Read Zotung Chin ISAIAH 38 Bible Online

ISAIAH 38 - Zotung Chin bible

ISAIAH 38

¹Tuh lyatuin Hezekiah tuh ccih zah vyavya a chih vae. Amoz ccapaw profeh Isaiah nynh a kalan cceih zah, “BAWIPAW nynh hynhte a ho: Na inn ryalaw kha hoyte synriasya, pawccecize na chih vae cih; na dan vae lan khyh,” a cipya.

²Tetuh Hezekiah nynh pang kalan khe a mae kha hawi zah BAWIPAW kalan saw a sang:

³“Pou BAWIPAW , ka thinlung balyn te lungzite na malang ka hiin zah, na muihnaw kya ahoypaw uccaw ka cyipaw kha atu beih liathuitua, namaw kha kae ngiaku,” ci zah, thawte a rah.

⁴Te BAWIPAW bya tuh Isaiah kya yn thua zah:

⁵“Hezekiah kalan cceih lah, ‘Na minpaaw David Pachia, BAWIPAW nynh a hopaw tuh: Na sawsangnaw kha ka thae vae, na mitphi kha ka muih vae; na hiinshe kha kum haw lae pangaw ka saesah chih cih.

⁶Assiria siapharan kuih kyate nang te e khuapi hynh kae luesah cih oh zah, e khuapi hynh ka thungkhaw cih, a ci,’ cite la hopah,” a cipya.

⁷Isaiah nynh, “BAWIPAW nynh bya a kinku vae thyhte a cyi lanpaw uccaw, nang na hanlan muihsahnaw tuh hynhcite nynh athua:

⁸Dotua, Ahaz kya-e khuanin tounawpaw vawlan anuekuhpaw mynlyh kha nulang khe kaw haw ka kisah cih,” a ci. Tetuh phe anuekuh vae paw khuanin tounawpaw tuh nulang kaw haw a kithui.

⁹Judah Siapharan Hezekiah tuh ccih zah a ccinaw kyate a dan koute a zeipaw ccaw tuh:

¹⁰Ka hiinshe ka ryku cciamang lya ka cceih vae cih; ka ccyh a laehy ungpaw kha michi khua koikua kalan ap athua vae, ka la ci.

¹¹Ahiinpaw ccungccaw hae ram kya BAWIPAW kha ka muih vae lan khyh; laephi kya a um hae paw laku kya ccungccaw hae kha ka muih vae lan khyh hae, ka la ci.

¹²Tuurinpaw bu hawte ka umnaw inn tuh phou thua zah, ka kyate nue athua; boeikuatu nynh boeikua a kue hawte ka hiinnaw kha ka kue vae; boeikuatu nynh boeikua kya arawkuhpaw laaw a pae hawte Pachia nynh thoh yn pae vae; nin kheit lungkhu ka hiinnaw phe nae thangsah, ka la ci.

¹³Azi zidae bawmnaw mue khylan ka sia; chindeih hawte aning nynh ka ru balyn kha pong yn khya; nin kheit lungkhu kya ka hiinnaw phe nae thangsah cite ka la tua.

¹⁴Ccipae khyhze cocia pavaw hawte ka sia zah, vahu hawte ka hawkhaekuh. Ka mit tuh ka dothungnaw a thawbang vae. Pou Bawipaw, kae tuh tuaasahkunaw ka teing; khynnaw beih yn pyatua!

¹⁵Thuasalama pawmou ka ho kho ung cih? Pawccecize kae kha yn hopya vae, e hynh amaw ccaccei nynh phe a cyi vae. Ka thinlung a cci keiccuze kharouh ka ih kho khyh.

¹⁶Pou Bawipaw, e uccaw hae liate ccungccaw hae tuh a hiin hae, ka muisaw hiinnaw tuh e uccaw hae balyn kyahin a um. Ka ccinaw beih yn dan sah lah, yn hiin sah!

¹⁷Thanccingte ka teingpaw ccinaw alepaw tuh kamaw hoynaw hanlan nynh athua; ka hiinnaw kha ronaw hunghua kyate poh nae thuaa vae, pawccecize ka seinaw balyn kha na nulang na vua vae.

¹⁸Michi khua nynh na tungvaw lungtuabya ho kho khyh, chinaw nynh na the ae hoysah kho khyh; Hunghua lungkhu lang a ccah hae paw nynh na lungzinaw kha ngaehoi kho khyh hae.

¹⁹Atunin kae nynh kae thehoysah hawte ahiin hae paw, ahiin hae paw rou nynh ae thehoysah cih hae; paaw hae nynh ccaaw hae kya na lungzinaw kha a nysah cih hae.

²⁰BAWIPAW nynh kae kha yn khum cih, BAWIPAW beikinn lungkhu khe kaening nynh kae hiin lungkhu balyn tintang khuakute hlaw kae sah cih, a ci.

²¹Isaiah nynh, “Thaeku athae hae kha lah hae sah lah, a nonde kou hae te, accinaw kha thuhpah hae sah, tetuh siapharan tuh a dan cih,” a ci.

²²Hezekiah nynh mah, “BAWIPAW beikinn lang cciathung khonawpaw pawcihawpaw muihsahnaw mou a um?” a ci.