Read Zotung Chin ISAIAH 39 Bible Online

ISAIAH 39 - Zotung Chin bible

ISAIAH 39

¹Tuh ccyh lyakhe Baladan ccapaw, Babilon Siapharan Merodak Baladan nynh Hezekiah tuh ccih zah a dan vae cipaw a thae keiccuze ccaw te lasung phusahpyate locceihtu hae kha Hezekiah kalan a saw hae.

²Hezekiah nynh minmin kha hoyte ccuepe hae zah, a sisuainn, ngun, sui, amynkhuhpaw, aphutepaw chitui, a zunghe inn abalyn, a uccaw ccakhungnaw inn kya a umpaw balyn kha a dosah hae. A inn kya te a uknaw ram kya a umpaw balyn kha Hezekiah nynh a dosah lei hae paw ccangkheit san um khyh.

³Tetuh profeh Isaiah tuh Hezekiah Siapharan kalan yn thua zah, “E ccungccaw hae nynh pawtemou a ho hae? Paw kyate mou na kalan oun thua hae?” a cipya. Hezekiah nynh, “Myarya asawnaw Babilon ram kyate nynh ka kalan oun thua hae,” a cipya.

⁴Isaiah nynh, “Na inn kya pawmou a muih hae?” a cipya. Hezekiah nynh, “Ka inn umpaw miakaw pong a muih hae; ka uccaw ccakhungnaw inn kyaze minmin ka dosah lei hae paw ccangkheit san um khyh,” a cipya.

⁵Tetuh Isaiah nynh Hezekiah kha, “Vaaw BAWIPAW bya kha ngaetua:

⁶Na inn kya a umpaw balyn te na minpaaw hae nynh atunin cia a ccakhung hae paw balyn kha Babilon khua lang cciakhaenaw ccyh yn thua cih; pawpaw sanmah cciataw thua lan khyh, cite BAWIPAW nynh a ci.

⁷Na saahku hae paw na ccapaw hae abang tuh ccaring a cciakhae cih hae zah, Babilon siapharan inn kya ryalaw khylan mih tin a reih cih hae,” a cipya.

⁸Tetuh Hezekiah nynh Isaiah kha, “Na hopaw BAWIPAW bya tuh ahoy,” a cipya. Pawccecize aning nynh, “Ka she lungkhu daenaw te khynnaw a um cih,” cite a tua.