Read Zotung Chin ISAIAH 40 Bible Online

ISAIAH 40 - Zotung Chin bible

ISAIAH 40

¹Lungtangnaw pya oh, ka ccungccaw hae kha lungtangnaw pya oh, cite nae Pachia nynh a ci.

²A ryalaw ccyh tuh phe a thangsah vae, a seinaw mee kha pyaru athua vae, a seinaw balyn hanlan BAWIPAW kuih kyate leit ning a teing vae, cite Jerusalem kha byanepaw te hopah oh lah, siatua oh.

³Roi roikheit ccae zah: “Ramkaw kya BAWIPAW laanpi kha paccynpah oh, ah Pachia hanlan laesia ram kya laanpi kha lawbabin lan raepah oh.

⁴Akhupaw miakaw kha bia athua cih zah, mua te sangpyng miakaw kha tuphae athua cih; akoupaw laanpi kha lawbabin lan rae athua cih zah, karynkare a umpaw kha nginsah athua cih.

⁵Tetuh BAWIPAW phu-enaw kha alangkuh cih zah, ccungccaw balyn nynh pynkheihlan a muih cih hae, pawccecize BAWIPAW munglae nynh phe a ho vae,” a ci.

⁶Roi roikheit nynh, “Siakhae oh!” a ci. Kae nynh, “Pawmou ka siakhae cih?” ka ci. Ccungccaw balyn hynh lonua nynh thua hae, mih phu-enaw tuh ramkaw e haetapaw hawte nynh thua.

⁷BAWIPAW hy nynh he a mung vae ze, lonua tuh naan zah, haetapaw tuh akhuakuh, accaccingte ccungccaw hae tuh lonua nynh thua hae.

⁸Lonua tuh naan zah haetapaw tuh akhuakuh; thuasalama ah Pachia bya tuh zungzae atyn cih.

⁹Thehoypaw yn phutu, pou Zion, mua ahangpaw kalan kaetua; thehoypaw yn phutu, pou Jerusalem, thawte na roisawtua, ri leite siatua; Judah khuapi hae kha, “E kya nae Pachia phang um!” cite hopah hae.

¹⁰Dotua, Bawipaw PACHIA tuh thungnaw te yn thua cih zah, a thawzung te a uk cih hae; a ryalaw mee tuh amaw kya um zah, a lasung tuh amaw malang a um.

¹¹Tuurinpaw hawte a tuuphu kha looh a dang cih; tuutaw hae kha a kuih te a dua cih hae, a by kya a pompae cih hae zah, a taw umpaw tuupinung hae kha zyazyate a cciakhae cih hae.

¹²Tui kha a kuihphe te a tou khopaw, vaawlui kha a khaw te a khaw khopaw, vuiping kha tounawpaw te a ruin khopaw, mua hae te sangpyng hae kha zawccu te a khin khopaw, hummou a um?

¹³Hynhte cyih cite BAWIPAW Muisaw kha tuanaw a hopah khopaw a um tou? A ccangpah khotu te tuanaw a pya khotu a um tou?

¹⁴Hum te mou tuanaw a suelua hae? Hum nynh mou dingnaw laanpi kha a ccangpah? Hum nynh mou hawnaw kha ccangpah zah, nythyanaw laanpi kha a muihsah?

¹⁵Minphuin hae heize bangting kyate a ccawpaw tui hawte thua hae zah, zawccu vawlan a umpaw vuiping hawte nynh tua athua hae; tuikoih hae tuh zawbahaepaw vuiping hawte nynh athua hae.

¹⁶Lebanon ramkaw kya umpaw sarangpaw hae tuh maee-ute silawnaw lang zaw khyh, Lebanon ramkaw e thing hae tuh maeetua nawlan zaw khyh.

¹⁷Minphuin balyn hynh amaw malang tuh paw sanmah thua khyh hae; minmin tuh accakaepaw te pawpaw san a um leipaw laeze azya huapaw lang nynh a ria hae.

¹⁸Pachia kha hum te mou na touse kho cih? pawcihawpaw muinsan te mou amaw kha na khinkhia kho cih?

¹⁹Zohtuh khate tou? Zohtuh tuh a kuihhae hoypaw nynh rae zah, sui alaeethyapaw nynh sui te a thei koute, ngun rui kha a sui.

²⁰Sui te ngun ahlu a taening leipaw nynh amawe cih leipaw thing hoypaw kha a poku; te akhuliakuh cih leipaw zohtuh kha thadynsah khylan, a kuihhae hoypaw ccungccaw kha a ccungku.

²¹Na nyh khyh oh tou? Na thae khyh oh tou? Langmawlya te ae hopah khyh oh tou? Laephi athotakaw lya mawte na thaethya khyh oh tou?

²²Aning tuh laephi apyngnaw luki khe a haung, laephi vawlan a umpaw ccungccaw hae tuh tungkhipaw hawte nynh athua hae; vaawlui kha boei hawte tharae daw zah, umnawpaw bu hawte a daw;

²³Athungpaw uktu bawi hae kha sahbung hae zah, laephi uktu hae kha accakaepaw lang a tangsah hae.

²⁴Minmin tuh ccou sasaw kyalya te hung ccoukupaw aku, lin sasaw kyalya te hung linkupaw aku taraw thua hae zah, atharui tuh laephi kya tee sasaw kyalya te hung a teepaw aku nynh thua hae, BAWIPAW nynh minmin kha he a mung hae tuh, karae rou hae zah, khise nynh ccatanphue hawte a mung hae.

²⁵Tukeiccuze kae kha hum te mou nae khinkhia cih? Kae te alokuhpaw hummou a um? cite Athyaapaw Pachia nynh a ci.

²⁶Ahangnaw langkhe dothung oh lah, muihtua oh: Khuh-e hae khuh hummou a rae? Mih phupi kha a cciakhaetu hae paw nynh minmin kha accanlu phe ria hae zah, mih min te pong a ko hae; a thungnaw tuh myaryamaw le zah, huhan te phe abia keiccuze ccangkheit sanmah zo khyh.

²⁷Pou Jakob, Pou Israel, “BAWIPAW nynh ka laanpi kha nyh khyh, ka Pachia nynh mue lan ka ccanpaw kha pawlang yn riapah khyh,” cite pawccemou na ho?

²⁸Na nyh khyh oh tou? Na thae khyh oh tou? BAWIPAW tuh zungzae tynpaw Pachia nynh thua, laephi adianaw cia Raetu nynh thua. Aning tuh a thawbang khyh zah a thawzya khyh; a hawnaw tuh nythya kho thua khyh.

²⁹BAWIPAW nynh mih thawbangpaw kha thawzung pya hae zah, mih thawzyapaw kha thungnaw a pya hae.

³⁰Zawthaw hae heize mih thawthang cih zah a bang cih hae, ccangvae hae tuh mih thawbang;

³¹thuasalama BAWIPAW a ngaehoikuh hae paw tuh thawzung thawpaw a hoi cih hae, mosipi hawte mih sake te a zouthung cih hae, a ccue hae ze bang lan khyh hae, a ccia hae zemah mih thawthang lan khyh.