Read Zotung Chin ISAIAH 45 Bible Online

ISAIAH 45 - Zotung Chin bible

ISAIAH 45

¹BAWIPAW nynh Sairas kha siapharan lang chitui a thuh, minphuin hae kha tae khylan te siapharan hae boeining kha khah khylan, koikua hae kha khaw leite thuakaw hae kha hung khylan Sairas a ranglang kuih kha BAWIPAW nynh kyng zah a hopyapaw tuh:

²Na malang ka cceih cih zah, mua hae kha phe nging lan ka tuphae cih, sohin thuakaw hae kha zoihtatyh lan ka khya cih zah, sivaccaw hae kha ka khya cih,

³mohnaw lungkhu e sisua hae te alang leinaw hmin kya thuruhpaw hoirumnaw kha kae pya cih, tuhteze nynh kae hynh BAWIPAW , na min te ae kotupaw Israel Pachia nynh ka thua cipaw nae nyh cih.

⁴Ka ryalahtu Jakob te ka popaw Israel hanlan na min te kae ko zah, nae ny khyh zemah na min thawpaw kha kae phu.

⁵Kae tuh BAWIPAW nynh ka thua, te ccangpaw um khyh; kamaw laelan ccangpaw Pachia um khyh. kae hynh nae ny khyh zemah thungnaw kae pya,

⁶tuhteze nynh nithua lang e hae te niccaw lang e hae nynh kamaw laelan humhung mah um khyh cipaw a nyh cih hae; kae tuh BAWIPAW nynh ka thua, ccangpaw um vae khyh.

⁷Awnaw kha ka rae zah, mohnaw kha mah ka rae, hiin hoynaw kha ka rae zah, ngaethyanaw kha mah ka rae. Kae, BAWIPAW nynh atyn-are balyn hynh ka rae.

⁸Pou vaawlui hae, avaw langte khuaarawtua, vaawlui hae nynh dingnaw kha khuaa lang rawsah hae sah; laephi hungkuh sah lah, khumnaw kha pouthung sah, dingnaw kha mah yn pothung sah; kae, BAWIPAW nynh tuh-e tuh ka rae vae.

⁹Amaw a Raetupaw kha a rawsepaw hanlan te ang raetupaw kha a rawsepaw laephi ang hanlan tuh ngaethya lan kou um! Anglae nynh amaw a raetupaw kha, “Pawmou na rae? Na raepaw hynh kyngnawpaw um khyh,” cite a hopah zawtou?

¹⁰A paaw kha, “Paw ccungccaw mou na saah?” cite khia zah, a nung kha, “Paw ccaaw mou na saah?” cite a khiatupaw hanlan ngaethya lan kou um.

¹¹BAWIPAW , Israel Pachia Athyaapaw, Israel a Raetupaw nynh a hopaw tuh: Pawccemou ka ccaaw hae kong kha nae khia oh? Pawccemou ka ryalawnaw kong kha kaw nae pya oh?

¹²Laephi kha ka rae zah, laephi vawlan khe ccungccaw kha ka rae; ka kuih te vaawlui kha tharae ka daw zah, vaawlui kya a umpaw balyn kha kaw ka pya.

¹³Sairas kha dingnaw liate ka langsaku vae, a laanpi balyn kha ka lawsah cih; aning nynh ka khuapi kha a rae cih zah, amee khyhze lasung kha lawku leite, a kyng hae paw ka ccungccaw hae kha a luesah cih hae, cite vaaw BAWIPAW nynh a ho.

¹⁴Te BAWIPAW nynh a hopaw tuh: Izip sisua, Ethiopia ram e kungkunaw te mih pynrua hangpaw Seba hae nynh kungkunaw hae paw uccaw hae tuh na kalan a thua cih zah na uccaw lang a tang cih, minmin nynh nang kha ae zui cih hae; sivawrui te khiikute oun cceih cih hae zah, na malang a bakhung cih hae, nang kha, “Pachia tuh namaw kya rou nynh a um, tuh-e Pachia laelan ccangpaw Pachia um khyh,” cite ae bohkuh cih hae.

¹⁵Pou Israel Pachia, Khumtu, thanccingte, nang tuh amaw te amaw a rekuhpaw Pachia nynh na thua.

¹⁶Zohtuh a raetu hae balyn tuh maethyanaw mue hae zah mih ngaeangthua, pynkheihlan thethyanaw a ccou hae.

¹⁷Thuasalama BAWIPAW nynh Israel kha zungzae tynpaw khumnaw khate a khum; nanning tuh maethyanaw te ngaeangthuanaw kha zungzae cia na mue lan khyh oh.

¹⁸Vaawlui a raetupaw BAWIPAW , laephi kha rae zah a tynsahpaw, laephi kha alakaw lan rae leite, ahysuepaw nynh a um nawlan a raetupaw Pachia nynh a hopaw tuh: Kae tuh BAWIPAW nynh ka thua, kamaw laelan ccangpaw Pachia um khyh.

¹⁹Aphiruh lante bya ka ho khyh, amohnaw hmin kya ka ho khyh; “Kae hynh alakawpaw hmin kya yn ccung oh,” cite Jakob ciihan hae kha ka hopah khyh hae. Kae, BAWIPAW nynh byaccing kha ka ho, akyhpaw kha ka ho.

²⁰Nanning nynh sueluakuh oh lah, pynkheihlan oun cceih oh, minphuin hae kyaze a hiinhy hae paw nanning, oun naeku tua oh! Thing te raekuhpaw mih zohtuh hae kha khiakhaekute a khum kho leipaw pachia kalan saw a sang hae paw tuh hawnaw hoi khyh hae.

²¹Nae byathan kha oun thuakhae oh lah, hotua oh; minmin nynh mih tuanaw kha pynkheihlan hotua hae sah! E byathan hynh langmawlya te hum nynh mou a la ho? Hum nynh mou khawlya te a la hodae? Kae, BAWIPAW nynh ka la ho khyh tou? Kamaw laelan ccangpaw Pachia um khyh, kae tuh adingpaw Pachia te Khumtu nynh ka thua; kamaw laelan humhung mah um khyh.

²²Laephi adianaw e ccungccaw balyn, ka kalan oun maeleihkuh oh lah, khum na thua cih oh! Pawccecize kae tuh Pachia nynh ka thua, ccangpaw Pachia um khyh.

²³“Ccungccaw miakaw nynh ka malang ccukharu a tung cih hae, mih munglae raveihte bya a kinkuh cih hae,” cite kamaw ccaccei nynh byakinkute ka ho vae, tuh-e tuh ka mung kyate dingnaw te toikuh zah, yn kithui cih leipaw bya nynh thua.

²⁴BAWIPAW kya rou nynh dingnaw te thawzung a um, cite a ho cih hae; aning tungvaw mih thinriapaw balyn tuh amaw kalan a cceih cih hae zah maethyanaw a mue cih hae.

²⁵BAWIPAW liate Israel ciihan balyn tuh taenaw a mue cih hae zah mih phu-e cih.