Read Zotung Chin ISAIAH 37 Bible Online

ISAIAH 37 - Zotung Chin bible

ISAIAH 37

¹Hezekiah Siapharan nynh tuh-e bya kha he a thae te, a boeining kha seii zah buriboei kha a zingku, te BAWIPAW beikinn lang a cceih.

²Siapharan inn do-oihtu Eliakim, ryaccinkhan Shebna te buriboei a zingkuh hae paw ranpibawi piccanhua hae kha Amoz ccapaw profeh Isaiah kalan a saw hae.

³Minmin nynh Isaiah kyakhe, “Hezekiah nynh a hopaw bya tuh: Atunin tuh ngaethya nin, thuihei nin te thethya nin nynh thua; imua pui zaw zah a pui nawlan thawzung um khyh.

⁴Ahiinpaw Pachia kha sarya khylan Assiria siapharan nynh yn sawpaw a ryalahtu Rabshakeh bya kha BAWIPAW na Pachia nynh la thae vae sah, te BAWIPAW nae Pachia nynh a thaepaw bya kha detah vae sah; tukeiccuze a laehypaw ccungccaw hae hanlan saw la sang,” a cipya hae.

⁵Hezekiah Siapharan a ryalahtu hae nynh Isaiah kya he a thua hae te,

⁶Isaiah nynh minmin kyakhe, “ ‘BAWIPAW nynh hynhte a ho: Assiria siapharan a ryalahtu hae nynh ka thethya yn ho hae paw bya kha na thae keiccuze rih nan.

⁷Aning nynh laanbya kha thae zah a ram lang a ki nawlan, a thinlung kya ka sang cih; a ram kyakhe thaloi te ka chisah cih a ci,’ cite nae bawipaw kha la hopah oh,” a cipya hae.

⁸Rabshakeh tuh yn ki zah, Assiria siapharan nynh Libnah khua a tuk cciamangpaw kha a muih; pawccecize siapharan tuh Lakhish khua kyate a pou vae cipaw kha a thae vae.

⁹Te Ethiopia Siapharan Tirhakah tuh Assiria rhawkaw kha dou khylan yn thokuh vae cipaw kha Assiria siapharan nynh he a thae te, locceihtu hae kha Hezekiah kalan saw hae zah,

¹⁰“Judah Siapharan Hezekiah kha hynhte na hopah cih oh: Jerusalem tuh Assiria siapharan kuih kalan pya thua lan khyh, cite ae kinpyakupaw bya khate na Pachia kha lingsakuh nan.

¹¹Assiria siapharan hae nynh ram hae balyn kha khaleih roh hae zah pawtemou a cyi hae cipaw kha phe na thae vae. Na lue cih zawtou?

¹²Ka minpaaw hae nynh a la ro hae paw Gozan, Haran, Rezef khua hae te Telassar khua a um hae paw Eden ccungccaw hae kha mih pachia hae nynh a khum hae zawtou?

¹³Hamath siapharan, Arpad siapharan, Sefarvaim khuapi e siapharan, Hena siapharan te Ivvah siapharan kha teimou a um hae?” cite ccaw a ky.

¹⁴Hezekiah nynh tuh-e ccaw tuh locceihtu hae kuih kyakhate lawkuh zah a ria; oute Hezekiah nynh BAWIPAW beikinn lang cceihthung zah, tuh-e ccaw tuh BAWIPAW malang khe a daw.

¹⁵Hezekiah nynh BAWIPAW kalan sawsang zah a hopaw tuh:

¹⁶“Cherubim vawlan a haungpaw, pou vaaw BAWIPAW , Israel Pachia, nang tuh Pachia nynh na thua, laephi vaw e peenaw balyn kyaze nang rou nynh Pachia na thua; vaaw te lae kha na rae.

¹⁷Pou BAWIPAW , na nakaring kha beih yn tuakuh lah thaetua; pou BAWIPAW , na mit kha dae lah beih muihtua; Sennakherib nynh ahiinpaw Pachia kha sarya khylan ccungccaw sawte a hosah hae paw bya balyn kha thaetua.

¹⁸Thanccingte, pou BAWIPAW , Assiria siapharan hae nynh minphuin hae te mih ram hae balyn kha roh hae zah,

¹⁹mih pachia hae kha maee lungkhu a phungpya hae, tuh-e pachia hae tuh pachia thua khyh hae, ccungccaw kuih te raepaw thing te lung athua hae keiccuze ro athua vae hae.

²⁰Tukeiccuze, pou BAWIPAW kae Pachia, kaening hynh Assiria siapharan kuih kyate oun khumtua, tuhteze nynh laephi vaw e peenaw balyn nynh, nang rou nynh BAWIPAW na thua cipaw kha a nyh cih hae,” a ci.

²¹Tetuh Amoz ccapaw Isaiah nynh Hezekiah kalan ccungccaw saw hae zah, “Israel Pachia BAWIPAW nynh hynhte a ho: Assiria Siapharan Sennakherib te asekuh lante ka kalan saw na sang keiccuze,

²²BAWIPAW nynh aning te asekuh lante bya a hopaw tuh hynhte nynh thua: ‘Ccanung liaccady Zion nynh nang kha pawlang ae ria khyh zah ae nuinse; Jerusalem ccanung nynh na nulangte a lu ae henua.

²³‘Nang nynh hummou nuinsete na ruin na san? Na sianua zah lysakunaw mit te na dopaw kha hum cite mou na tua? Israel Pachia Athyaapaw lakha na rawse!

²⁴Na ryalahtu hae kha mangte Bawipaw kha na sarya zah, “Ka marangle patae ryte mua ahangnaw kalan, ahang huapaw Lebanon mua dung hae kalan ka kaethung vae; ahang huaccepaw a sidar ku hae te ahoy huaccepaw a maeccaw ku hae kha ka nge hae; ahang huaccenaw, thing athaaw huaccenaw ramkaw kya phe ka thua.

²⁵Tuisung ka thae zah tui ka neih, Izip ram e vawkhu balyn kha ka ccukaw te ka rousah,” na ci.

²⁶‘E hynh langmawlya te ka la paccynku vae cipaw na thae boi khyh tou? Lungrua te koihlupaw khuapi hae kha aronahpaw apumkuhpaw lang na rae nawlan, khawlya te ka la paccynpaw kha atu tuh ka ccingsah vae.

²⁷Tuin kya a um hae paw tuh mih thawzya, siikuh hae zah mih lung pong muakhaekuh vae; minmin tuh loo lungkhu e aku hae hawte thuasah, nebaleihpaw lonua hawte thuasah, innccukaly umpaw lonua hawte thuasah, ale kheccung mawze baleih anaanpaw aku hawte thuasah athua hae.

²⁸‘Na thokunaw te na haungnaw, na pounaw te na teenaw, te ka tungvaw na thinrianaw kha phe ka ny.

²⁹Ka tungvaw na thinria zah na lysakunaw kha ka thae vae keiccuze, na napaw kae tho cih zah, na mung kha rangtei kae teisah cih; nae thuanaw laanpi kyakhate kae kisah cih.

³⁰“ ‘Nang na hanlan muihsahnaw tuh hynhcite athua cih: Atu kum tuh amaw le lan alethungpaw ccathae kha ae oh, khuavae kya mah tuhcite alethungpaw kha ae oh; hankum kya tuh ccathae kha ccoukuh oh lah, rue oh, misu khokhu kya lin oh lah, misu thae kha ae oh.

³¹Ahiinhy hae paw Judah phin hae tuh akawlan mih tharui a sawthui cih zah, avawlan khe mih thae athae cih;

³²pawccecize ahiinhy hae paw tuh Jerusalem kyate oun pou cih hae zah, ahiin hae paw phu tuh Zion Mua kyate oun pou cih hae. E hynh vaaw BAWIPAW nynh lungthote a cyih cih.

³³“ ‘Tukeiccuze Assiria siapharan te asekuh lante BAWIPAW nynh a hopaw tuh: Aning nynh e khua lungkhu lang tee lan khyh, khuapi lungkhu kya the ccangkheit san kaw lan khyh, khawriaphua ccyngkute khuapi malang langkuh lan khyh, khuapi kha rawsete po voilu lan laephi adohpaw kha pumnua lan khyh hae.

³⁴Oun thuanaw laanpi kyakhate a kithui cih; aning nynh e khuapi lungkhu lang tee lan khyh, cite BAWIPAW nynh a ci.

³⁵Kamaw hanlan te ka ryalahtu David hanlan, e khua hynh khum khylan ka thungkhaw cih,’ a ci,” cite a hopya.

³⁶Tetuh BAWIPAW vaawpaw tuh yn langkuh zah, Assiria rhawkaw ryahmin kya-e milu cciing kheit sung tarya thong pangaw kha a chia hae; awkhua takaw khua he yn dae tuh, michi rhua lang pong a tang vae hae.

³⁷Tetuh Assiria Siapharan Sennakherib tuh toikuh zah, inn lang ki zah Nineveh khua kya a um vae.

³⁸A pachia Nisrok kha beikinn kya a beik cciamang lyakhe a ccapaw hae Adrammelek te Sharezer nynh amaw kha thaloi te phe a chia hae, minmin tuh Ararat ram lungkhu lang po a ccue hae. A ccapaw Esar-haddon nynh a paaw ccelang siapharan lang a tang vae.