungrua vawlan a um hae paw nynh a thae lan hae te, Judah bya te oun hopah nan,” a cipya hae.

¹²Rabshakeh nynh, “Ka bawipaw nynh e bya hynh nae bawipaw te nanning kalan ho lan yn saw zawtou? Khualungrua vawlan haung hae zah, nanning ryte mih ia kha aete mih zuin a neih cih hae paw kalan yn saw khyh tou?” a ci.

¹³Te Rabshakeh nynh thadyn zah Judah bya te thawte sia zah, “Alesaepaw siapharan, Assiria siapharan bya hynh ngaetua oh!

¹⁴Siapharan nynh hynhte a ho: ‘Hezekiah kha lingsakuh nan oh, pawccecize aning nynh nanning kha ae luesah kho lan khyh oh.

¹⁵BAWIPAW nynh aening hynh oun luesah ccaccing cih; e khuapi hynh Assiria siapharan kuih kalan pya lan khyh, cite hopyate Hezekiah nynh nanning kha BAWIPAW tungvaw ae doliasakuh nan oh sah,’ a ci.

¹⁶Hezekiah bya kha ngae nan oh; pawccecize Assiria siapharan nynh hynhte a ho: ‘Kae te ccawkunaw rae oh lah, ka kalan oun cceih oh; tetuh nae misu ku te nae thaeku raveih kya-e kha na ae cih oh zah, naemaw tuisung kya-e tui kha na neih cih oh,

¹⁷nae ram te alokuhpaw ram, ccathae te misutui apounaw ram, sanlou te misu khokhu a umnaw ram lang nanning kha cciakhae khylan kae thua mawlaezung tuhcite la cyih oh.

¹⁸BAWIPAW nynh oun khum cih, cite hopyakute Hezekiah kha cciakhae seisakuh nan oh. Minphuin hae kya-e pachia hae nynh mih ram kha Assiria siapharan kuih kyate a khum hae tou?

¹⁹Hamath khua te Arpad khua kya-e pachia hae tuh teimou a um hae? Sefarvaim khua a pachia hae tuh teimou a um hae? Tuh-e pachia hae nynh Samaria ram kha ka kuih kyate a luesah hae tou?

²⁰E ram hae kya-e mih pachia hae balyn nynh mih ram hae kha ka kuih kyate a khum boi paw pachia a um tou? BAWIPAW nynh ka kuih kyate Jerusalem kha pawtemou a khum kho cih?’ a ci,” cite a hopya hae.

²¹Ccungccaw hae tuh bya kaw kheit san khungru leite yccae leite a um hae, pawccecize Hezekiah siapharan nynh, “La khungru nan oh,” cite kaw a pya hae.

²²Tetuh siapharan inn do-oihtu Hilkiah ccapaw Eliakim, ryaccinkhan Shebna te Asaf ccapaw ccawzeitu Joah nynh mih boeining seiikute Hezekiah kalan oun thua hae zah, Rabshakeh nynh a hopaw bya kha a hopya hae.